20
Raba Re Davi Sang: Yu: Ra" Khyo
(2 Sa 12.26-31)
1 Ai zin zin vao kheim: ayo, mae kho:kham qe gye poe khyo lhaung" ye: ko" au:- Yoab wa gye tab re jhui" au: she: ye: mung: Amon mung" khyo jhin" vao ye" ra". Ngadqere: Davi wa Yerusalem mae na: jo; ra". Yao: bam wa Raba vogaung: re ye vang: mung: ai re khe' zin: yang: phyo' pye' ako".
2 Amon byu qe: so alho Moleg mae dakyin: je la" ra" qhang ba maug: de; ra". Aimae bo: ra" laug sin" dace' re Davi yu: yu mung:- yao" ba maug: mae te' ra". Yao: wa vogaung: mae" lanyab myo:sho' rere: sham" yu: ra".
3 Yao: wa vobyu qere jhin" yu mung: sag' qhag' qhag' mau" jo,to' lakya:- vozaung: ci yang: mau" zaui: nhao: ra". Yao: wa vozaung: ci yang: mau" zaui: nhao: ra". Yao: wa Amon vogaung: gatau alhab' mae" vobyu qere re: ai we' dakhyo: kad' ra". Ai: thao yao: we' yao" byu qe wa Yerusalem khyo dam: tug' lo" ako".
Philisti Byu Qi: We' Jho" Khe' Ra" Gye Khe' Poe
(2 Sa 21.15-22)
4 Ai: thao Geze mae Philisti byu qe we' gye jho" khe' ako". Husha mae" Sibekhai wa Sipai ga: mang: ra" byuqi: dayaug re se' pye' lao" Philisti byu qe seim" byaug: ako".
5 Philisti byu qe we" gye jho" khe' ra" gye poe gatau dapoe mae Yaira nho: yauggai zo: Elhanan wa Gat mae" Goliad nho: yao: nhaung: Lami re se' pye' ra". Yao" nho: lhae tad' wa qo, mo" khao: qhi" thau: ra" lhae vho' de; ra".
6 Gat jo, qo mae gye khe' poe dapoe dam: boe" mung: aimae lo, nyhug' khyaug' nyhug' de, khyid nyhug' khyaug nyhug' de; ra" byuqi: dayaug na: ra". Yao: wa ganhae" mae" byuqi: qe: myid:zo: dayaug ngad: ra".
7 Yao: wa Israel byu qere maphug' makhyad' kad' mung: Davi nho: yao: mao: Shama nho: yauggai zo: Yonathan wa yao: re se' pye' ra".
8 Davi we' yao" byu qe yang se' pye' qhug' ko" ra" ce: sam yaug wa Gat mae" byuqi: qe: myid:zo: qe ngad: ako".