20
Mesidonia le Akhaia Ah
1 Mah thubuai cu a dai ceng ten Paul in thu umtute cu munkhatah samkhawmin thapiaknak a neih ceng ten mengdenno um tapoh un, tin tita in, Mesidonia ngamah hawh hi.
2 Mah ngamah zin pepelin thapiaknak nei pepel hi. Akhaia ah hengin,
3 mahlai ah ha thum sung caam hi. Siria ah hawh tuk tum naven, a vaithawi lih laih takin Judah miten zuak tum haw hi tih thu a zak hangin Mesidonia lam pen hawh tukin ngaisungleh hi.
4 Berea khua mi Pirhas i capa Sopater le Thesalon khua mi Aristarkas le Sekundas, Darbe khua mi Kaias, Asia ngam pen Taikhikas, Trofimus le Timote tuah hawh langkhat haw hi.
5 Hawhham haw in Troas pen ngak haw hi.
6 Naman hel ngawl cangho Puai celh ten Filipi pen tinbaw tuah ni nga sung ka hawh nung uhten Troas pen pha ung hi, mahlai ah pi khat cam ung hi.
Troas Khua Ah Paul i Dawlbel Zinnak
7 Nino ni taklamah Topa takeih kil khawm tukin tawkdun khawm ung. A hung khawm tei lakah Paul in thuhilhin, a zingten hawhleh tuk a hih ten zan khuanu thim tian thuhilh hi.
8 Humta khanah khawm ung a, mei inn tampi vak haw hi.
9 Paul in thuhilh a peh pepel hangin tangval pa khat Eutykhus a tih haw cu tukvelhah a khungtu cu hihbuh sungin, a hihbuhci dedeuh tak cu mah innhum thuah thumnak pen lei ah caksuk hi. A khul haw ten na thi zo toh hi.
10 Mahnaven Paul cu tolhsukin mah tangvalpa i humah boksukin pom hi. Paul in, “Thinsu pahsuh un, nunglaih hi,” ti hi.
11 Paul cu humta khanah kaito lehin, cangho khi botkekin ei haw hi. Paul cu zinglam nisuak tian thu a hilh ceng ten hawhta hi.
12 Mah tangval pa cu a innah lungmuang zetin a nungin hawhpih haw hi.
Troas Pen Miletas Ah
13 Tinbaw khungin Assos ah Paul zawm thah tukin hawh ung hi. Amah cu ke tuah hawh a tum hangin zawmthah tukin a hilhhamsa hi.
14 Paul in Assos ka hen uhten pha lehin Mitilene lamah hawmkuang khung langkhatin hawh ung hi.
15 Miletas pen tullehin, a zingten Chios ah hengin, a zinglawi ten Samos ah hengin, a lawileh ten Miletas ah heng ung hi.
16 Paul in Asia ngam sungah ngei camtuk a nuam ngawl ten Efesa ah letvawk tuk tum hi. A cangthei tuk tale Pentecost ni khel tukin Jerusalem ah manlangin heng nuam hi.
Paul i Thucah Dawltabel
17 Paul in Miletas pen mi hahin, Efesa khua a pawlpi upa ten amah tawk tukin thucah hi.
18 A hen haw ten Paul in, “Asia ngam ka hen ni pepan ka hun hempoh cu nangmu lakah iti bangin mang ing tih cu thei khawng zo poh uh ci.
19 Niamkhiatnak le mit hitui tuah Topa i sal ka hihnak bangin Judah miten thah a tumnak haw hangin haksa sa zetin, a nadek li ing.
20 Mipi mai ah hihen, nangmu inn sungah hei hihen, thuhilhnak tuk hun ka neih ten nangmu ca in bawmtu tuk hi tin ka theih hempoh supviang ngawlin hilh ing tihvang cu thei uh ci.
21 Judah le Gentail mitei lakah hihen, a sualnak haw zamsanin, Pathian nelah kiklehin, a Topa uh Jesuh a up haw a kul hihim tin ka hilh i humah ngallinnak tuk vang celzet hilh ing.
22 Atu-in Hawvang Thiangtho i lamhoihnak zui in, Jerusalem ah hawh tum ing hi; mahlai ah ka humah i cang tuk him tih thei ma laih ing.
23 Khua hempoh ah thawngtaknakleh haksatnak bebekin ngak hi, tih cu Hawvang Thiangtho i ngallinnak a piaknak i hangin thei ing.
24 Mahnaven ka ca in ka nunnak hi imah in sial mang hi; Topa Jesuh in deh tukin a piakmi Pathian i hehpihnak Thuthangpha son tuk hi cangkim zetin son tuk bek hi ka thuduhsammi hi.Ref 20:24 2Tim 4:7;
25 Na venghawng uh lakah suk le to ah vakin, Pathian i uknak thu hilh ing. Mahnaven atu-in kuamah in muleh tukma toh uh ci, tih hi thei ing.
26 Mah hangin tuni cu ciang zetin nangmu lakah phuang ing; nangmu lak pen pa kha khatin Pathian tuah khenin siatnak na tawk uh tale kei dehvo hi lehma toh hi.
27 Itahim titale Pathian i tuptahmi khi supmi nei ngawlin a venghawngin nangmu lakah phuang khawng ing.
28 Mahti bang a hih hangin nangmuh le nangmuh cingkhawi thiam unna, Hawvang Thiangtho in, na khut sung uhah a koihmi tuuhon khi phano in cingkhawi un hi. Pathian in, a Capa i thihnak i hangin amata in, a bawlsami Pathian i pawlpi cingkemtu na hita un!
29 Keima hawh nungten a lauhuai cingne hang hengin tuuhonte hi zo thong haw tukma hi, tih thei ing.
30 Nangmu sung hei pen mi khenkhat ten amu lamah pui nuamin, zolthu tuah thu umtute a puisualnak haw tuk hun heng tuk hi.
31 Mah hangin ngalling unna, a sun a zanin hitui tuah kum thum sung ka zilhmi thu cu na venghawng uhin phawkngil pahsuh un.
32 Atu-in Pathian i cinkhawinak le hehpihnak thu sungah ap zo ing. Amah in khangtotik tuk a, mihing tei ca in, a koihsami thupha cu pia tuk hi.
33 Kuamah i tangka, sui, nikcen puan silh hei hawza awng mang hi.
34 Keima khut loli tuah na dek ing a, keimah le ka ngualcam tei ka kul uhmi thil khi bawlbok ing tih cu na theih khawng uhmi hi.
35 Ihempoh ah nasezet dekin, a thanemte bawm tuk hung tih khi lak zo ing; Topa Jesuh hei in, “Ngahlam sangin piaklamah lungdamnak tam saw, tih cu cing leleng un hi,” tin thucah hi.
36 Paul in mahtin thu a hilh ceng ten a khukdinin, a venghawng haw in thungen langkhat haw hi.
37 Paul cu pomin, a nap ceng ten damno hawhin hi, ti thahin, a venghawngin kap leilui haw hi.
38 Kuamah in muleh tukma toh uh ci a tih hangin a thasiat cuangnak haw hi. Mahten tinbaw umnak tian hen haw hi.