THESALON
Thesalon Khrisaabuv'a Luo Paul Caapaphya Suokhana
Thesalonika khy hing Rom acuzaa ta a uvpa Masidonia pe khypuv ta a cuo. Filipi khy kha a pya se khu taata Paul ta hingpa khy lie hing Khrihsaabuv kha a padaa. Cadyiseca, Judah biena luo a palung a chiypa mingphang hrang tie hrawlie thuophaabie ri te ama cuhluopa kha Judah ming ta hmung yite ama hie a tlie. Cacuonakawta Paul ca Thesalonika khy taakhata Beria khy luo hruohra ta ama pasi sa. Ahnang taa, Korin khy a pha khutaa khata a rehriehne a cuopa Timote'a taakhata Thesalonika Khrihsaabuv kaw kha a thyi.
Paul ta Thesalonika Khrihsaabuv'a luo a yikhanapa caa a paphyapa yi hing ama palung cahra sa riypa hne ama zangna lie a cusa pata amaa daa na riypata a capepa tana a cuo. Zangna hne duena ama hnyipa kawlieta palungtluona a hluo yi. Iema'a lie a aw ningta a hringzya kha a thyi pakhaa riypata a chang yi. Cakhutaata, Khrih a vaw pakhaa riypa kaw hne aa patuv pata biehiehriyna kha a palie yi. Capa biehiehriyna tie ca: Zingsuv a vaw pakhaa hluo ta a thiypa tie hing Zingsuv a vaw pakhaana ta a chiykhyipa chuozaa hringna hing ama cu ra the'a ma? Khrih hinghaw khatiy thuema a vaw aa? tapa zaw hingta a cuo. Khrih a vaw pakhaa riypa anguopuona hne nama huopuopa hingta re kha a phasa pata hrie tie ung, a ta yi.
1
1 Paul, Silas hne Timote ta, ma Paa Khazing hne Abyipa Zingsuv Khrih huopa ta a cuopa, Thesalonika khy lie a awpa khrihsaabuv tie'a luo kha caa maca paphya yi.
Vihnyina hne diena ca nama cunglie aw mangsue.
2 Niema bangkhuo kawlieta Khazing kha ci li ta pathuosa pate thlaa maca chuopa pari yi.
3 Zangna ta nama hriepa re, duena ta nama hriepa re hne ima Byipaapa Zingsuv Khrih'a lie a cusa pata namaa nguopuona zaw kha maa thyi pari.
4 Tahematapakieca, Khazing ta duepa uvnu hne sieta zaw,note 1:4 Gk Uvnu zaw ama ta acaa tlawpa yi kha ma pachang.
5 Tahematapakieca, niema'a luo thuophaabie ma vya chiykhyipa hing bie dyi ta cuo li pata cahrana hne Thlaapa Pathe hne biehmisipa a cuopa kha pachangpasiena hneta a cuo. Niema cuota nama hrawlie ma aw ning kha tuokhaapaapa cawsaa tama macuo tapa ca malie nama pachang.
6 Kiema hne Abyipa kha malie a mangpuo ung cate hrisaathieruena chunglie a cuo raalaa pata thuophaabie kha Thlaapa Pathe ta aca pipa yi alawna hneta nama cuhluo.
7 Cacuonakawta niema ca Masidonia hne Akhaia lie a awpa zangtuv tie cuota a mangpuo tluo a tlapa ta nama cuo.
8 Tahematapakieca, niema'a taata a vya hrawpa Abyipa bie ca Masidonia ruo hne Akhaia ruo luo dyi kha cuo li pata ruo ting khata a ze te, Khazing nama zangnapa ca ama pachang nakawta capa kaw ca kiema ri hmuo a hu va tli.
9 Tahematapakieca ama pe lie a awpa tie khata niema hrawlie ma aw ningta tuokhaatama malie nama cuhluo tapa kaw hne kuvtuezuv abiena taata Khazing'a luo namaa vya palina kaw hne a hringpa hne a hmisipa Khazing re nama hriena kaw cuose,
10 thiyna taata pathu pakhaapa hne a vaw riypa Khazing hihaana taata malie a khuotuv a Saacapaa Zingsuv vuoruo taata aa zuv riypa zaw nama huona kaw kha malie ama chang.