27
Yuda Kho:kham Yotham
(2 Kh 15.32-38)
1 Yotham wa apyad shid' xe: ngo" zin mae kho:kham boe" lo mung: Yerusalem mae daxe: khyaug' zin eib: na: ra". Yao" myhi" wa Zadog nho: myiqe: zo: Yerusha ga: mang yaug ngad: ra".
2 Yao: wa yao: pho" kad' lo: ru we' dakhyo:- Asang re ngaui nhao: ra" mau" kad' ra". Ngadqere: yao: pho" ru: Caung:pa" Yham mae sheim nae pyo: ja: phad' ngaui" ra" khyo" yang qobo makad' ngad: ra". Ngad sho' ngadqere: mung" byu qe wa qobo xo' kad' ako".
3 Yotham wa Caung:pa" Yham: nho: mug: am: shad' kham: re kad' mung: Ophela ga: mhang" ra" Yerusalem vogaung: myidgaung mae" vang kad' ra" mau" re ceyaug kad' ra".
4 Yao: wa Yuda mung" mae" bam jham mae vogaung: jham te" ra". Sag' mo" yo mae gyetab jham we' gyebyu zaung jham re kad' ra".
5 Yao: wa Amon kho:kham we' yao" gyetab re gyekhe' mung: yao: bam re khe' aung: pye' ra". Ai: thao yao: wa Amon byu qere o mae tung" to" ra" khang: re Amon byu qe zin Khao: Ngo" sam zin lam: lam: deim" zag: ke' nhao: ra". Aijham wa ngaui 250 joe:- jung: gaug tang sam tug- bale gaug tang sam tug ngad: ra".
6 Yotham wa yao" Mao"So Asang re yao: jhaug' zaug taung" phug' cao" byid' ruyang qam: je: je: bo: li" ra".
7 Yotham nho: eib: ra" ayo, mae" boe" ra" khyo gatau jham- yao: gyekhe' ra" khyo- yao: cao" ra" khyo jham alhab' re Israel we' Yuda kho:kham qenho: mhomyi: paug' mae tung" xam" to" ako".
8 Yotham wa yao: kho:kham boe" li" au: apyad shid' xe: ngo" zin ngad: ra". Yao: wa Yerusalem mae daxe: khyaug' zin eib: na: ra".
9 Yao: wa shid: lo" mung: Davi vogaung: mae yao: re nyhab' pye' ako". Yao" yauggai zo: Ahaza wa yao" khu mae kho:kham xo' kad' ra".