26
Yuda Kho:kham Uzia
(2 Kh 14.21-22; 15.1-7)
1 Yuda mung" byu qe alhab' wa yao: pho" khu mae kho:kham xo' kad' nae" qhid' mae" apyad daxe: khyaug' zin ngad: ra" Amazia nho: yauggai zo: Uzia re ceim" khyin: ako".
2 (Uzia wa Amazia shid thao re Elad re dam: lhad' sang: yu mung: vogaung: re dam: te" to" ru ngad: ra".)
3 Uzia apyad daxe: khyaug' zin mae kho:kham boe" lo mung: Yerusalem mae 52 zin eib: na: ra". Yao: myhi" wa Yerusalem vogaung: mae" Yekholia ngad: ra".
4 Yao: pho" nho: ave, re cao" mung: yao: wa Asang o ngaui: ra" khyo re kad' ra".
5 Yao" nho: caung:pa" thung" cao" ra" pha,jhi" byid: yaug Zekharia daui: na: ra" myhao" yao: wa Asang re jhaug' zaug za: caung da" byid: mung: Mao"So wa yao: re shaman" byid' ra".
6 Uzia wa Philisti byu qe we' gye jho" khe' ra". Yao: wa Gat- Yamnia- Ashdod vogaung: jham: nho: vang jham re phyo' khyo" pye' mung: Ashdod nhae mae we' dang: ra" Philisti mung" mae gyetab vogaung: jham te" to" ra".
7 Mao"So wa yao: re Philisti byu qere Gubag mae na ko" ra" Arab byu qere we' Meunid byu qere aung: pye' nae" yao: re bao" thaug' byid' ra".
8 Amon byu qe wa Uzia re khang: khyui byid: mung: yao" phung qam: so' wa gyai qi" li" yang yao" lahau: wa Egutu mung" joe" sho' lhao" hau" nhao" lo" ra".
9 Uzia wa Yerusalem vogaung: re Akhyug mae" kham:- Lao: khaung: kham: we' vang akhyug re gyebyu zaung jham re kad' ra" khyo" yang gyetab qam: je: bo nhao: ra".
10 Yao: wa pa:din" mae re: gyetab gyebyu zaung jham kad' mung: qid thaung: myo: sho' rere: dau" to" ra". Pe"mung:ga"re yao: wa ba vao shad' bam khyid mae we' pa:din" jham mae gug'nyhug' phung: myo: sho' qo" yang: ngad: ra". Yao: wa yo kad' kao bau yaug ngad yang: bam mug: khaung: mae sabyi khyae qho: genae" we' myid xau gai: ra" mug:myid mae yo kad' zo: genae" qhid' mae" mung" byu qere qam: byid' ra".
11 Yao: wa gyekhe' poe qhid' mae" jin" jin" ngad: ra" gyetab mo" datab qo" ra". Aijham re yao" jo,nho" zam: mo, ngad ko" ra" Yeie we' Maseia shid' yaug: yang kho:kham nho: zug: mae" dayaug ngad: ra" Hanania qu" gam byid' ra" qao: mae na yang: tung" xam" to" ako".
12 Gyetab wa gyezug: 2600 yaug: yang eib: ra" gyetab ngad: ra".
13 Ai bam: qao: mae gyezo: 307,500 yaug wa kho:kham pho" qhid' mae" yao" gyevo qere aung sho' gye qo" khe' ra" mo, bo: ako".
14 Uzia wa gyezo: qere go jham- lhae tad' jham -shae maug jham- gyekhin jham- lo, la: jham- myo: jham- lo, lhaui: laug zo: qe re gae byid' ra".
15 Yerusalem vogaung: mae yao" ba: kad' thug' mo, wa Yerusalem mae bag myo: jham- gyebyu zaung we' vogaung: vang khyug mae" pye' khyo" zai laugbaui qi: jham re kad' thug' byid' ako". Yao" lahau: wa khyi" khao: ngo" khyo byo: lo" mung: Mao"So mae" bao" thaug' byid' rure yao: qo" khae: yu va" ruyang yao: wa gyai qam: bo yaug boe" li" ra".
Yao" Nho: Nga: Kad' Ru Qhid' Mae" Uzia Qobo Dae Qhug' Zo" Ra" Khyo
16 Ngadqere: kho:kham Uzia wa qam: bo: li" lao"- yao: wa nhag' lam: qi" li" mung: aiwa yao: re gyoe; gyo" lo" nhao: ra". Yao: wa Caung:pa" Yham khyo phan dao mae" sheim nae pyo: ja: xau re phad' ngaui" nae" qhid' mae" ye" ra" khyo" yang yao" Mao"So Asang re ngag: thaug' ra".
17 Khinjaung Azaria wa qam: bo: ru we' vae" myid bo: ra" khinjaung she' xe yaug jhui: mung: kho:kham pho" re tam" pye' nae" qhid' mae" yao" thao khyo cao" ye" ra".
18 Yao: bam wa- Uzia we"- Asang re sheim nae pyo: xau phad' ngaui" byid: nae" akhang" nao maqo" ngad: ra". Arun nho: myid:zo: qemae" khinjaung qe za: ce: mau" re kad' nae" kyang" san: to: qhug' ako". Ce: gyang" lho" jo, qo mae" thug' lo" wa,. Nao wa Mao"So Asang re gye kad' ava". Yao" shaman" jeju re nao khonhae" re maqo" yu lo nae" myao:- ga: ta" ako".
19 Uzia wa Caung:pa" Yham mae" sheim nae pyo: ja: xau phad' ra" phan ayae mae sheim nae pyo: ja: xau khug' ci yang: ye; jo; ra". Yao: wa khinjaung qere nhag' yo" li" mung: ailao" jao" yao" nga: lao: mae mao gae: boe" thug' li" ra".
20 Azaria we' khinjaung gaje qe wa kho:kham pho" nho: nga: lao: re qu" gyaug qu" lhaung sho' zhaug' qu" thao re ai: Caung:pa" Yham mae" maqad maqui" thug' lo" nhao: ako". Yao: wa hin hin za: thug' lo" ra"- pe"mung:ga"re Asang wa yao: re qobo dae byid: va" ruyang ngad: ra".
21 Kho:kham Uzia wa yao" apyad dang: ra" gu: mae yao" no mathao mae caung:pa" thung" khyo" masan masin" boe" pye' ra". Caung:pa" Yham khyo madam: qo" vao ye: lo:ngad: ra". Yao: wa yao: yao" yham mae na: jo, mung: mau" alhab' mae" thang: na: ra". Ai: ayo, gyo: mae mung"dan: re yao" yauggai zo: Yotham eib: ra".
22 Amoz nho: yauggai zo: lapa Esaia wa kho:kham Uzia yao: eib: ra" ayo, gu: mae yao: kad' lo: ra" gatau: mau" alhab' tung" xam" to" ra".
23 Uzia wa shid: lo" mung: kho:kham lab mae nyhab' pye' ako". Ngadqere: yao" no mathao mae yao: re kho:kham lab mae manyhab' ngad: ako". Yao" yauggai zo: Yotham wa yao" khu mae kho:kham xo' kad' ra".