21
Davi Byu Japhin: Gaug: Yu: Ra" Khyo
(2 Sa 24.1-25)
1 Satan wa Israel byu qe: dao mae qug: khai: boe" nhao nug mung: yao: wa byu japhin: gaug: yu nae" Davi re myid: phyid' nhao: ra".
2 Davi wa Yoab re we' zug: gaje qere- Israel mung" geim" khyo gam: sho' ye: mung: mung" byu qere yenghe' lo geri:- Yao: bam khonho" ngad ko" rure ngo ba nug: ra" ga: ta" ra".
3 Yoab wa asang kho:kham we"- Asang wa ana" yao: bam ngad: na ko" ra" tho' Israel byu qere da yo zhao" myo: nhao vashao: wo". Yao: bam alhab' wa ni" daui daui mo, ngad: ako". Nao ceru: pe" mung: kad' nug mung: damung" geim" re qobo qo" nhao: i? ga: tau" ra".
4 Ngadqere: kho:kham Yoab re amyin" dao:cao" nhao: ra". Yoab wa thug' ye" lo" mung: Israel mung" gam: sho' gyaung: su" lo" ra". Ai: thao Yerusalem khyo dam: tug' lo: ra".
5 Yao: wa kho:kham Davi re gye mau" qo" vin: ra" mo, khonho" ngad: rure aso: lota" kyo" ra". Ai bam wa Israel mung" mae" 1,100,000 yaug- Yuda mung" mae 470,000 yaug ngad: ako".
6 Yoab wa kho:kham pho" nho: amyin" re myid mavang" ru yang Levi kaung we' Benyamin kaung mae" mo, re byu japhin: dayaug rere: magaug yu ngad: ra".
7 Airu: kad' rure Mao"So mangaui mung: Israel byu qere qobo dae byid' ra".
8 Davi wa Mao"So re ngo wa ce: mau" re kad' yang: qu" gyaug qu" lhaung sho' ra" qobo shad' lhoe" va". Jeju khyo" ngo re qobo khyad' byid: la,- ngo wa ako" asho: kad' va"- ga: ta" ra".
9 Ailao" Asang wa Davi nho: lapa Gad re-
10 Ngo wa yao: re khyin: yu nae" sam ja: byid' to" ra" khyo Davi re ye ta" kyo: wa,- yao: khyin: yu: ra" ja: ngo kad' nae" ga: ta" ra".
11 Gad wa Davi jhao" ye: mung: Asang ta" ra" dao: yao: re yeta" kyo" ra". Yao: re kholam: ngad nae" i?
12 Sam zin bao" khug' khug' ru i? ni" gyevo qe: lo, mae" lho" mo" sam khye' phao: qin" nae" ru i? Sam ba agyo: mae Asang wa yao" shae pyang" yang nao re khe' zin: mung:- ni" mung"dan: re qam" gyo" nhao yang: yao" mug: lagyo: qeyang Israel mung" geim" mae shid nhao nae" ru i? ga: myid' ra".
13 Davi wa Gad re- ngo gyai qug' ra" azhao" mae na: jo;- Ngadqere: ngo wa byu: yang qobo dae byid: nae" ru wa ngo ma-o Asang: yang yao: ngo re qobo dae byid: vashao:- pe"mung: gare yao: wa nhag' khyag' shogu: myid bo yaug ngad: ra" ga: phaug' tau" ra".
14 Aimung: Asang wa Israel byuqe: dao mae qam" gyo" nhao mung: byu nhad' tug re shid: lo" nhao: ra".
15 Ai: thao Asang wa Yerusalem re phyo' qheim" pye' nae" mug: lagyo: re nhao: ke' ra". Ngadqere: yao: wa nhag' lam: lhai" pye' mung: mug: lagyo: re thang se,- ga: ta" ra". Mug: lagyo: wa Yebusi byu Oram nho: gaug nao: jao: nhae mae ye; jo; ra".
