4
1 Ziy zaw, nama sii tie kha aa dangpa hne a phapa ta mangsang tie ung, tahematapakieca niema zaw vuoruo lie ziy nama hnyi rapa kha nama pachang.
2 Thlaa chuo kha temaa ungla, pathiypalung a hy syalya khata palungtluona bie hluona cangta pazue pari ung.
3 Khazing ta thaw i tla hnuochuopa a bie cuota cuose, ma phu riypa Khrih bieparuv cuota cuose, ingchiy malie a pahawpa riypa hne
4 i phu riypa zaa ta a siesa pata i phu khuna riypata kiema cuo zaw kha thlaa chuo tie ung.
5 Zangtuv a cuo lipa hrawlie kha singvaasa pata atu-adaa ungla cuopha nama hnyipa kha muo hnyisa pata hmuo tie ung.
6 Nama bie ca naathlie a nuopa hne a thlung-iepa cuo sala cawsaa bangkhuo kha tuokhaata i chaw kiema a pha aa tapa kha a zue tie ung.
7 Taikhikas ta i kaw bangkhuo kha aca chang'a yi. Ama ca Khrih chunglie i duepa uvnu, zangtluo aa tlapa Khazing rehrietuv, hne i rehriehnepanote 4:7 Gk I rehriehne sii ta a cuo.
8 Tuokhaatama ma aw tapa kha nama pachang na riypa hne niema thaazuo pi riypa hrahring khatana ivya pathlie pata a cuo.
9 Ama ca zangtluo aa tlapa hne i duepa uvnu, niema chunglie pakha ta a cuopa Onesimas hne tana aa vaw aa. Hinglie ta achiy-acuopa hmang bangkhuo kha aca chang'a yi.
10 Thaw i tlahnepa Aristarkas ta nama kuv aca patuv yi; Barnabas tuvpaapa Marka zaw ta nama kuv aca patuv yi. Ama kaw kha ica chang tli yi. Niema'a luo a vaw kieca za cuhluo mang ung.
11 Justas ama tapapaa Zingsuv zaw ta nama kuv aca patuv yi. Iema dyi hing Khazing pena cuota i rehriehne zaw hrawlie vangdaw a tepa tie cuo yite, i hnaa naa panguotuv ta ama cuo.
12 Niema chung taata pakha ta a cuopa Epafras, Khrih Zingsuv sii a cuopa ta nama kuv aca patuv yi. Niema kha ruena a kysa pata Khazing khingna bangkhuo kha a tlingsa pata nama pachang riypata nama cuota thlaa a chuo pari.
13 Ama ta niema cuota hne Laodisia lie a awpa tie cuota hne Heirapolis lie a awpa tie cuota khuopuv ta re a hriepa kha kama ta tehte i khuo khu.
14 Ma duepa siybyi Luka hne Demas ta nama kuv aca patuv yi.
15 Laodisia lie a awpa uvnu hne sieta zawnote 4:15 Gk Uvnu hne sieta zaw cuose, Nimfa hne a ing lie a pungpa khrihsaabuv tie cuose bie ivya changpa yi kha na changpa pachaa tie ung.
16 Hing caa hing niema'a lie nama ri khu taata, Laodisia khrihsaabuv lie zaw kha ri ungla, Laodisia taata aca vya paphyapa yi caa zaw kha ri tie ung.
17 Cakhutaaca, Arkhipas kha, "Abyipa ming ta naa lapa re kha palang mang la," tapata za chang tie ung.
18 Kama, Paul ta hing bie-achangna caa hing kama kuv ta i cape pata a cuo. I thaabuoliriy hing maw kha ung. Khazing vihnyina nama cunglie aw mangsue.note 4:18 Hluo vie caa-uv lieca Amen* ama bechiypuo kalie.