30
Lai Co' Poe Qhid' Mae" Seim" Nyhang" Ru
1-3 Mung" byu qe wa dau ga" ra" ayo,- lho" sao qhid' khye' mae Lai co' poe re maqo" kad' ngad: ako". Pe"mung:ga"re caung:pa" thung" khyo" san sin" ra" khinjaung qe malaug: na ko" ru we' Yerusalem mae mung" byu qe myo: sho' mazang" phaung: na geyang: ngad: ra". Aimung: kho:kham Hezekia- yao" gye zug: qe we' Yerusalem vobyu qe wa ai: poe re lho" shid' khye' ein: khye' mae kad' nae" myid vang" mung: kho:kham pho" wa Israel we' Yuda mung" mae" mung" byu qe alhab' re dao: pyang: ke' ra". Yao: wa Ephraim we' Manashe amyu" kaung qere gakai: lai vhin tung" jham tung" mung: Israel nho: Mao"So Asang re nga: yhe' ra" Lai co' Poe re Yerusalem mae" Caung:pa" Yham mae kad' rumae li" boleim genae" qhid' mae" yao: bam re khai: ke' ra".
4 Kho:kham we' mung" byu qe wa yao: bam yaung: to" ra" mau" re ngaui: ako".
5 Airumung: yao: bam wa mug: am: shad' Dan mae" mug: thao shad' Bersheba joe" sho' mae" Israel byu qe alhab' re Yerusalem khyo zang" li" mung: Tarha" re cao" yang: Lai co' Poe re qhid' phyao: mae" tho' myo: sho' li" genae" qhid' mae" khai: ke' ako".
6 Lagyo: qe wa kho:kham we' yao" gyezug: qe: amyin" ci yang: Yuda mung" alhab' we' Israel mung" alhab' khyo o mae" tung" to" ra" khai dao: vin yang: ye" lo" ako". Khai dao: wa Israel byu qe we"- naonhaung" wa Asuri lo,mae" mung"dan: mae na: dang: jo,mo,ngad: ako". Ana" Abraham- Isag- Yaku nho: Mao"So Asang jhao" tug' lo geri:- ailao" yao: naonhaung" jhao" dam: phaug' lo: li" nae".
7 Yao: bam: Mao"So Asang re jhaug' mazaug ko" ra" naonhaung" phug' pho" qe we' naonhaung" mao:nhaung Israel byu qe we' dadau ge,. Naonhaung" qo" the' myao: ru we' dakhyo: yao: wa aibam re gyai thin sho' qobo dae byid' ra".
8 Yao: bam re" ru: nhag' lam: daqao ge,- Asang: mho dao: re kam" wa tae" gyo: ge,- naonhaung" Mao"So Asang: yang apyad ato mae gyang" lho" sho' kad' to" ra" Yerusalem mae" Caung:pa" Yham khyo li" geri:- amung: yao: naonhaung" re nhag' mayo: shao: yao: re caung:pa" ge,.
9 Naonhaung" wa Asang jhao" dam: tug' lo: geyang: ngad: re naonhaung" ba nam sang: cao: qere kyam: byu khyo" taung" jhui" lo" mo, wa yao: bam re nhag' khyag' mung: yao: bam re yham phao nhao: ke' li" genae"- naonhaung" Mao"So Asang wa nhag' khyag' mung: nhag' khyag' shogu yaug ngad: ra". Naonhaung" yao: jhao" tug' lo geyang: ngad: re yao: wa naonhaung" re lham: khae: yu: li" nae".
10 Lagyo: qe wa Ephrim amyu" kaung qenho: mug:myid mae" vogaung: khao: ngo" khyo ye: mung: mug: am: shad' Zebulun kaung qe, jhao" joe" sho' ye" ako". Ngadqere: mo, byu qe wa yao: bam re lham: qi: jung" pye' ako".
11 Yerusalem khyo" li" ko" ra" Ashe- Manashe- Zebulun amyu" kaung mae" mo, daqhae: aimae na: ashiko".
12 Mao"So wa Yuda mae re: mau" zaui: mung: kho:kham we' yao" gyezug: qenho: phug' cao" ra" khyo" yang yao" myid o: rure phug' cao" genae" qhid' mae" yao: bam: myid: phyid' rumae mung" byu qere myid qhan: nhao: ra".
Lai Co' Poe Kad' Ra" Khyo
13 Lho" shid' khye' ein: khye' mae mung" byu qe myo: sho' mo, Man" Make' Mug Poe kad' genae" qhid' mae" Yerusalem mae zang" ham: na: ako".
