4
1 Khazing hmielie hne, a hringpa hne a thiypa bangkhuo bie a ripa riypa Khrih Zingsuv ming hne aa vawna riypa hne a pena kawlieta khuopuv ta ica pasu.
2 Thuophaabie kha phu tie; cuo aa raw zaw aa raw li zaw ci li pata phu tie; ama palung sie riypata chang yi, chuo yi, thaazuo pi yi la palung pasiysa pata pacuv tie yi.
3 Tahematapakieca cawsaa ta aa hmuopa pacuvna kha ziy li pata iema khingna haata a pacuvtuv kha ama huvna cuo hne,
4 biehmisipa naathlie khing li pata a palise'a yite phungpahlaapa naa ama thliena cuo kha a vya pha aa.
5 Nama dyi ca, singvaasa pata aw la, ruvnaana kha ang law la, thuophaabie phuna re kha hrie tie. Na resungnaapa kha a phasa pata hrie pazue tie.
6 Kama ca, bienatluophie lie ama lyipa hriykhungrina tiy haata i hringna pina cuo a vya tlung tli. Hing chuelyi hringna i sisena cuo a pha tli.
7 Rietuvna kha a phasa pata i patlung tli. A ruo azuena lie kha a chuona te i ruo tli. Zangna kha a cusa pata i patuv tli.
8 Ata taahing taca a dangna lakhuv kha chipa pata cuo ang te, capaca aa dangpa bieripatuv byi, Abyipa ta ningchuoningpa thueta ina pi aa. Kama dyi cuo li pata ama aa vawna riypa a ngietie li pata a huopa bangkhuo zaw kha a pi ra'a yi.
9 Kama'a luo a catlisa pata a vaw riypa kha a zue tie.
10 Tahematapakieca Demas ca hing chuelyi hing a tlechuo vie nakawta Thesalonika luo ina sise tli. Krese ca Galatinote 4:10 Hluo vie caa-uv lieca Gaul* a ta. luo na sise te Titas ca Dalmatia luo ina sise.
11 Luka dyina kama'a lie a aw. Marka kha a vya chiyle tie, i resungnaapa hriena lie a thlahnesapa tana a cuo.
12 Taikhikas kha Efesa luo i paphya.
13 Naa vaw thueta Troas khy Karpas'a lie i chi siypa buohryipasiypa kha na vya phya tie. Caa-uv hne a hlyi ta savang caa-uv kha vya maw lie ciy.
14 Thiyhring a patlepa Alexander kha ruvnaana lepuv naa pi; Abyipa ta a tuena haata a thung aa.
15 Nama zaw a raaring tie, tahematapakieca ma ripa bie kha khuopuv ta a dupa tana a cuo.
16 A yikhanapa bie ina ripa ning yi ca ahungtahmuo naa daakhyi vayi; inaa ruose diy yi. Khazing ta suena ta ripa hrue kha yi se.
17 Cuorasala thuophaabie kha tluotlingsa pata i phu khu riypa hne Jentail ming bangkhuo ta ama thyi khu riypata Abyipa ta na aw khyi te thaazuo ina pi. Cahaa cata kama ca chingde pakaa taata khuopa i cuo.
18 Abyipa ta pha lina bangkhuo chung taa khata na khuo'a te, a vuoruo pena chung luo ca inaa ngiekhyi aa. A cunglie rungnaana chuozaa ta aw mangsue.
19 Prisilla hne Akuila hne Onesiforas chungkhue tie kha ama kuv i patuv yi.
20 Erastas ca Korin khy lie a ngaa te; Trofimas ca a pasa cangta Miletas lie i thuse.
21 Thlasiypaa hluo ta naa vaw khu riypata a zue tie. Zubulas, Pudens, Linas, Klaudia hne, uvnu hne sieta zaw bangkhuonote 4:21 Gk Uvnu zaw bangkhuo na nama kuv caa patuv yi.
22 Abyipa ca na thlaapa hneta aw thi se. Vihnyina ca niema bangkhuo cunglie aw mangsue.note 4:22 Hluo vie caa-uv chekha lieca Amen* a bechiypuo kalie.