29
Yuda Kho:kham Hezekia
(2 Kh 18.1-3)
1 Hezekia wa apyad shid' xe: ngo" zin re Yuda kho:kham boe" lo mung: yao: wa Yerusalem mae shid' xe: gug zin eib: na: ra". Yao: myhi" wa Zekharia nho: myiqe: zo: Abiya ngad: ra".
2 Yao" nho: phug' pho" kho:kham Davi ra" ave, re cao" mung: Asang re o ngaui nhao: ra" mau" re kad' ra".
Caung:pa" Yham Re Kyang" San: Pye' Ru
3 Hezekia kho:kham boe" thao ai: zin lho" sao qhid' khye' mae yao: wa Caung:pa" Yham kham: dung: jham re dam: phung" mung: aijham re dam: nyhang" byao: ra".
4 Yao: wa Caung:pa" Yham vang" ba thug' shad' mae khinjaung qe we' Levi byu daphung: re khai: zhang" to: mung: yao: bam re aimae dao: jhau: ra".
5 Yao: wa naonhaung" Levi qe wa- naonhaung" yao" gaung re kyang" san: yu mung: naonhaung" phug' pho" qe: Mao"So: yham re kyang" san: pye' ge,- Caung:pa" Yham re masan masin" boe" nhao: ra" ja: alhab' re aimae" yu: pye' ge,.
6 Ngonhaung" phug' pho" qe wa ngonhaung" nho: Mao"So Asang re jhaug' mazaug: ko" ngad: ra". Aimung: Asang re mangaui nhao: ra" mau" re kad' lo: ako". Yao: bam wa yao: re shapye' pye' mung: yao: na: ra" jo, qo re yao: bam nhaung thao" phaug' lo" byaug: ako".
7 Yao: bam wa Caung:pa" Yham re kham: pyid' pye' mung: myikaug' jham re se' pye' ako". Israel nho: Mao"So Caung:pa" Yham mae sheim nae pyo: ja: xau phad' ngaui" nae" we' phad' ngaui" byid' ra" xeim: jham ngaui" byid: nae" lhaui" pye' ako".
8 Ce: mathao mae Asang wa Yuda we' Yerusalem re nhag' yo: mung: yao" yang yao: bam re kad' ra" mau" wa qu" gyaug' sho' ngad mung: yaug khao: ngo" wa gyaug nin" ako". Naonhaung" wa cekhyo re nyang" za: ba: ako".
9 Ngonhaung" nho: pho" qe wa gyekhe' poe mae se' pye' qhug' ako". Ngonhaung" nho: yham sang myhi" qe we' zoshao qe wa kyam: byu khyo" taung" jhui" lo" ru qhug' ako".
10 Ana" ngo wa yao: ngonhaung" re nhag' jam: mayo: lo nae" qhid' mae" Israel nho: Mao"So Asang we' dao: thang" kad' nae" ein: myid: phyid' to: va".
11 Nga" yauggai zo: qe we"- ayo, dazai" kan" na ge,- naonhaung" wa yao: re sheim nae pyo: ja: xau phad' ngaui" byid: nae" qhid' mae" we' mung" byu qere yao: re caung:pa" byid' rure au: she nae" qhid' mae" Asang: yang khyin: san: to: qhug' va" mo, ngad: ako"- ga: ta" ra".
12-14 Aimae na: jo, ko" ra" Levi byu qe wa
Kohad kaung mae" Amasai nho: yauggai zo: Mahad we' Azaria nho: yauggai zo: Yoela-
Merari kaung mae" Abdi nho: yauggai zo: Kisha we' Yehalela nho: yauggai zo: Azaria.
Gershon kaung mae" Zinna nho: yauggai zo: Yoahaza we' Yoahaza nho: yauggai zo: Edin.
Elizaphan nho: kaung mae" Shimri we' Yeue-
Asab nho: kaung mae" Zekharia we' Matania-
Heman nho: kaung mae" Yeue we' Shimi
Yeduthun kaung mae" Shemaia we' Uzie- bam ngad: ako".
