32
Asuri Byu Qe Yerusalem Re Kyaug' Nhin" Ru
(2 Kh 18.13-37; 19.14-19, 35-37; Esa 36.1-22; 37.8 -38)
1 Cegu: boe" mung: kho:kham Hezekia Asang re jhaug' zaug za: bin: caung da" byid: thao- Asuri kho sin" Senakherib wa Yuda mung" khyo jhin" vao li" ra". Yao: wa gyetab vogaung: jham re vang" ci mung: vang jham re yao: bam thaung" phung" mung: khyo kad' lai: ye: nae" yao" gyetab re amyin" byid' ra".
2 Senakherib wa Yerusalem rere: gyekhe' nae" seim" to" rure ba lao"-
3-4 Yao: we' yao" gyezug: qe wa Asuri byu qe Yerusalem khyo te' li" gelao"- yao: bam qid dajhid' re: maqo" losho' tam" pye' nae" qhid' mae" vogaung: taung gaung shad' khyo qid byid' ra" khyo re phyid' pye' nae" myid: phyid' ako". Gyezug: qe wa vobyu qe myo: sho' mo, re jhui" thug' lo" mung: qid mayug: thug' lo" lo nae" qhid' mae" qid thug' alhab' re jhui" jhid' pye' ako".
5 Kho:kham wa vang re dam: byao- ai: dao mae gyebyu zaung kad'- taung gaung shad' mae" vang re zao yang: vogaung" nho: go jham re qam: bo nhao: ra". Aitho' mago" Yerusalem axug' nho: ba thug' shad' mae myid bam" to" ra" myidgaung mae zao: to" ra" gye go jo, qo jham rere: dam: nyhang" kad' ra". Yao: wa lhae tad' we' go jham myo: sho' re kad' ra".
6 Yao: wa vogaung: mae yauggai qe alhab' mo, re gyezug: qe: amyin" qao: mae na nhao mung: vomo" kham: mae" shava jao: mae yao: bam zang" ham: na genae" qhid' mae" amyin" khyo" ra".
7 Yao: wa yao: bam re- sulhe: myid ke' ci mung: vae" vae" na ge,. Asuri khosin" re we' yao: jhui" ra" gyetab re dagyaug ge,- yao" shad' mae tho' ngonhaung" shad' mae qam: je: bo:-
8 Yao: wa xao su byu: qam: so' qo" ra". Ngadqere: ngonhaung" wa ngonhaung" re bao" thaug' nae" we' ngonhaung" gye poe re khe' byid: nae" ngonhaung" Mao"So Asang qo" ra"- ga: ta" ra". Mung" byu qe wa yao: bam nho: kho:kham pho" dao" yang qam: gyo" qo" ako".
9 Dayo, kyo thao re Senakherib we' yao" gyezo: qe Lakhi mae na: jo, shiko" au:- yao: wa Hezekia we' Yerusalem mae yao: we' daga" na ko" ra" Yuda byu qejhao"-
10 Ngo Asuri kho:sin" Senakherib myid' ke' ra" vang" to" ra" Yerusalem khug mae mung" byu qe wa pe" re lam yang: na: jo, ko" i?
11 Naonhaung" Mao"So Asang wa ngonhaung" nho: qam so' lo, mae" naonhaung" re khyad' yu: li" nae" ga: Hezekia wa naonhaung" re ta" ra". Ngadqere: Hezekia wa naonhaung" re mhug' pyag' na: ru ngad: ra". Naonhaung" re vae: moe; qid shab' yang: shid: nhao: li" nae".
12 Yao: wa Asang caung:pa" ra" jo, qo re we' phan jham re phyo' pye' yaug ngad: ra". Aimung: Yuda we' Yerusalem mung" byu qere caung:pa" nae" we' phan dalam: mae za: sheim nae pyo: ja: xau phad' ngaui" byid: nae" ta" ra".
13 Gatau: mung"dan: byumyu" qere nga" phug' pho" qe we' ngo: yang pe" ru: kad' pye' lai: lo: rure naonhaung" maba ko" i? Gatau kho: byumyu" qenho: so jham: yang yao: bam: mung" byu qere Asuri khosin" nho: lo, mae" khyad' yu: qu" ra" i?
14 Aimung"dan: jham alhab' nho: so jham mae" khoso: yang ngonhaung" lo, mae" yao: bam: mung"dan: re khyad' yu: qu" ra" i? Aire naonhaung" so wa naonhaung" re qo" khyad' yu nae" ein: naonhaung" re pe" yang myid: jhao nhao ko" i?
15 Ana" Hezekia yang naonhaung" re da mhug' pyag' nhao ge- ai khyo naonhaung" re dajhui" nghung: nhao ge,. Yao: re dalam" ge, kho: mung"dan: mae" so re: Asuri khosin" dayaug: lo, mae" re: yao" mung" byu qere makhyad' yu: qu" ngad: ra". Gaigai: yao: ce: naonhaung" so wa naonhaung" re qo" khyad' yu nae" i? ga: lagyo: nhao yang: dao: pyang: ke' ra".
16 Asuri gyezug: qe wa Asang: daui daui yaug Hezekea we' Mao"So Asang: khyo re je: xo: ra" dao: lhao" re: ta" ako".
17 Khosin"" pho" tung" ra" vhin tung" wa Israel nho: Mao"So Asang re ngag; thaug' ra". Ai: vhin tung" mae- byumyu" mung"dan: qe: so jham wa yao: bam: mung" byu qere nga" qam: so' mae" maqo" khyad' yu: qu"- Hezekia nho: so re yao" mung" byu qere nga" lo, mae" makhyad' yu nae"- ga: ta" to" ra".
