19
Efesa Khua Ah Paul Hengkik
1 Apollos cu Korin khua ah a umlaihin, Paul cu mahlai ngam sungah zinin, Efesa ah heng hi. Mahlai ah nungzuitu khenkhatte cu tawkin,
2 Paul in, “Thu umtu hi zo nave uhcin Hawvang Thiangtho co uh cim?” tin dong hi.
Amuh ten, “Hawvang Thiangtho um tih hei thei awng ma ung,” tin don haw hi.
3 “Mah tale itih bang tuiphumnak kaw na laak uh,” tin Paul in dong hi.
Amuh ten, “Johan i tuiphumnak,” tin don haw hi.
4 Mahten Paul in, “Johan i tuiphumnak cu sualnak pen a sikleh mitei ca hi. Johan in ka nung pen a hung tukmi pa khi Israel miten a up haw tukmi pa hi. Mahmi cu Jesuh,” ti hi.Ref 19:4 Mt 3:11; Mk 1:4,7-8; Lk 3:4,16; Jn 1:26-27;
5 Mah a zak haw ten Jesuh minin tuiphum haw hi.
6 Paul in, a hum hawah a khutnga in, Hawvang Thiangtho cu heng hi; awn phun dadang tuah awnin Pathian thu phuang haw hi.
7 Amuh cu pasal tiptep sawm le pa nih haw hi.
8 Paul cu a pumkhawm inn hawah ngalpha zetin mipi lakah ha thum sung thuhilh hi. Amuh tuah thu son langkhatin Pathian Uknak thu khi a lungmu sung hawah a tum ngah tukin hilh hi.
9 Mahnaven khenkhat cu a lungmu haw khoh zetin, um nuam viang ngawlin mipi mai ah Topa i Lampi thu cu sonsia li haw hi. Mah hangin Paul in thu umtute tulpihin, Tyrannus a tih haw mi pa i thuhilhnak innpi ah nisial thuzilh hi.
10 Mahti bangin kum nih sung dekin Asia ngamsung a ummi Judah mi hihen, Gentail mi hihen, a venghawng haw in Topa i thu cu za haw hi.
Skeva i Capate
11 Pathian in Paul hum tawnin nalamdang bawl hi.
12 A pavua le a taihetnak puan cawmin tina tei lakah a hawhpih haw ten a natnak haw damin, a sung haw pen dawi ngilote tul haw hi.
13 Mun tihkimah vakin hawvang sia hawlvawktu Judah mi khenkhat ten Paul bangin Topa Jesuh i minin bawlbok tum haw hi. Amuh ten hawvang sia tei lakah, “Paul i tihnak bangin Jesuh min tuah hawlvawk ing,” tin ti bok haw hi.
14 Judah Thiampi Sang, Skeva a tih haw pa i capa unau salih ten mahtih bangin bawl li haw hi.
15 Mahnaven hawvang siasuak ten amu lakah, “Jesuh thei ing; Paul i thu le la vang thei ing. Mahnaven nohte cu akua uh kam?” tin ti hi.
16 Dawi tei luhnakpa in amuh cu buanpek tuah vatin neh khawng hi. Maliamin le a puante bal khawngin, a inn pen tai haw hi.
17 Mah thu le la cu Efesa khua ah a ummi Judah mi le Gentail mi hempoh ten a zak haw ten lau mahtakin, Jesuh i min cu upat sesem haw hi.
18 Thu umtu tei sung pen mi tampi hungin mipi tei mai ah a bawl mekmi khi phuang haw hi.
19 Mitzial thiam tampi ten a mitzial laibu haw cu munkhatah khawm a, mipi tei muh cilcelin haal haw hi. A haal haw mi mitzial laibute cu a man a tuat haw ten ngun tangkah 19:19 Ngun tangka cang khat cu mah hun laihin, ni khat tha lawh hi. thawng sawm nga hi.
20 Mahti bangin Topa i thu cahnak huham cu khangin, pung dedeuh hi.
Efesa Khua Buainak
21 Mahti bang thil a um nungten Paul in Mesidonia ngam le Akhaia ngamah zinin, Jerusalem ah lehvawk tuk khi ngaisung hi. “Mahlai ka hen nungten Rom vang cu ka muh thah kul bok tuk,” tin ti hi.