15 Ce: byu qe wa yao: bam mao:nhaung: Levi byu qe we' zang" phaung mung: yao: bam alhab' mo, yao: bam: yao" gaung re caung:pa" thung" khyo" gyang" san sho' kad' ako". Ai: thao kho:kham pho" yao: bam re kad' nae" amyin" byid' ru we' dakhyo: Asang: tarha" re cao" yang: Caung:pa" Yham re gyang" san sho' kad' qhid: ako".
16 Khinjaung qe wa aire yekyang" san nae" qhid' mae" Caung:pa" Yham akhug khyo vao ye: mung: yao: bam wa caung:pa" thung" khyo" masan masin" boe" nhao: ra" ja: alhab' re Caung:pa" Yham vang" khyo tai: thug' pye' ako". Ai: jo, qo mae" Levi byu qe wa aijham alhab' re vogaung: khug mae" Kidron lao: khaung: khyo tai: pye' ako".
17 Ai: mau" re lho" sao qhid' khye' sao qhid' ba mae zaui" qhid mung: nhad' ba ein: ba mae yao: bam wa phaui: lhab' mae" Caung:pa" Yham joe" sho' alhab' re yao: bam kad' pin" ako". Ai: thao yao: bam wa ai: lho" khye' daxe: khyaug' ba joe" sho' caung:pa" nae" qhid' mae" Caung:pa" Yham re nyhang" yang: gatau she' ba mau" xo' zaui" ako".
Caung:pa" Yham Re Dam: Qhaug' Byid' Ra" Khyo
18 Levi byu qe wa kho:kham Hezekia re- ngonhaung" wa phad' ngaui" byid' ra" phan- gyang" lho" ra" mug qhid' mae" jaung: we' aijham: khin zai jham alhab' bobo mung: Caung:pa" Yham geim" re caung:pa" thung" khyo" kyang" san: ra" mau" re bin: kad' va".
19 Ngonhaung" wa yao: Mao"So re jhaug' mazaug: ra" ai: zin na gu: agyo: mae kho:kham Ahaza yang yu: pye' ra" khin zai jham alhab' rere: dam: yu: to: va". Amung: aire dam: qhaug' to: byid: va". Aigu: alhab' wa Asang: phan kheim: mae" gu: ngad: ako"- ga: lokyo" ako".
20 Kho:kham Hezekia wa mayam" na lo: vogaung: mae" au: jhaung qere khai: zhang: mung: yao: bam alhab' daga" za: Caung:pa" Yham khyo ye" ako".
21 Kho:kham yham khaung byu qe we' mung" byu qenho: qobo jham re vin: pye' byid: nae" we' Caung:pa" Yham re kyang" san: pye' nae" qhid' mae" ngaui" xeim: khyo"- yao: bam wa nung: jaung lo: nhad' dau:- yao nhad' dau:- yao nau" nhad' dau:- cad' be, nhad' dau: re yu: yu: ako". Kho:kham pho" wa Arun nho: myid:zo: qe ngad ko" ra" khinjaung qere gug'nyhug' jham re xeim: khyo" phan dao mae ngaui" byid: genae" qhid' mae" ta" ra".
22 Khinjaung qe wa sao qhid' nung: jaung lo: jham re se' mung: ai: dao yao jham- yao nau" jham se' ako". Amung: xeim: dau: khao: ngo" nho: sa: re phan dao mae pyi" sheim" ako".
23 Lo" thao" mae yao: bam wa cad' be, jham re kho:kham we' caung:pa" mo, gaje qejhao" she: lo mung: yao: bam: lo, jham aijham dao mae kai: byid' ako".
24 Ai: thao mung" byu qe alhab' nho: qobo re vin: pye' nae" qhid' mae" khinjaung qe wa cad' be, jham re se' mung: aijham: sa: re phan dao mae xeim: khyo" vhe' sheim: ako". Pe"mung:ga"re kho:kham pho" wa Israel byu qe alhab' mo; qhid' mae" phad' ngaui" byid' ra" ngaui" xeim: we' qobo ngaui" xeim: jham re ngaui" byid: nae" qhid' mae" amyin" byid' to" ra".
