15
Asa Yang Dam: Nyhang" Ra" Khyo
1 Mao"So: byo wa Obed nho: yauggai zo: Azaria jhao" joe" li" mung:-
2 Yao: wa kho:kham Asa re yeqhug' nae" ye" lo" ra". Yao: wa o"- kho:kham Asa we' Yuda byu we' Benyamin byu qe alhab' we"- ngore tae" gyo: gela,- Asang wa naonhaung" yao: we' daga" na: ra" myhao"- naonhaung" we' daga" na: ra". Naonhaung" yao: re qho ko" re wa yao: naonhaung" re myao nhao nae". Amung: naonhaung" yao: mae" phaug' lo" ko" re wa yao: naonhaung" re shapye' pye' li" nae".
3 Ayo, myao" sho' Israel byu qe wa dangman" ra" Mao"So mabo lo:- yao: bam re mho" shid' nae" khinjaung qe mabo lo:- Tarha" mabo lo: na: lo: ako".
4 Ngadqere: qug: khai: dayin dayo: joe" li" lao"- yao: bam wa Israel nho: Mao"So Asang shad' khyo phaug' lo: ako". Yao: bam yao: re qho gemung: yao: re qho: qhug' ako".
5 Ai: pyad gu: mae khag' dayaug re: majoe" li" mung: gug:gam za: maqo" ye" lo" ngad: ako". Pe"mung:ga"re mung"dan: khao: ngo" mae qug: khai: dayin dayo: we' abyi asin: boe" jo; ra".
6 Byumyu" daja: wa gatau daja: re zag: zo: mung: vogaung: dalam: wa gatau dalam: re zag zo: mung: kad' ako". Pe"mung:ga"re Mao"So wa yao: bam: dao mae qug: khai: we'- nhag' lam: mamyan: ru joe" li" nhao: ra".
7 Ngadqere: naonhaung" wa qam: bo mung: mazag mavae myid bo ca" ako". Naonhaung" kad' ra" mau" zo" wa aphug' jhaung qhu" the' nhao: li" nae"- ga: hug' ta" ra".
8 Obed nho: yauggai zo: Azaria ta" ra" lapa dao: re Asa the' gyo: lao"- yao: wa qam: qo" li" ra". Yao: wa Yuda mung" we' Benyamin mug: mae jo; ra" so sulho alhab' re we' Ephrim bam mug: mae" yao" yang sang: yu: ra" vogaung: jham alhab' mae jo; ra" so sulho alhab' re yu: pye' ra". Yao: wa Caung:pa" Yham vang" khug mae ye; jo; ra" Asang: phan rere: dam: nyhang" kad' ra".
9 Ephrim- Manashe- Simon kaung mae" mo, we' yao" mung"dan: mae na: jo, mo, byu myo: sho' Asa nho: shad' mae li" bode; ako". Pe"mung:ga"re yao: bam wa Asang yao: we' daga" ngad: rure myao geyang: ngad: ako". Asa wa yao: bam alhab' mo, re we' Yuda we' Benyamin mug: mae" byu qe alhab' re khai: zhang" yu: ra".
10 Yao: bam wa Asa kho:kham kad' ru daxe: ngo" zin ein: zin lho" sam khye' ein: khye' mae Yerusalem mae zang" phaung: jo; ako".
11 Ai: ba mae yao: bam sham" yu: ra" lanyab mae" nung: nhad' yo dau:- yao nhad' taung dau: Asang re ngaui" xeim: ngaui" byid' na: ako".
12 Yao: bam wa yao: bam: phug' pho" qenho: Mao"So Asang re yao: bam: aung khug nhag' lam: alhab' we' caung:pa" nae" ga" ra" yao: bam myid: vang" khyo dao: thang" to" ako".
13 Angai aqi: yauggai myiqe: yao: re macaung:pa" ra" yaug khag' ngadqere: se' pye' qhug' nae" ngad: ako".
14 Ai: dao: thang" re phug' cao" nae" ga:- Asang: mang mae thoe qi: ke' yang: jham tang" ako". Ai: thao yao: bam wa hug' mung: labo" jham mad: ako".
15 Yuda mung" mae" mo, byu qe alhab' mo, bau" ako". Pe"mung:ga"re yao: bam wa ce: dao: thang" re yao: bam: aung khug nhag' lam: alhab' yang kad' geyang: ngad: ra". Yao: bam wa Asang re caung:pa" rumae ngaui bau: gemung: Asang wa yao: bam re khae: yu yang: shad' khao: ngo" mae ngaui pyo: yaug yo: ru yao: bam re byid' ra".
16 Kho:kham Asa wa yao: phyid' Makha re kho:kham yao: myhi" aya: mae" khyo" pye' ra". Pe"mung:ga"re yao: wa myid xau gai byid' ra" maca' majhad' ra" so myhi" Ashe solho re kad' yaug ngad: ra". Asa wa ai: solho re thau: khyang: mung: baug: kho' sin" pye' ra". Amung: Kidron lao: khaung: mae adau dau kad' yang: ngha" pye' ra".
17 Asa wa mung"dan: mae" taung bug so re caung:pa" byid' ra" jo, qo jham alhab' re maphyo' qheim" pye' sho' ngadqere: yao: wa yao" apyad geim" mae Asang re jhaug' zaug za: kao so' daui: ra".
18 Yao: wa Caung:pa" Yham mae yao: pho" Abiya yang Mao"So re qhaug' byid' to" ra" zai alhab' rere:- yao: yao: qhaug' byid' to" ra" qhang we' ngaui zai jham rere: ke' to" ra".
19 Yao: eib: ra" sam xe: ngo" zin joe" sho' gyekhe' poe majo, ngad: ra".