31
Hezekia Caung:pa" Thung" We' Sin: Yang: Dam: Nyhang" Ru
1 Poe bin thao re Israel byu qe alhab' mo, wa Yuda mung" mae" vogaung: khao: ngo" khyo phao: lo" mung: laugbaui zang baung: jham re deim" khyang: pye' mung: Ashe so myhi" nho: aso: jham re thaui: khyang: pye'- phan jham we' taung bug so jham re caung:pa" ra" jo, qo jham re phyo' khyo" pye' ako". Yao: bam wa dang: ra" Yuda mung" geim" mae Benyamin Ephrim Manashe mug:myid jham mae re: daru: za: kad' ako". Ai: thao re yao: bam yham phao: lo" ako".
2 Kho:kham Hezekia wa khinjaung qe we' Levi byu qere phung: re dam: phung" byid: mung: yao: bam yaug khao: ngo" nho: mau" rere: sho' sho' za: jaung byid' ra". Ai: mau" jham mae ngaui" xeim: phad' ngaui" ra" mau"- zam" khug: ra" xeim: ngaui" byid' ra" mau"- Caung:pa" Yham mae caung:pa" rumae bobo: ra" mau"- caung:khin" mau"- Caung:pa" Yham jeju caung: mau" aja: ja: jham bobo: ra".
3 Yao" nho: yao kyaung" cad' kyaung" mae" ne, seim myi" thao khao: ngo" xeim: phad' ngaui" nae" xeim:- Dugno: Ba mae qhaug' byid: nae" xeim: Lho" Xin: poe gatau: poe mae qhaug' byid: nae" xeim: qhid' mae" Asang: tarha" yang mho' ra" gug'nyhug' jham re byid' ra".
4 Aitho' mago" kho:kham pho" wa- khinjaung qe we' Levi bam wa Asang: Tarha" mae mho' to" ru we' dakhyo: yao: bam: ayo, alhab' re qo" byid: genae" qhid' mae" yao: bam qo" yu: ang: ra" ngaui" xeim: jham re cili" genae" qhid' mae" Yerusalem byu qere ta" ra".
5 Amyin" khyo" ke' we' Israel byu qe wa yao: bam nho: lho" thao" ra" gaug we' myho' thao" ra" sabyi qang:- gai: thao" ra" zhanlun xau- byoyhid- yo mae" thug' ra" ashi: jhaung qhu" jham cili" byid' ako". Yao: bam wa yao: bam the' gu: ja: khao: ngo" mae" xebam dabam rere: cili" byid' ako".
6 Yuda vogaung: jham mae na ko" ra" mung" byu qe alhab' wa yao: bam: nung:- yao jham mae" xe bam dabam she: li" ako". Yao: bam wa yao: bam: Mao"So Asang re qhaug' byid' to" ra" jhaung qhu" myo: sho' rere: vin: li" ako".
7 Jhaung qhu" jham wa lho" sam khye' ein: khye' mae joe" qhid: li" mung: thao lho" byid khye' geim" joe" sho' xo' yang: joe" li" ra".
8 Kho:kham Hezekia we' yao" gyezug: qe wa khonho" qhaug' byid' bam: to: va" rure the' myao gelao" yao: bam wa Asang re caung:khin" mung: yao" Israel byumyu" qere shaman" byid' ra".
9 Kho:kham wa khinjaung qere we' Levi byu qere ai: jhaung qhu" jham: khyo we' sin: yang: myid' ra" au: re-
10 Zadog nho: myid:zo: Khinjaung Yin" Azaria wa kho:kham re- mung" byu qe yao: bam: jhaug qhu" re Caung:pa" Yham khyo cili" ko" ra" ayo, mae"- zo: nae" laug sho' qo" mung: myo: sho' je: ashi". Asang wa yao" byumyu" re shaman" byid: va" ruyang ngonhaung" cegu: alhab' re qo" bam va"- ga: ta" ra".
11 Kho:kham amyin" re cao" mung: yao: bam Caung:pa" Yham myidgaung mae jhi kad' ako".
12 Amung: jhaung qhu" jham alhab' we' xebam dabam jham re aijham mae gug: gug: ke' to" ako". Yao: bam wa Levi byu Konania ga: mang yaug re au: jhaung kad' nhao mung: yao:nhaung: Shimi ga: yaug re bao" thaug' yaug khyo" mau" byid' to" ako".
13 Yao: shid' nhae tao: o mae mau" zaui: nae" Levi byu daxe yaug san: to" ako". Ai bam wa Yehie- Azazia- Nahad- Asahe- Yerimod- Yozabad- Elie- Ismakhia- Mahad- Benaia bam ngad: ako". Cegu: alhab' re kho:kham Hezekia we' Khinjaung Yin" Azaria nho: kheim: so' qao: mae kad' ako".
14 Caung:pa" Yham ba thug' shad' kham: gug:gam au: jhaung ngad: ra" Levi byu Imna nho: yauggai zo: Kore wa Asang re qhaug' byid' ra" jhaung qhu" jham re khae: yu mung: aijham re gae: byid' ra" mau" mae au: jhaung ngad: ra".
15 Khinjaung qe na ko" ra" gatau: vogaung: jham mae Levi byu gaje qe ngad ko" ra" Edin- Miniamin- Yeshua- Shemaia- Amaria we' Shekhania bam: yang ce: mau" mae jhaug' zaug za: yao: re bao" thaug' byid' ako". Amyu" kaung khyo" mangad: lo: yao: bam: vin vo; ra" mau" re cao" yang: yao: bam: Levi cao: qere zo:ve nyang nyang za: yao: bam gae byid' ako".
16 Caung:pa" Yham mae yao: bam: mau" re cao" yang ba khao: ngo" vin vo; nae" qo qo" ko" ra" mo, apyad sam xe zin bo mo, we' ai tho' je: qi" ra" yauggai qe alhab' re yao: bam: yang gae bam gae byid' ako".
17 Khinjaung qere wa yao: bam: mau" jham re amyu" kaung khyo" jaung byid' ako". Amung: shid' xe zin bo mo, we' aitho' qi" ra" Levi byu qere wa yao: bam: mau" re mau" zaui: phung: khyo" yang jaung byid' ako".
18 Yao: bam re yao: bam: yham sang myhi" qe- zoshao re- bona mo, we' daga" mang japhin: gaug: to" ako". Pe"mung:ga"re yao: bam: gyang" lho" ra" mau" re vin vo; nae" qo: ra" ayo, khoyo, re ngad ngad jin" jin" ngad: jo, nae" qhid' mae" ngad: ra".
19 Khinjaung qe: phaung mae Arun nho: myid:zo: qere jaung byid' to" ra" vogaung: jham mae na mo, mangad lao"- ai: vogaung: jham sang: ra" mhin: gyo, jao: mae na mo, mae khinjaung qe: yham khaung jham mae" yauggai qe alhab' re we' Levi kaung mae mang bo: ra" mo, yaug khao: ngo" re zo:ve gae byid: nae" byu jham na: ako".
20 Kho:kham Hezekia wa Yuda mung" geim" alhab' mae jo: ru we' yao" Mao"So Asang re ngaui nhao: ra" mau" kad' ra".
21 Yao: wa aung myaug: yaug ngad: ra". Pe"mung:ga"re Caung:pa" Yham qhid' mae" yao: kad' ra" mau" ja: khao: ngo" we' Tarha" re phug' cao" rumae yao: wa aung khug nhag' lam: bin sho' jhaug' zaug: ru we' yao" Mao"So re kao bau yang: ngad: ra".