23
1 Paul in Khonsil upa tei maicang zo in, “Ka phunpih Israel mite tuni tian Pathian mai a ka nunzia ah lungmu thiang ngawlnak demno hei nei mang,” ti hi.
2 Thiampi Sang Ananias in Paul elah a ding tei lakah, “Paul cu a muk pen beng un,” tin thupia hi.
3 Paul in, “Si ngo noihmi pangtian a bangmi pa! Pathian in nangmah bengvawk tuk hi. Daan bangin ka thu son tukin hilai ah khung ci; mahnaven ‘Beng un hi’ tin na thupiaknak hangin mah Daan cu pahcat saw hi ci,” tin don hi.Ref 23:3 Mt 23:27-28;
4 Paul i el a umtu ten, “Pathian i Thiampi Sang zawnsak ci,” tin Paul cu ti haw hi.
5 Paul in, “Israel mi u le naute aw, Thiampi Sang hi tih thei mang hi, Lai Thiangtho sungah, ‘Na miphun a uktu sonsia pahsun,’ tin um,” ti hi.Ref 23:5 Suah 22:28;
6 Paul in, a heng mitei lak pen a khen cu Sadusi hi haw in, a khen cu Farasi haw hi tih amuh ten khonsil upa tei mai ah au in, “Ka miphun pih Israel mite aw, kei hi Farasi tei capa ing. A thi mite nungleh haw tuk tih muansannak ka neih hangin atu hilai ah sualnak thuson tawk ing hi,” tin ti hi.Ref 23:6 Nung 26:5; Fil 3:5;
7 Mahtin a hilh celh bek ten Farasi le Sadusi mite cu haudunin khenkhek haw hi.
8 Sadusi ten mihingte hi a thih nung haw ten tholeh haw tukma toh hi; vancungmite vang um haw ma, hawvang tih hei umma tin ti haw hi. Mahnaven Farasi ten a pa thumin um hi tin um haw hi.Ref 23:8 Mt 22:23; Mk 12:18; Lk 20:27;
9 A au haw cu a nging dedeuh hangin Farasi Daan zilhtu khenkhatte cu dingto in, nase zetin au bok haw hi. “Hi pa i sualnak hi neuno hei mu ma ung. Hawvang ahimata vancungmi in, a lakah hilh ngangai hei hi kha thei hi,” tin ti haw hi.
10 A hauhdunnak haw cu a nase leita hangin Paul cu botkek let thong haw kha kawn tin ngalbawipa in lauzet pih hi. Mah hangin a ngalkap khi mipi tei lak pen Paul cu pui in ngal kulhtian innpi ah hawhpih tukin thupia hi.
11 Mah zanin Topa cu Paul i elah dingin, “Imah lau pahsun! Hilai Jerusalem khua ah keima ca in ka tetti hi zo ci, hitih bangbok lengin Rom khua ah vangin ka tetti hi tuk laih ci,” ti hi.
Paul Thah Tum Haw
12 A zingten Judah mi khenkhat tawkdun khawmin, thu ngaisung khawm haw hi. Paul a thah theih uh laklawh an ei tukma ung, tui hei in tukma ung, tin thutiamnak bawl haw hi.
13 Hiti bangin munkhatah thu a ngaisungtu cu mihing sawm li val haw hi.
14 Thiampi upate le upa dang tei lakah hawh haw a, “Paul ka thah laklawh uh cu an hei ei tukma ung tin thutiamnak bawl zo ung hi.
15 Mah hangin nangmuh le khonsil upa ten Rom ngal bawipa i lakah thucah unna, Paul i cungcang a kim deuhin thei nuam ung tin tidunin, Paul cu hilai ah hungtik un hi. Mahten pangham tuk ung a, hilai a hen man laih ngawlin that tuk hung,” tin ti haw hi.
16 Mahnaven Paul i celnu i capa in mahtih bangin a son lih haw a zak hangin ngalnannak innpi ah hawhin, Paul lakah hilh hi.
17 Mahten Paul in ngalbawi pa khat i lakah, “Hi naupang pa hi ngalbawi pa i lakah hawhpih inna, thuhilh tuk pa khat nei hi,” tin ti hi.
18 Mah ngalbawipa a ngalbawi hotupa i lakah hawhpihin, “Thawngta pa Paul in keimah sam a, hi tangvalpa hi nangma lakah hawhpihtik hi, itahim titale thu pa khat hilh tuk nei,” ti hi.
19 A ngalbawi hotupa in tangval pa cu a khut tuah lenin amu pa nih bek hawh haw a, “Ikaw na sonpih nuammi?” tin dong hi.
20 Tangval pa in, “Judah mi hotu ten Paul i cungcangah khonsil upa ten a cangkim deuhin thei nuam ung tin ti hemin, zingten khonsil upa tei lakah hawhpih tuk ngen tukin lungkimnak nei zo haw hi.
21 Mahnaven a thu haw cu ngai kha pahsun; itahim titale mihing sawm li val ten Paul cu pang haw tuk hi, a thah ngah haw laklawh imah ei tuk ngawl le imah intuk ngawlin thutiamnak bawl haw hi. Atu-in ngalling ham khawng zo haw in, nangma thusoncat tukmi bek ngak haw hi,” tin hilh hi.
22 Ngalbawi hotupa in, “Keima lak a na sonmi hi kuamah i lakah son pahsun,” tin pintik hi.
Ngamuktu Felix Lakah Kuat
23 Mahten ngalbawi hotupa in, a khutnuai a ngalbawi pa nihte cu samin, “Siria ngamah hawh tukin ngalkap za nih tuangtim un hi. Cipuh hum khung ngalkap sawm salih le ceipi ngalkap za nih vang tuangtim unna tuzan nazi kuah ten a tul thei tukin ngalling un hi.
24 Paul i khunnak tuk cipuh vang vaihawm unna ngamuktu bawipa Felix lakah himdamzetno in henpihta un,” ti hi.
25 Mahten ngalbawi hotupa in, a nuailam a bangin laikuat hi:
26 “Klaudias Lisias in ngamuktu bawipa Felix lakah laikuat ing. Dam laih cim?
27 Na lakah ka kuatmi pa hi Judah miten manin, thah tum haw hi. Rom mi hi tih ka theih ten ngalkapte tuah pan ung.
28 Sual a notmi haw hi i bel him tih thei nuamin khonsil upa tei lakah hawhpih ing.
29 Ka theih ngah ten thah tak sualnak le thawnginn sungah khumtak sualnak hei hi kha ma hi; sual a not haw mi cu amu daan i thu le la thongpoh khi hi.
30 Mahten amah hi thah tukin ngaisung haw tih ka zak hangin na lakah kuat paih ing. Sual a nawntu vang na lakah hungin nangma mai loli ah a sualthu son tukin hilh ing.”
31 Ngalbawipa i thupiaknak bangin ngalkap ten bawl haw hi. Paul cu pui in mah zan loli ah Antipatris tian hawhpih haw hi.
32 A zingten keciah ngalkapte cu kikleh haw a, cipuh ngalkap ten zui haw hi.
33 Sisaria khua henpih haw in ngamuktu bawipa i lakah laikuat cu a piak ceng haw ten a khut sungah Paul cu ap haw hi.
34 Ngamuktu bawi in laikuat cu sialin, ilai ngam pen hung cim? tin Paul cu dong hi. Silisia pen tih a zak ten Paul i lakah, “A sual thuson tei hen ten na thu cu sonleh tung,” ti hi.
35 Mahten Kumpi Herod i sakmi ngamuktu bawipa i zung innpi sungah ngalkap tei cin tukin thupia hi.