21
Jerusalem Ah Paul Hawh
1 Keimuh hei in, “Damno in,” tin nuksatta in hawh ung hi. Hawmkuang cu imah lai ah bang vawk ngawlin hawhin, Cos ah heng ung; a zingten Rhodes tuikulhah hengin mah lai pen Patara ah letvawk ung hi.
2 Mahlai pen Fonisia ah a hawh tukmi timbaw cu tawk ung a, mah timbaw cu khungin hawh ung hi.
3 Saipras tuikulh a langtheinak mun pen hang lamah kawnin Siria lamah letvawk ung hi. Taiar khua ah tolhin timbaw i van puakte cu suah hawta hi.
4 Mahlai ah thu umtu khenkhat um haw a, nipi khat sung cam ung hi. Hawvang i huhamin Paul cu Jerusalem ah hawh tuk ngawlin kham hi.
5 Mahnaven amuh tuah ka um khawmnak uh hun a bo ten tulin hawh ung. Amuh ten a zi le a cate haw tuah tuipi mawk tian hen haw hi. Mahlai mun pen ka venghawng uhin khukdin thungen ung hi.
6 Mahten pa khat le pa khat “Damno tukin maw,” tin tidunin kohte cu timbaw humah kai ung a, amuhte vang innah pin haw hi.
7 Taiar khua pen hawhngutin, Ptolemais ah heng ung hi. Mahlai ah thu umtu unaupihte tawk thahin, amu lakah ni khat caam ung hi.
8 A zingten tul lehleu in Sisaria ah heng ung. Mahlai ah Jerusalem a, upa salih tenmi sung pen evangelist Filip i innah cam ung hi.Ref 21:8 Nung 6:5; 8:5;
9 Pasal nei laihngawl canu pa li nei in, mah mite cu Pathian i thu phuangtu haw hi.
10 Ni tam thim ka um nung uhten Judah ngam pen profet pa khat Agabas a tih haw cu heng hi.Ref 21:10 Nung 11:28;
11 Keimu lakah hungin Paul i taikhap a lak celh ten a khut le ke cu mah taikhap tuah keenin, “Hawvang Thiangtho in hi tin ti hi, taikhap a neitu pa hi Jerusalem khua ah Judah miten hi tih bangin keen haw tuk a, Gentail mitei khutah pia haw tuk,” ti hi.
12 Mah thu ka zak uhten keimuh hihen, midangte hei hihen, Paul cu Jerusalem ah hawh tuk ngawlin kham ung.
13 Mahten Paul in “Ita hitin um kam uh ci! Hi bangin na kap uh tale ka thinnatik sesem tuk uh ci. Topa Jesuh ca in keen le khih bek hei in, tham ngawlin thih tuk tianin mansa zo ing,” ti hi.
14 Ka kham theih uhmi a um ngawl hangin khamleh ngawlin, “Topa i deihnak bangin hi tahen,” tin ti ung hi.
15 Mahlai ah huncan tawkmoh sung ka um nung uhten ka na uhte heng lehleu in, Jerusalem ah hawh ung.
16 Sisaria ah a ummi nungzuitute khenkhat ten zuibok haw a, ka camnak tuk uh Mnason i innah hawhpih haw hi. Mnason cu Saipras mi hi in, thu umtu masa hi.
Paul In James Leng
17 Jerusalem ah ka hen uhten, thuumtu ten lungdam mahtakin muak haw hi.
18 A zingten James tawk tukin Paul tuah hawh ung a, pawlpi upate vang kim khawng haw hi.
19 Paul in, a khut haw len thahin, a hum hawah lungdamnak thute khi hilhin, a nadehnakte hum tawnin Pathian in Gentail mitei lakah a bawlmi hempoh hilh khawng hi.
20 Mah thu a zak haw ten Pathian thangphat haw a, amuh ten, “Unau pa Paul, Judah mitei sung pen thu umtu cu mi thawng izong him tih le Daan a zuinak haw pen itih zahin teima suah haw him tih cu na theihsa uhmi poh hi.
21 Gentail tei ngam sungah a ummi Judah mi hempoh tei lakah Moses Daan nung hek tukin le a cate haw vunceptalhnak bawlleh tuk ngawltohin le Judah Daan zuileh tuk ngawltohin Paul in zilh hi, tin himi ten son haw hi.