22 Amah bawmtu lak pen mi pa nih Timote le Frasta vang Mesidonia ah hawh haw a, amah cu Asia ngam lamah hun khat sung mang hi.
23 Mah hun laihin, Efesa khua ah Topa i Lampi thu le la ah buainak ngengpi um hi.
24 Ngun tuah pumsutu Demetrias a tih haw pa in, Artemis khawhuai nu i biakinn zuk khi ngun tuah a bawltik hangin nadektu tei ca in tangka a met tampi ngah hi.
25 Mah hangin a nadektute le amah bangin nadektu dadang hei khi samkhawmin amuh tei lakah, “U le naute, hi a nadeh uhmi i hangin neinungin, um hung tih cu na muh khawng uhmi hi.
26 Mahnaven atu-in Paul a tih haw mi pa in, iti bangin nadek him tih cu nangmuh loli in, na muh uhmi le na zak uhmi hi. Mihing tei bawlcopmi pathiante cu pathian kha haw ma hi, ti in, Efesa khua le Asia ngam venghawng awndiak, mi tampi tei thin sungah a hilhmi thu cu tum ngah hi.
27 Mahti bang a hih hangin hi a nadeh uhmi hi a minsia tuk toh tih lauhuaizet hi. Mah i humah Asia ngam le leihum khua hempoh ah mi hempoh tei biakmi a thupi zetmi Artemis khawhuai nu i biakinn hi miten imah sialleh haw tukma toh, a thupinak vang bo vawkta tuk,” ti hi.
28 Mahmi cu mipi ten a zak haw ten thinukzet haw hangin, “Efesa khua a, Artemis cu thupizet hi,” tin au tawtok haw hi.
29 Mahtin a au haw cu khuasung hempoh ah thang khawng hi. Mipi ten Mesidonia mi pa nih, Paul tuah khual a zin langkhatmi Kaias le Aristarkas khi man, puai zohnak inn pi ah henpih haw hi.
30 Mipi tei lakah Paul cu hawh nuam naven, umtu ten kham haw hi.
31 Mahlai ngamsung a, thuneitu le a ngualcampih khenkhat ten mahlai innah hawh hihim tuk ngawlin thucah sih haw hi.
32 Mahten puai zohnak innah buai li haw in; a nuanuamin au haw naven mitam saw ten mahlai ah ita heng kam hung tih hei thei haw ma hi.
33 Judah miten Alexander mai ah a tultik haw hangin mi tampi ten hi thubuai a tultiktu cu amah hi tuk tin ngaisung haw hi. Alexander in dai un, tin a khut tuah mipi cu lakin ama lamtangin thuson tum hi.
34 Mahnaven Judah mi a hihlam mipi ten a theih haw ten amu au bang leng cu au tawtok leleu haw in, “Efesa khua a, Artemis cu thupi hi,” tin nazi pa nih sung au haw hi.
35 A tawpnak ten mah khuasung a, thuneitu lakah laingantu pa in mipi cu daitik deuhin, amuh tei lakah, “Efesa khua mite, Efesa khua cu a thupimi Artemis i biakinn le vancung pen a caksukmi suang thiangtho umnak mun hi tih cu mi hempoh tei theihmi hi.
36 A el theitu akua um him? Kuamah in el thei haw tukma hi. Mah hangin mengden unna, komno ngaisung masa ngawlin imah bawl pahsuh un hi.
37 Hi ten biakinn sung a thil ngu haw ma si, a khawhuai nu uh sonsia haw ma naven hilai ah henpih uh ci.
38 Demetrias le a nadektu ten kuakua i humah mawhsiat tuk a nei haw tale thukhen theihnak zung nei si hung; thukhen ni le thuneitu upa vang nei si hung. Mahlai ah thu cu sonciang theih hi.
39 Mah sangin a thupi deuh na deih uh ahi tale eimu daan bangin khuasung mipi pumkhawm innah soncat tukmi hi.
40 Itahim titale tuni in, a piangmi humah buainak hengtik uh ci, tin mawhsiat a tawh tuk uh lauhuai hi. Hitih bang lawlawmin thubuainak piang tukin a sullam umma hi; mahten ita buai uh cim tin, a ti haw tale ka ot theihnak tuk um sih ma,” ti hi.
41 Mahtin a tih ceng ten a tang langkhattute cu pinkhektik hi.