25 Kho:kham pho" wa kho:kham nho: lapa Gad we' lapa Nathan khyo" yang Davi re Asang byid' to" ra" mho" to" ra" dao: jham re cao" ra". Yao: wa Levi byu qere Caung:pa" Yham mae tang: jham we' jhe' cang" jham-
26 Kho:kham Davi ci: lo: ra" ai: nghaui" thoe gai: ke' ra" zai ru"ru ja: jham ci yang: na: jo, nhao: ra". Khinjaung qere: aimae labo" ci yang: ye; jo; ako".
27 Hezekia wa phad' ngaui" xeim: qhaug' byid: nae" amyin" byid' ra". Amung: ngaui" xeim: re qhaug' ke' we' mung" byu qe wa Asang re Nghaui"caung: mung: she mad be, nghaui" mo, wa labo" jham we' gatau: nghaui" thoe ke' ra" zai jham re be; myhang" qhid: ako".
28 Aitau na: ra" mo, wa caung:pa" byid' rumae bobo gemung: ngaui" xeim: alhab' re bin: phad' ngaui" sho' nghaui"caung: ru we' dang: ra" nghaui" thoe jham wa xo' yang: ngaui" na: ako".
29 Ai: thao Kho:kham Hezekia we' mung" byu qe alhab' pad' thaug' thaug' mung: Mao"So re caung:pa" ako".
30 Kho:kham pho" we' byumyu" au: jhaung qe wa Levi byu qere Davi we' lapa Asab yang tung" to" ra" nghaui"caung: Asang re khun" caung: genae" qhid' mae" ta" ako". Aimung: yaug khao: ngo" wa yao: bam pad' thaug' thaug' yang: Mao"So re caung:pa" na zo" re" qi: sho' ngaui bau" ru we' Nghaui"caung: ako".
31 Hezekia wa amyu" byu qere- ana" naonhaung" wa caung:pa" thung" khyo" san sin" mo, ngad: ako". Asang re jeju beim: so" ra" xeim: khyo" ngaui" xeim: jham re cilo geri:- ga: ta" ra". Yao: bam wa aire mho dao: gyo: mung: yao: bam mae" damyo" wa phad' ngaui" byid' ra" xeim: khyo" ngaui" byid: nae" gug'nyhug' jham rere: yao" yao" myid bug: ra" khyo" cili" ako".
32 Yao: bam wa nung: jaung lo: nhad' xe: dau:- yao dayo dau: we' yao nau" shid' yo dau: re-Asang: qhid' mae" phad' ngaui" xeim: khyo" cili" ako".
33 Yao: bam wa nung: jaung lo: khyaug' yo dau:- yao sam taung dau: re mung" byu qe zo: nae" ngaui" xeim: jham kad' ako".
34 Ai: gug'nyhug' jham re khinjaung qeyang za: matho' aung: se' geyang: mau" bin sho' yao: bam re Levi byu qe bao" byid' ako". Ai: ayo, kho re khinjaung je: myo: sho' yao: yao" gaung re caung:pa" thung" khyo" san sin" sho' kad' ako". (Levi byu qe wa khinjaung qe tho' caung:pa" thung" khyo" san sin" sho' zam" ci: rumae je yang: jhaug' zaug: ako".)
35 Khinjaung qe wa- dau: geim" phad' ngaui" byid' ra" xeim:- ngaui" byid' ra" mau" tho' mago" mung" byu qe zo" ra" ngaui" xeim: mae" qhaug' byid' ra" phad' ngaui" byid: ca" ra" xau ngaui" xeim:- phad' ngaui" byid' ra" ngaui" xeim: we' daga" vhe' sheim" ra" sabyi qang: ngaui" xeim: jham re ngaui" byid: ca" ako". Airu: Caung:pa" Yham mae caung:pa" ru dam: qhid: ako".
36 Kho:kham Hezekia we' mung" byu qe wa ngaui pyo" ako". Pe"mung:ga"re Mao"So wa yao: bam re cegu: alhab' re gyai phyad sho' kad' nae" bao" thaug' byid: yaug ngad: ra".