22 Atu hilai ah na hennak thu hi thei haw tuk ven itin bawl kam nung?
23 Hitin bawl le ci tin ngaisung ung. Hilai ah thutiamnak a bawl zo mi pa li um haw hi.Ref 21:23 Mipum 6:13-21;
24 Amuhte tuah hawh unna, thianthohnak tukin bawl mekmi bangin bawlpihin, a bo haw mi sum khi piak sakin hi; Mahten a sam haw meet thei haw tuk hi. Mahten nangmah loli in Moses Daan khi zui inna, thu a zaksa haw khi thuman umma tih thei khawng haw tuk hi.
25 Gentail mi thu umtu a cang mitei thu le la ah keimuh in laikuat zo ung hi. Ka laikuat uhmi sungah milim mai a, piaksa mi an ei pahsuh unna, sathi ei pahsuh un, ngawng awkin, thahmi sa ei pahsuh unna, nupa sualnak bawl pahsuh un tin ka soncat sa uhmi hi tin kuat zo ung hi,” tin ti haw hi.Ref 21:25 Nung 15:29;
26 Mah hangin a zingten Paul in mahpa lite cu hawhpihin, amu daan bangin thianthohnak bawl haw hi. Mahnung ten biakinn sungah tumin, thianthohnak ni hi ituk ni ten bo tuk tih le ituk ten biakpiaknak pia tek haw tuk tih khi hilh hi.
Biakinn Sungah Paul Man Haw
27 Ni salih ni a kim kuanno ten Asia ngam pen a hungmi Judah mi khenkhat ten Biakinn sungah Paul cu mu haw hi. Mipi tokpilin Paul cu man haw hi.
28 “Israel mite aw, bawm un hi! Hi pa hi khua hempoh ah hawhin, Israel mite le Moses Daan sonsia in, hi Biakinn vang sonsia in thuzilh pepeltu hi. Tu hei in hi biakinn sungah Gentail mite vang hunpih a, hi mun thiangtho hi nawngkaitik zo hi,” tin au haw hi.
29 Hi bangin a aunak haw cu Efesa khua mi Trofimus cu Paul tuah Jerusalem khua sungah a muh haw hangin le Biakinn sungah tumpih hi tin, a ngaihsut haw hangin hi.Ref 21:29 Nung 20:4;
30 Khuapi sung cu buainak tuah a dim hangin mipi cu tai khawng haw a, Paul cu manin Biakinn sung pen dok tul haw hi. Biakinn kongka khah cu manlang zetin khak khawng haw hi.
31 Mipi ten Paul cu thah tukin a ngaihsut haw hangin Jerusalem ah a khua buppi in langpang haw hi tin Rom ngalkap hotu ngalbawi lakah thuthan haw hi.
32 Thakhatin mah ngalbawi pa cu ngalbawi dang le ngalkap tuah tai haw hi. Mipi ten ngalkapte le mah ngal bawipa amuh haw ten Paul a vahlih haw cu tawp haw hi.
33 Ngal bawipa cu Paul i lakah hawhin, a mat celh ten thik taicin pa nih tuah khih tukin thupia hi. Mahten mipi tei lakah, “Hi pa hi akua him? I sualnak kaw a bawl?” tin dong hi.
34 Mipi sung pen mi khenkhat ten phun khatin au haw hi. Adang ten phun dangin, au bok haw hi. Thubuai leita lawlawm a hih ten ngalbawipa in itih bangin thu piang him tih a theihciang ngawl hangin a ngalkapte cu kulhtian innah hawhpih tukin thupia hi.
35 A hawhpih haw ten kailawn tian bek hen thei haw hi; mahnung siah cu mipi a nawk theih haw ngawl hangin Paul cu ngalkap ten a zawngin, zawng haw hi.
36 A nung haw pen zuan tutupin, “Hi pa cu that un” tin au pepel haw hi.
Paul In A Sihsan Khualnak Thuhilh
37 Ngalkap ten kulhtian inn sungah a tumpih haw tuk ten Paul in ngalbawi pa i lakah, “Thu pa khatno hilh thei nang maw?” tin ti hi. Ngalbawipa in, “Grik awn thiam cim? tin dong hi.
38 Mahti bang ahi tale nunglam hunah langpangin, mi thawng li hiamnam tuah phillawnah a taipihtu Izipt pa hi tuk ci mei?” tin dong hi.
39 Paul in, “Kei cu Judah mi ing. Silisia ngam Tarsas khua pen a piangmi le khuapi minthang munah a ummi ing. Mipi tei lakah thuhilhnak hun pia zazalin,” tin ngen hi.
40 Ngalbawi pa in thuhilhnak hun a piak ten Paul cu kailawn humah dingin mipi cu dai un tin a khutzap hi. Mipi dai ceng haw ten Paul in Hebru awnin thuhilh hi.