14
Kho:kham Asa Kusha Byu Qere Aung: Pye' Ru
1 Kho:kham Abiya wa shid: lo" mung: Davi nho: vogaung: mae" kho:kham lab mae nyhab' pye' ako". Yao" yauggai zo: Asa wa yao" khu mae kho:kham xo' kad' mung: Asa eib: ra" qao: mae mung"dan: wa daxe zin ngaui pyo: yaug yo: jo; ra".
2 Asa wa jo: ru we' gai shab: ra" lo, mau" kad' ra" khyo" yang yao" Mao"So Asang re ngaui nhao: ra".
3 Yao: wa taung bug phan jham re yu: pye' mung: taung bug qe caung:pa" ko" ra" jo, qo jham mae" gyang" lho" ra" laugbaui zang baung: jham re phyo' khyo" pye' mung: Ashe so myhi" nho: alho rere: thau: khyang: pye' ra".
4 Yao: wa Yuda byu qere yao bam: phug' pho" qenho: Mao"So Asang: myid o: rure kad' genae" qhid' mae" we' yao" mho" shid' dao: jham we' amyin" dao: jham re phug' cao" genae" amyin" byid' ra".
5 Pe"mung:ga"re yao: wa taung bug qe: caung:pa" jo, qo we' Yuda mung" vogaung: jham alhab' mae" sheim nae pyo: phad' ngaui" ra" phan jham re yu: pye' yang: mung"dan: wa yao: eib: ra" qao: mae ngaui pyo: yaug yo: jo; ra".
6 Ai: ayo, mae yao: wa Yuda mung" mae" vomo" jham qhid' mae" gye khug jo, qo tang sho' kad' mung: myo: sho' zin gyekhe' poe majo, ngad: ra". Pe"mung:ga"re Asang wa ngaui pyo: yaug yo: rure byid' to: yang: ngad: ra".
7 Yao: wa Yuda byu qere vang we' gyebyu zaung jham kad' mung: qo" pyid' yang: kham: kyao" de, ra" kham: jham kad' yang: vogaung: jham re tang sho' ngonhaung" kad' gelang:- ngonhaung" wa mung"dan: re zaui" ci va"- pe"mung:ga"re ngonhaung" wa ngonhaung" nho: Mao"So Asang: myid o: rure kad' bam yang: ngad: ra". Yao: wa ngonhaung" re gug:gam byid: mung: shad' khao: ngo" mae ngonhaung" re gug:gam byid' ra"- ga: ta" ra"- aimung: yao: bam airu: kad' yang: na: dai ko" ra".
8 Kho:kham Asa wa Yuda mae" go we' lhae tad' ci: ra" gyezo: 300,000 yaug- Benyamin kaung we' go we' lo, la: ci: ra" gyezo: 280,000 yaug bo: ra" gyetab datab qo" ra". Alhab' mo, wa lhe: mo,- nyang" za: mho" zhao: to" ra" mo, ngad: ako".
9 Kusha byu dayaug wa gyezo: daxe tig we' gyekhe' myao: lhin" sam yo bo: ra" gyetab dalam: we' Yuda mung" khyo jhin" vao li" mung: Maresha joe" sho' joe" li" ako".
10 Asa wa thug' ye" lo" mung: yao: re gye yezin" ra" shid' shad' geim" mae" mo, Maresha nhae mae" Zephatha lao: khaung: mae jo, qo yu: ako".
11 Asa wa yao" Mao"So Asang re O"- Asang we"- nao wa qam: nang" ra" gyetab re qam: bo: ra" gyetab reru: qo" bao" byid: yaug ngad: ra". Ana" ngonhaung" re bao" yu la,- ngonhaung" Mao"So Asang we"- pe"mung:ga"re ngonhaung" wa nao re khug ngha: na mo, ngad:- ngonhaung" wa ni" mang mae ce: gyetab mo" re gyekhe' zin: nae" thug' li" bam va". Asang we"- nao wa ngonhaung" Mao"So ngad: ra". Khag' re: nao re aung: pye' nae" ein: magai: myid: lao" ngad: ra" ga: akyu" mho' ra".
12 Asang wa Asa we' Yuda gyetab aibam re yekhe' zin" au:- Kusha gyetab re seim" nhao: pye' ra". Yao: bam tao" phao: lo" gemung:-
13 Asa we' yao" gyezo: qe wa Gerara joe" sho' aibam re cao" khe' ako". Gyetab wa ham yang: gye maqo" khe' zin: geyang: Kusha byu qe myo: sho' mo, se' pye' qhug' ako". Yao: bam wa Asang we' yao" gyezo: qeyang qam: so' bo nhao yang gyetab wa lanyab myo: sho' sham" yu: ako".
14 Aimung: yao: bam wa Gerara lhang" gam: khaung: mae" vomo" jham re qo" phyo' qheim" pye' ako". Pe"mung:ga"re aimae" byu qe wa Asang: yang kyaug' nhin" ru qhug' ako". Gyetab wa ai: vomo" jham alhab' re phyo' zo: mung: lanyab myo: sho' qo" sham" yu: ako".
15 Yao: bam wa yao zaung" mo, damyo" qe: zaung jham re yekhe' zin: mung: yao we' gola:u myo: sho' rere: qhug' sham" yu: ako". Ai: thao yao: bam wa Yerusalem khyo tug' lo: ako".