14 Yao: bam wa Yerusalem mae ngaui" xeim: ngaui" byid' ru we' sheim nae pyo: ja: xau ngaui" byid' ru qhid' mae Yerusalem mae ci: lo: ra" phan jham alhab' re yu: yu mung: aijham re Kidron lao: khaung: khyo pye' zaui: pye' ako".
15 Ai: lho" khye' daxe: byid ba ein: ba mae yao: bam wa Lai co' Poe ngaui" xeim: qhid' mae" yao nau" re se' ako". caung:pa" thung" khyo" masan masin" mo, khinjaung qe we' Levi byu qe wa gyai qho' phau: mung: yao: bam yao" gaung Asang re qhaug' byid' ako". Amung: ana" yao: bam Caung:pa" Yham mae ngaui" xeim: jham re qo" phad' ngaui" byid' ako".
16 Yao: bam wa Caung:pa" Yham mae" yao: bam: jo, qo jham re Mao"So: byu Moshe nho: Tarha" mae mho" to" rure cao" yang: jo, qo yu: ako". Levi byu qe wa ngaui" xeim: jham mae" sa: re khinjaung qere byid: mung: aibam re phan dao mae pyi" sheim" ako".
17 Mung" byu qe myo: sho' mo, wa caung:pa" thung" khyo" masan masin" geyang: Lai co' Poe yao nau" jham re yao: bam maqo" se' ngad: ako". Airumung: Levi byu qe wa aire yao: bam qhid' mae" kad' byid' gemung: yao nau" jham re Asang re qhaug' byid' ako".
18 Aitho' mago" Ephrim- Manashe- Isakha -Zebulun amyu" kaung mae" li" ra" myo: sho' wa caung:pa" thung" we' sin" ra" kyang" san rure makad' ngad: ako". Aimung: yao: bam Lai co' Poe re madau maang: ra" khyo" kad' ako". Kho:kham Hezekia wa yao: bam: qhid' mae"-
19 Ngonhaung" nho: phug' pho" qenho: Mao"So Asang we"- yao: bam caung:pa" thung" khyo" masan masin" mo, ngad sho' ngadqere: yao: bam: aung khug nhag' lam: alhab' yang nao re caung:pa" ko" ra" mo, re ni" gai shab: ru we' qobo khyad' byid: wa, wo"- ga: akyu" mho' byid' ra".
20 Asang wa Hezekia nho: akyu" mho' dao: re tau: byid' ra". Yao: wa mung" byu qere qobo khyad' byid: mung: yao: bam re dae mate' ngad: ra".
21 Yerusalem mae zang" ham: na ko" ra" mung" byu qe wa nhad' ba lam: lam: Man" Make' Mug Poe re gyai bau" ru we' kad' ako". Ba khao: ngo" Levi byu qe we' khinjaung qe wa yao: bam: qam: o: alhab' yang Asang re caung:khin" byid' ako".
22 Hezekia wa Asang re caung:pa" ra" mau" zo" mae yao: bam jhao ko" ruyang Levi qere khin" ra".
Shid' Lhang Ein: Lhang Poe Kad' Ru
Yao: bam nho: phug' pho" qenho: Mao"So Asang re caung:khin" mung: nhad' ba lam: lam: ngaui" xeim: bin: ngaui" byid: gethao-
23 Gatau nhad' ba poe dam: kad' nae" yao: bam alhab' myid: phyid' ako". Aimung: yao: bam wa ngaui bau" ru we' poe kad' ako".
24 Kho:kham Hezekia wa mung" byu qe se' zo: genae" qhid' mae" nung: jaung lo: dataung dau:- yao nhad' taung dau: re gae byid: mung: gyezug: qe wa nung: jaung lo: gatau dataung dau:- yao datug dau: gae byid' ako". khinjaung qe myo: sho' mo, caung:pa" thung" we' sin" ra" kyang" san: ru kad' ako".
25 Aimung: yaug khao: ngo" pyo" ako". Yuda byu qe- khinjaung qe- Levi byu qe mug: am: mae" joe" li" ko" ra" mung" byu qe- Israel we' Yuda mung" mae gyag maqui: na: jo,ko" ra" taung bug byu qe alhab' pyo" ako".
26 Yerusalem vogaung: geim" ngaui bau" ru byang" jo; ra". Pe"mung:ga"re Davi nho: yauggai zo: Sholamon nho: pyad mae" ceru" ru maboe" qu" ngad: ra".
27 Khinjaung qe we' Levi byu qe wa mung" byu qe qhid' mae" Asang mae" shaman" jeju mho' byid' ako". Mao"So wa yao" yham mug: khaung mae" yao: bam: akyu" mho' dao: re the' gyo: mung: aijham re khae: yu byid' ra".