16 Mug: lagyo: wa Yerusalem re phyo' qheim" pye' nae" jin" jin" kad' mung: yao" lo, mae shae pyang: ci yang: mug: le; phyo: mae ye; jo; rure Davi myao: ra". Ai lao" Davi we' amyu" byu au: jhaung qe alhab' mo, wa jid: mo" mai bau ve, yang: myidgaung khyo yao: bam: myo,khung: re tin: sho' goe; gyo" ako".
17 Davi wa o" Mao"So we"- qobo kad' yaug wa ngo angad:- Byu japhin: gaug: yu nae" amyin" byid: yaug wa ngo angad:- ce: amyu" byu qe pe" kad' vako" ra" i? Nga" Mao"So Asang we"- ngo re we' nga" yham khaung re qobo dae byid: mung: ni" byumyu" re tang" to: wa,- ga: akyu" mho' ra".
18 Asang: nho: mug: lagyo: wa Gad re Ornan nho: gaug nao: jao: mae Asang: qhid' mae" phan dalam: yekad' nae" Davi re amyin" byid nae" ta" ra".
19 Gad re Asang: yang ta" ru we' dakhyo: Davi wa Asang: nho: amyin" dao: re tae" gyo" ra".
20 Ai: gaug nao:jao: mae Ornan we' yao" yauggai zo: byid yaug wa jung: gaug nao" na: ako". Yao: bam mug: lagyo: re the' myao gelao" yaug gaizo: qe wa tao" phao: lo" mung: vho' jo; ako".
21 Kho:kham Davi te' li" na: rure Arauna the' myao we' yao: wa gaug nao: jao: mae" to" mung: yao" myo, khug: myid gaung mae tin:sho' goe; gyo" ra".
22 Davi wa yao: re- qam" re tam" pye' nae" ngo Asang: qhid' mae" phan dalam: re qo" kad' nae" qhid' mae" ni" gaug nao: jao: ngo re aung: byid: la,- gau man: sho' byid: nae" ga: ta" ra".
23 Ornan wa- asang kho:kham we"- yu wa, amung: nao o: khyo" kad' wa,- phan dao mae ngaui" xeim: khyo" phad' ngaui" nae" nung: jaung lo: jham ce mae na: ra". Thao: khyo" ci nae" gaug nao: the: ce mae jo; ra". Amung: ngaui" xeim: khyo" ci nae" jung: gaug cemae jo; ra". Aigu: alhab' ngo nao re byid: nae"- ga: tau" ra".
24 Ngadqere: kho:kham pho" wa mangad: nae"- ngo aphug' man: sho' byid: nae"- ngo wa ngoyao: pe" mashe lo:- nao sang: ra" ja: re ngaui" xeim: khyo" kad' yang: Asang re mangaui" byid: nae"- ga: tau" ra".
25 Amung: yao: wa Ornan re gaug nao: jao: qhid' mae" qhang thang: the: khyaug' yo byid' ra".
26 Yao: wa ai tau mae Asang: qhid' mae" phan dalam: kad' mung: phad' ngaui" byid' ra" xeim: we' zam" khug: ra" xeim: ngaui" byid' ra". Yao: wa akyu" mho' mung: phan dao mae" ngaui" xeim: jham re ngha" pye' nae" mug:gaung mae" myi: re nhao: khyo" ke' ra" khyo" Asang wa yao: re tau: byid' ra".
27 Asang wa mug: lagyo: re yao" shae pyang: ke' pye' nae" ta" mung: mug: lagyo: ai re tae" gyo" ra".
28 Davi wa cekhyo" yang Asang yao" akyu" mho' dao: re tau: byid: va" rure ba mung: Ornan nho: gaug nao: jao: mae" phan dao mae Asang re ngaui" xeim: ngaui" byid' ra".
29 Ce: ayo, mae din"pyad' yo mae Moshe yang kad' to" ra" Asang: Zaung qhid' kheim: we' ngaui" xeim: jham re phad' ngaui" byid' ra" phan wa caung:pa" jo, qo Gibeon mae jo; jo; ashi".
30 Ngadqere: Davi wa Mao"So re caung:pa" nae" ai: jo, qo khyo maqo" ye: ngad: ra". Pe"mung: gare yao: wa Asang: mug: lagyo" nho: shae pyang: re gyaug yang: ngad: ra".