18 Gyezug: qe wa ce: dao: re kyaug' nhin" nae" we' vogaung: vang dao mae na: jo, ko" ra". Yerusalem byu qere byo lae" nhao nae" qhid' mae" Hebre myan" khyo" hug' ta" ako". Airu: kad' ru wa vogaung: re laui laui za: qo" sang: yu nae" qhid' mae" kad' ru ngad: ra".
19 Yao: bam wa byu xao su qe: lo, yang kad' to" ra" gatau: byumyu" qe: so jham: khyo re yao: bam ta" ruru: Yerusalem mae" Mao"So: khyo rere: airu: ta" ako".
20 Ailao" Hezekia we' Amoz nho: yauggai zo: lapa Esaia Mao"So re akyu" mho' mung: bao" thaug' yu nae" yao: re hug' yao: ako".
21 Asang wa gyezo: qere we' Asuri gyetab mae" gyezug qere se' ra" mug: lagyo: dayaug re nhao: ke' ra". Airumung: kho:sin" pho" wa Asuri mung" khyo qho' phau: yang: tug' lo" ra". Daba mae yao: wa yao" so caung:pa" yham mae na: jo; au: yao" yauggai zo: qe damyo" wa yao: bam: shae pyang" yang yao: re se' pye' ako".
22 Ceru: kad' yang: Asang wa kho:kham Hezekia we' Yerusalem vobyu qere Asuri khosin" Senakherib nho: qam: so' mae" khyad' yu: ra". Yao: wa yao: bam: gyevo gaje qe: lo, mae" re: khyad' yu: ra". Yao: wa amyu" byu qere yham kyo: cao: mung"dan: alhab' we' ngaui pyo: yaug yo za: na nhao: ra".
23 Ai: ayo, mae" byumyu" mung"dan: alhab' Hezekia re nga: yhe' byid: nae" qhid' mae" mo, byu qe myo: sho' mo, wa Yerusalem khyo joe" li" mung: Asang re ngaui" xeim: cili" byid: mung: Hezekia re jhaung qhu" jham cili" byid' ako".
Hezekia No: Ru We' Ngad Beim" Ru
(2 Kh 20.1-3, 12-19; Esa 38.1-3; 39.1-8)
24 Ceyo, mae kho:kham Hezekia wa no: li" mung: alaug laug shid: ra". Yao: wa akyu" mho' mung: Asang wa yao" no gai nae" aso: yao: re byid' ra".
25 Ngadqere: Hezekia wa Asang yao" qhid' mae" kad' ra" jeju re qhu" byid: nae" rure saung" ngad beim: yang: Yuda we' Yerusalem wa ai: qhid' mae" qug: khai: dayin dayo: kham zo" ako".
26 Ngadqere: lo" thao" mae Hezekia we' Yerusalem byu qe wa yao: bam yao" gaung re nhag' lam: nyham: khyo" ako". Aimung: Asang wa Hezekia shid sho' mung" byu qere qobo dae mabyid: ngad: ra".
Hezekia Nho: Jo, Nho" We' Gyag: Ra" Khyo
27 Kho:kham Hezekia wa jo,nho" gyai qo" li" ra". Yaug khao: ngo" yao: re nga: yhe' byid' ako". Yao: wa yao" qhang- ngaui- phug' de; ra" laug- xeim: nae pyo: cid'- go jham- gatau phug' de; ra" zai jham- to: nae" zai to: jhi kad' ra".
28 Aitho' mago" yao" gaug- sabyi qang: zhanlun xau to: nae" jhi jham- yao" nung: jham: qhid' mae" yham jham- yao" nho: qhid' mae" khyae jham kad' ra".
29 Yao jham cegu: alhab' tho' mago" Mao"So wa yao: re yao jham- nung: jham we' gatau jo,nho" myo" sho' byid: mung: yao: wa gatau: jo,nho" qo" mung: yao: wa vogaung: myo: sho' re te" ra".
30 Gihon qid thug' yug khyo: re tang" pye' mung: qid re myid khug qid khyo: khyo" Yerusalem vang akhug khyo pa" yhug' ke' yaug wa kho:kham Hezekia ngad: ra". Hezekia wa yao: kad' ru ja: khao: ngo" mae aung myaug: ra".
31 Babelon mae" mung"dan: lagyo: qe lhao" re: mung"dan: mae boe" ra" gakai: lai boe" ra" khyo re li" myid' ca: qu" ako". Mao"So wa yao" ave, re jham" qu" nae" qhid' mae" Hezekia re yao: nung: khyo" kad' nhao: to" ra".
Hezekia Eib: Ra" Ayo Thao" Lo" Ra" Khyo
(2 Kh 20.20-21)
32 Kho:kham Hezekia kad' ra" gatau ja: khao ngo" we' Asang re kao bau: ru jham re Amoz nho: yauggai zo: lapa Esaia nho: qhu" lho mae we' Yuda we' Israel kho:kham qenho: mhomyi: paug' mae tung" xam" to" ako".
33 Hezekia wa shid: lo" mung: kho:kham lab tho' mae" dau mae nyhab' to" ako". Yuda byu we' Yerusalem byu qe alhab' wa yao: shid: au: qi: sho' nga: yhe' byid' ako". Yao" yauggai zo: Manashe wa yao" khu mae kho:kham xo' kad' ra".