13
Abiya Yeroboam We' Gye Jho" Khe' Ru
(1 Kh 15.1-8)
1 Israel kho:kham Yeroboam eib: ru daxe zin ein: zin mae Abiya wa Yuda kho:kham boe" lo: ra".
2 Yao: wa Yerusalem mae sam zin eib: na: ra". Yao: myhi" wa Gibea vogaung: mae" Urie nho: myiqe: zo: Mikhaia ngad: ra". Abiya we' Yeroboam agyo: mae gye poe boe" li" ra".
3 Abiya wa gyezo: 400,000 yaug bo: ra" gyetab dalam: te" laung: mung: Yeroboam wa yao: re gyezo: 800,000 yaug bo: ra" gyetab: yang gye tug' kad' ra".
4 Gyetab shid' tab wa Ephrim bam mug: mae jho" qhug' ako". Kho:kham Abiya wa Zemaraim bam khyo do, ye: mung: Yeroboam we' Israel byu qere-
5 Nga" dao: re tae" gyo: ge,- Israel nho: Mao"So Asang wa Davi we' magai: byo; ra" dao: thang" to: mung: yao: we' yao" myid:zo: qere kho:kham aya: apyad ato mae byid' to" rure naonhaung" maba ko" i?
6 Nebad nho: yauggai zo: Yeroboam wa yao" kho:kham Sholamon re geim lau to" ra".
7 Thao re yao: wa byugao: daphung: re zhang: yu mung: yao: bam re gye tug' kad' nae" saung" ngai: ru we' pe" mathaung" qhug' qu" ra" Sholamon nho: yauggai zo: Rehoboam re yao: bam: myid o: ra" khyo" maqad maqui" jhan" khe' nhao: ra".
8 Ana" naonhaung" wa Asang: yang Davi myid:zo: qere byid' to" ra" kho:kham kheim: so' re gye kad' ako". Naonhaung" wa gyetab mo" we' naonhaung" so boe" nae" Yeroboam yang kad' to" ra" qhang nung: jaung nau" lho qo" ako".
9 Naonhaung" wa Arun nho: myid:zo: qe ngad: ra" Asang: khinjaung qere we' Levi byu qere re: khe' thug' pye' ako". Aibam: khu mae naonhaung" wa gatau: amyu" qe kad' ruru: khinjaung qere san: to" ako". Nung: jaung lo: dadau: mangad: lao"- yao nhad' dau: we' daga" joe" li" yaug khag' re: yao: yao" gaung re naonhaung" yao" so jham ga: mhang" ko" ra" so jham: nho: khinjaung qekhyo" gai: jaung: yu: ako".
10 Ngadqere: ngonhaung" wa ana" joe" sho' ngonhaung" Mao"So Asang re caung da" byid' na mung: yao: re mashapye'- Arun nho: kaung mae" myid:zo: khinjaung qe wa yao: bam: qo re vin vo; mung: Levi byu qe wa aibam re bao" thaug' byid' ako".
11 Ne, seim- myi" thao khao: ngo" yao: bam wa yao: re sheim nae pyo: ja: xau we' gug'nyhug' xeim: jham re dau: geim" geim" phad' ngaui" byid' ako". Yao: bam wa caung:pa" thung" khyo" gyang" san: ra" saboe" dao mae mug xeim: jham re qhaug' byid' ako". Myi" thao khao: ngo" yao: bam wa qhang myikaug' tao" dao mae jo; ra" myikaug' jham re myi: te' ako". Ngonhaung" wa Asang: yang amyin" byid' to" rure kad' va". Ngadqere: naonhaung" wa yao: re shapye' pye' ako".
12 Mao"So yao: yao: wa ngonhaung" au: jhaung ngad: yao" khinjaung qe wa cetau mae labo" jham we' daga" na: jo, gemung: naonhaung" we' jho" khe' ra" gye poe khyo ngonhaung" re khai: ke' nae" qhid' mae" aijham re mad nae" jin" jin" ngad: ako". Israel byu qe we"- naonhaung" nho: phug' pho" qenho: Mao"So Asang re gye dakhe' zin: ge, naonhaung" magai: aung genae"- ga: hug' ta" ke' ra".
13 Ai: ayo, mae Yeroboam wa yao" gyezo: daqhae: re nhaung thao" khyo" Yuda gyetab re yelham nae" qhid' mae" nhao: ke' ra". Amung: dang: ra" gu: re wa qhid' au: khyo" yekhe' ra".
14 Yuda byu qe wa lhang: qu" mung: yao: bam vang" to: qhug' va" rure myao: ako". Yao: bam wa Asang re bao" thaug' yu byid: nae" qhid' mae" hug' yao mung: khinjaung qe wa labo" jham re mad: ke' ako".
15 Yuda byu qe wa thoe qi: we' zag: hug' mung: Abiya yang au: she yang: yao: bam khe' zin" ako". Mao"So wa Yeroboam we' Israel gyetab re gye seim" nhao: pye' ra".
16 Israel byu qe wa Yuda byu qemae" tao" phao: lo" mung: Mao"So wa Yuda qere aung: pye' nhao: ra".
17 Abiya we' yao" gyetab wa Israel byu qere mhan" kad' pye' mung: gai: thao" ra" Israel byu ngo" tig ko se' pye' qhug' ako".
18 Aimung: Yuda byu qe wa Israel byu qere aung: pye' ako". Pe"mung:ga"re yao: bam wa yao: bam: phug' pho" qenho: Mao"So Asang re khug ngha geyang: ngad: ako".
19 Abiya wa Yeroboam nho: gyetab re cao" khe' mung: yao" vomo" daqhae: re sang: yu: pye' ra". Aijham wa Bethela- Yeshana- Ephron we' ce: vomo" khao: ngo" we' te' ra" vogaung: jham ngad: ako".
20 Yeroboam wa Abiya eib: ra" ayo, gu: gyo: mae yao" kheim: so' khonhae" re: madam: qo" yu lo:ngad: ra". Lo" thao" mae yao: re Asang: yang be, mung: yao: shid: lo" byaug: ra".
21 Ngadqere: Abiya wa je: je: qam: bo: li" ra". Yao: wa yham sang myhi" daxe: byid yaug qo" mung: yauggai zo: shid' xe: shid' yaug we' myiqe: zo: daxe: khyaug' yaug: nho: yao: pho" ngad: ra".
22 Abiya nho: mhomyi: mae" dang: ra" gu: yao: pe" ta" ru we' yao: pe" kad' rure wa lapa Ido nho: mhomyi: paug' mae tung" to" ako".