25
Yuda Kho:kham Amazia
(2 Kh 14.2-6)
1 Amazia wa apyad shid' xe: ngo" zin mae kho:kham boe" lo mung: yao: wa Yerusalem mae shid' xe: gug zin eib: na: ra". Yao: myhi" wa Yerusalem mae" Yehoadin ngad: ra".
2 Yao: wa Asang re ngaui nhao: ra" mau" kad' ra". Ngadqere: aire manug masho: kad' ra".
3 Yao: wa kheim: so' re tang sho' qo" yu we' yao: pho" re se' pye' ko" ra" zug: shid' yaug re se' pye' ra".
4 Ngadqere: yao: wa aibam: zo: dau qere wa mase' pye' ngad: ra". Asang: yang Moshe tarha" mae amyin" byid' to" ra" gu: re phug' cao" ra". Aiwa yao: myhi" yao: pho" qe wa yao: zo: qe shad' lhoe" ra" qobo mathao: yang se' pye' ru magai: qhug' mung: yao: zo: qe wa yao: myhi" yao: pho" qe shad' lhoe" ra" qobo mathao mae se' pye' ru magai: qhug' nae". Byu dayaug wa yao: yao: shad' lhoe" va" ra" qobo yug: qhid' mae" za: se' pye' qhug' nae" ngad: ra"- ga" ru ngad: ra".
Edom Re Gye Khe' Poe Kad' Ra" Khyo
(2 Kh 14.7)
5 Kho:kham Ahazia wa Yuda we' Benyamin kaung mae" byu alhab' re gyetab boe" sho' lhaung mung: yao: bam: amyu" kaung re cao" yang: dataung re eib: ra" gyezug: qe- dayo re eib: ra" gyezug: qe san: to" ra". Cegu: mae apyad shid' xe zin we' ai tho' je: qi: ra" mo, bobo mung: byu alhab' 300,000 yaug ngad: ako". Yao: bam wa khyin: yu: ra" gyezo: qe ngad ko" ru we' gyekhe' poe qhid' mae" jin" jin" ngad mung: lhae tad' jham we' go jham re jhao jhao ba: ci mo, ngad: ako".
6 Aitho' mago" aphug' ngaui joe: 2500 ko: yang Israel gyezo: 100,000 yaug re ngho" yu: ra".
7 Ngadqere: lapa dayaug wa kho:kham pho" jhao" ye: mung: ai: Israel gyezo: qere nao we' daga" dajhui: wa,- Asang wa ai: mug: am: mung"dan: mae" byu qe we' daga" mangad: ngad: ra".
8 Nao wa yao: bam bobo: yang: gyekhe' poe mae gye qam: je: bo nae" ga: jho: ra". Ngadqere: aung doe; nae" we' seim" nae" rure byid' ra" qam: so' qo" yaug wa Mao"So angad: ra". Yao: wa ni" gyevo qere nao re aung: pye' nae" akhang" byid' li" nae"- ga: ta" ra".
9 Amazia wa lapa pho" re ngadqere: yao: bam qhid' mae" ngo byid' pye' va" ngaui alhab' gu: we' sin: yang: wa khoru: i? ga: myid' ra". Lapa pho" wa Asang ai tho' je: myo: sho' nao re qo" dam: tug' byid: yaug ngad: ra" ga: phaug' tau" ra".
10 Arumung: Amazia wa okaung lhaung: to" ra" gyezo: qere yham phao: lo" genae" qhid' mae" yao: bam re ta" ke' ra". Yuda byu qere kyid kyid kho: sho' nhag' yo: mung: yao: bam yham phao: lo" ako".
11 Amazia wa yao" vae" myid re ke' yu mung: yao" gyetab re xo: lao: khaung: khyo jhui" au: she: ye" lo" ra". Aimae yao: bam gye yezin: mung: Edom gyezo: datug yaug re se' pye' ako".
12 Amung: gatau datug yaug re wa the' taung" yu: ako". Yao: bam wa kyam: byu qere Sela vogaung: mae" laug byo au: khyo jhui" do, lo" mung: yao: bam: o mae" laug thin mae shid geshao: ga: yao: bam re deim" phyid' khyo" pye' ako".
13 Ai: ayo, mae gyekhe' poe khyo yao: we' daga" bocao: ye: nae" Amazia akhang" mabyid' ra" Israel gyezo: qe wa Samari vogaung: we' Bed Horon agyo: mae" Yuda vogaung: jham re khe' zin: gemung: byu sam taung yaug re se' pye' yang: lanyab myo: sho' sham" yu: pye' ako".
14 Amazia Edom byu qere khe' aung: pye' rumae" dam: tug' lo: au:- yao: wa aibam: nho: solho re yao: we' daga" cilo mung: aijham re lotau: zhaug' yang: caung:pa" byid: mung: aijham re sheim nae pyo: ja: phad' ngaui" byid' ra".
