TITAS
Titas'a Luo Paul Caapaphya
Titas hing Jentail ming ta cuote Khrihsaa a cuo khu taata Paul rehriehnepa hne ruothaa re lie a byatuv ta a cuo. Hingpa caapaphya hing ama a byatuv mingnu, Titas kha Krik lie a aw ningta a paphyapa a cuo. Paul ta Khrihsaabuv mangchiy riypata a chi siypa tana a cuo. Hingpa caapaphya hingta a biepuvpa suothung a ri.
1. Khrihsaabuv luochiytuv uvthyi ta hnyi riypa zyazaa kha, Titas kha a pachang sa pakhaa. Hinghaahingta pathyisa a hunapa ca Krit ming hing pha lina luota a ming pathuopa ama cuo nakawta a cuo.
2. Khrihsaabuv chunglie a awpa capaa uvthyi, canung uvthyi (kungnu vie canung zaw a pacuv pachaa riypa tie), mingnu tie hne sii zaw kha tuokhaatama cawpa riypata ama cuo tapa kha ruena a pi.
3. A chuona lieca Paul ta Titas kha Khrihsaa zyazaa kaw ruena a che. A hlyi ta cawsaa hne a re pata a dieta tah aw the a hu zya, a huena, a-i-achuena hne a chena zaw Khrihsaabuv chunglie a aw li riypata ruena a pipa a cuo.
1
1 Khazing changtaapanote 1:1 Gk Sii hne Zingsuv Khrih lucuotuv ta a cuopa kama Paul ta caa ica paphya. Kama ca Khazing a tlawpa tie ta zangna hne biehmisipa ama pachangna lie Khazing ciyzaana hne ama lethaw hryly riypata pathliepa tana i cuo.
2 A hang buo lipa Khazing ta capa chuozaa hringna anguopuona ca cuo hruothu hluo taata biekuo ciepa cuote,
3 a cuo aa de ningta a phupa a cuo. Capa thuophaabie phu riypa cata Khuotuv Khazing biepina haata zang pata re pipa i cuo.
4 Zangna suokha a hrawna chunglie i saata hmisi ta a cuopa Titas'a luo hingpa caa hing ica paphya.
Paa Khazing hne Khuotuv Khrih Zingsuv'a taata vihnyinanote 1:4 Hluo vie caa-uv lieca vihnyina, ngiechina hne* a ta. hne diena ca na cunglie aw mangsue.
5 Krit lie ica chi siy napa ca ica changpa haakhata, hrie riypata a ngaa kaliepa re kha a phata tah na hrie riypa hne khy ting ta Khrihsaa uvthyi chi riypa khatana a cuo.
6 Khrihsaabuv luochiytuv pakha ca, syisaa riy a hnyi lipa, napuv pakha dyi a hnyipa, a saata zaw zangtuv cuo'a yite anuopaana luota thuochi a phyapa hne ri a ngie lipa cuo'a vayi.
7 Khrihsaabuv hruetuv ca Khazing re lie mangchiykingkaatuv a cuo pahaata, syisaa riy a aw lipa a cuo aa. Ama ca a hruotlepa, a pathiy pachangpa, sahmaa a pariy thepa, a hruopa hne a karuo awpa cuo'a vyi.
8 Cuorasala, ama ca khyche a duepa, phana a khingpa, a singvaapa, aa dangpa, Khazing'a luo te a maapa, ama hne ama a uv khupa a cuo aa.
9 Ama ca pacuvna aa hmuopa kha a cusa pata a patuv'a te, aa hmuopa phungluo kha a pacuv khupa hne aa hmuo lipa pacuvna kha a i khutuv ta a cuo aa.
10 Tahematapakieca a du a hmuopa cawsaa hluvpuv, thlahnena a hnyi lipa bie a ripa hne a hanghiepa hluvpuv aw yite, a hlyi ta vangdaw a tepa tie chung taata ama cuo.
11 A dieta tah aw yi se, tahematapakieca, aa hmuo li pata tuokaa hmungkhingna vuota pacuv riypata a pha lipa kha pacuv yite chungkhue bangkhuo ngie ama pachi.
12 Iema chunglie pakha ta a cuopa ama profet pakha ta,
"Krit ming ca a hang paripa,
saruopa haata cawsaa pha lipa,
a thaathiypa hne ning a rangpa
tana ama cuo," a ta.
13 Capa tehtekhuona ca aa hmuopa tana a cuo. A hmuopa zangna ama hnyi the riypata capa kawlie ca khuosa ta chuo tie yi.
14 Judah ming phungpa hne biehmisipa a dupa tie nawbie kha siysaa ri li pata aw tie ung.
15 A pathepa tie cuota hmangting hing pathe te, a rapa hne a zang lipa tie cuota ca a pathepa aw vyi. Ama pathiypalung hne ama chiephathleduona khana a ra tli.
16 Iema ca Khazing kha ma pachang ama ta raalaa pata, ama tuesana khata ama kha ama thaw. Iema ca duv aa chiypa, ri a ngie lipa, hne tuokhaapa hmangphapa hne tahmuo aa tla lipa tana ama cuo.