2
1 Cuorasala nama ca, aa hmuopa ziyphung hne aa tlapa pacuvna kha pacuv tie.
2 Capaa uvthyi vie tie kha a ruepacuo thepa, a hmuochuopa, a ruedaw thepa, zangna aa hmuopa a hnyipa, duena a hnyipa hne ang khuna a hnyipa ama cuo riypata chang tie yi.
3 Cahaa cata canung uvthyi vie tie zaw kha hringcuozyazaa lie pa-uvsathyi aa tlapa, malie thuo a pachipa hne dang li pata a aw khu lipa ama cuo li riypata chang tie yi. Khaapa hingma a pha tapa kha amaa cuv riypata chang tie yi.
4 Iema ta canung kungnu vie tie kha navaapa a duepa, saata zaw a duepa,
5 iema hne iema a uv khupa, hringzya pathepa a hnyipa, ingchungkhue a uv khupa, malie kaw a pacuopa, a navaapa a ciyzaapa, ama cuo riypata chang yi se. Cakiedyina Khazing bie hing a thuochi li pata a aw aa.
6 Cahaa cata capaa kungnu vie tie zaw kha iema hne iema amaa uv khu riypata pasu tie yi.
7 Nama hrahring kha rephapa lie a mangpuo a tla riypata aw la, na pacuvna lie zaw yi kha a hmuochuosa pata pacuv tie yi.
8 Syi khu li riypa biephapa kha hmuo la, kiema malie a dutuv tie kha ma thuochi ri riypa khaahmuo ama hnyi li nakawta ama nang a zaa aa.
9 Sii tie kha ama ziy zaw a ciyzaapa hne ama palung a patluopa ama cuo riypa hne bie ama palie li riypata chang tie yi.
10 Acawta tah nuparuvpa tue li pata zangtluo aa tlapa ama cuona kha paluo sa yi se. Cakiedyina Khuotuv Khazing pacuvna kha hmangting lieta a papuvthe sapa ama cuo aa.
11 Tahematapakieca Khazing vihnyina ca cawsaa bangkhuo khuona cuota aa luo tli.
12 Ca vihnyina cata kiema kha Khazing siysaa ri lina hne chuelyi khingna kha thaw pata hingpa ma chuo chunglie hing kiema hne kiema a uv khupa, aa dangpa, hne Khazing a ciyzaapa ma cuo riypata malie a pacuv.
13 Cahaa cata kiema ca thluechiypa anguopuona hne a lesyipa Khazing hne Khuotuv,note 2:13 Or Kiema Khuotuv Zingsuv Khrih rungnaana aa luo riypa kha ma huo nguoluo.
14 A pha lipa bangkhuo taata kiema kha a thla riypa hne ama cuo hrahring ta a pathepa cuo riypa hne hmangpha a tue khingpa ama cawsaa zaw cuo riypata kiema cuota a hringna a pipa ca Zingsuv catana a cuo.
15 Hingpa kaw hing pathyisa tie; nawhnyinanote 2:15 Gk Nawbie hneta pasu yi la pacu sa tie. Ahungtahmuo ca mangbung kha yi se.