15 Ceru wa Asang re nhag' yo: nhao mung: yao: wa Amazia jhao" lapa dayaug re nhao: ke' ra". Lapa pho" wa ni" qam: so' mae" lhao" re: yao: bam: byu qere maqo" khyad' yu ko" ra" taung bug so jham re nao pe"mung: caung:pa" byid' i? ga: ta" ra".
16 Ai: khyo re ta" na: au:- Amazia wa nao re kho:kham pho" nho: pha,jhi" byid: yaug khyo" ngonhaung" wa kho: ayo, mae nao re san: to: va" i? Sae za: na wa,- mangad: re nao re ngo se' pye' ca" nae" lhe"- ga: ta" ra". Lapa pho" wa nao wa cegu: alhab' re kad' mung: nga" pha,jhi" byid: dao: re pe" shui manho lo" ruyang Asang wa nao re phyo' qheim" pye' nae" myid: phyid' to: va" ra" khyo re ngo ana" ba va"- ga: ta" mung: thang: pye' ra".
Israel We' Gye Khe' Ra" Khyo
(2 Kh 14.8-20)
17 Yuda kho:kham Amazia we' yao" pha,jhi" byid: mo, wa Israel re gye kad' ako". Ailao" yao: wa Yehoaha nho: yauggai zo:- Yehu nho: yao: myid: ngad: ra" Israel kho:kham Yehoasha re lagyo: nhao: ke' mung: gye jho" khe' nae" yao: re lhaung: ra".
18 Yehoasha wa Amazia re- Ganhae" Lebanon bam jham mae" zau: kyin gae dagae wa shaug' gae re- ni" myiqe: zo: re nga" yauggai zo: we' lo xo' xo' nae" byid: zho: la,- ga: lagyo: ke' ke' ga". Seyo: gug'nyhug' lhe: jham su" lai: lo" mung: thao" paung" re zab: nhe" pye' ako".
19 Ana" nao Amazia wa Edom byu qere aung: pye' yang: phug: na: ra". Ngadqere: ngo wa nao yham mae na: jo, nae" qhid' mae nao re pha,jhi" byid' ra". Nao we' ni" byu qe: dao mae za: boe" li" nae" qug: khai: dayin dayo: re Pe"mung: lhau: zhung" ke' ra" i? ga: ce: dao: phyid re byu nhao yang: tau" ke' ra".
20 Ngadqere: Amazia wa aire matae" gyo: ha: pye' ra". Amazia gye seim" nae" ru wa Mao"So: myid o: ru ngad: ra". Pe"mung:ga"re yao: wa Edom solho jham re caung:pa" yang: ngad: ra".
21 Airumung: Israel kho:kham Yehoasha wa Yuda kho:kham Amazia we' jho" khe' ra" gyekhe' poe khyo ye" lo" ra". Yao: shid' yaug wa Yuda mung" mae" Bed Sheme mae jho" qhug' ako".
22 Yuda gyetab wa seim" byaug: ra". Amung: gyezo: qe wa yao: bam: yham khyo tao" phao: lo" byaug: ako".
23 Yehoasha wa Amazia re taung" yu mung: yao: re Yerusalem khyo jhui" lo" ra". Yao: wa aimae alaug byid yo daung" nho" bo: ra" akhyug kham: mae" Ephrim kham: joe" mae" vogaung: vang re phyo' khyo" pye' ra".
24 Yao: wa Obed Edom nho: myid:zo: qeyang gug:gam: to" ra" Caung:pa" Yham mae jo; ra" qhang we' ngaui alhab'- Caung:pa" Yham zai jham we' kho:kham kho" jo,nho" re lhad' yu mung: yao: wa Samari khyo tai: lo" ra". Yao: wa nho: zo byu qere re: yao: we' daga" jhui" lo" byaug: ra".
25 Yuda kho:kham Amazia wa Israel kho:kham Yehoasha tho' daxe: ngo" zin je sho' daui: na: ra".
26 Amazia yao: eib: qhid: rumae" lo" thao" ayo, joe" sho' mae" yao: kad' lai: lo: ra" gatau: mau" alhab' re Yuda we' Israel kho:kham qenho: mhomyi: paug' mae tung" xam" to" ako".
27 Asang re yao: gye kad' ra" ayo, mae" Yerusalem mae yao: re gye kad' tau: lhan" ru boe" lo: ra". Lo" thao" mae yao: wa Lakhi vogaung: khyo tao" phao: lo" ra". Ngadqere: gyevo qe wa aikhyo yao" thao cao" khe' gemung: yao: re se' pye' ako".
28 Yao" maogaung re wa myao: dao: khyo" Yerusalem khyo tho: lo mung: Davi vogaung: mae" kho:kham lab mae lonyhab' pye' ako".