22
1 Aimung: Davi wa Asang: Caung:pa" Yham wa cemae ngad: li" nae". Israel byu qe ngaui" xeim: phad' ngaui" byid' ra" phan ce mae ngad: ra" ga: ta" ra".
Caung:pa" Yham Kad' Nae" Seim" Nyhang" Ru
2 Kho:kham Davi wa Israel mung" mae na ko" ra" taung bug qe alhab' zang" ham genae" qhid' mae" amyin" khyo" ke' ra". Yao: wa yao: bam re mau" zaui: nhao: ra". Daqhae: re wa Caung:pa" Yham kad' nae" laug thaung: jham re kho' nyhang" nhao: ra".
3 Yao: wa ze,jin" kad' nae" qhid' mae" we' sag' the: kham: ce' kad' nae" qhid' mae" jo,to' myo: sho' byid' ra". Aimung: khag' maqo" lag losho' nho" gyid: ne jham re byid' ra".
4 Yao: wa Turu we' Sidon byu qere shaug' dam: myo: sho' tho: li" nhao: ra".
5 Davi wa nga" yauggai zo: Sholamon kad' nae" ra" Caung:pa" Yham wa mug: myid dao mae khid mung: mang qi: nae" ra". Ngadqere: yao: wa ngai mung: thaung" qhug' qu" ru malaug shiyang: ai qhid' mae" ngo nyhang" seim" to: byid: nae" ga: myid: ra". Aimung: Davi wa yao: mashid shire yham vo: myo: sho' jin" jin" kad' to" ra".
6 Yao: wa yao" yauggai zo: Sholamon re khai: yu mung: Israel nho: Mao"So Asang: qhid' mae" caung:pa" yham kad' nae" yao: re amyin" byid' ra".
7 Davi wa yao: re- nga" zo: we"- nga" Mao"So Asang re ngha: yhe' nae" caung:pa" yham ngo kad' nug ra".
8 Ngadqere: ngo wa byu myo: sho' re se' pye' mung: gye poe myo: sho' khe' lo: ra" ga:- Asang ngo re ta" ra". Airu: ngo yang kad' ra" sa" sheim: ra" mau" alhab' mathao mae yao" qhid' mae" caung:pa" yham kad' nae" akhang" ngo re mabyid: ngad: ra".
9 Ngadqere: yao: wa ngo re dao:so: byid' ra". Yao: wa nao wa ngaui pyo: yaug yo eib nae" ra" yauggai zo: dayaug qo" li" nae". Pe"mung: gare ngo wa yao" gyevo qe alhab' mo, mae" ngaui pyo: yaug yo: ru yao: re byid: nae". Yao" mang wa Sholamon ngad: li" nae". Pe"mung: gare yao: eib: ra"ayo, gyo: mae Israel byu qere ngaui" pyo: yaug yo: ru we' gug: gam: ru byid: nae".
10 Yao: wa nga" qhid' mae" caung:pa" yham kad' li" nae". Yao: wa nga" zo: ngad mung: ngo wa yao" nho: yao: pho" ngad: li" nae". Yao" nho: kho:kham yham khaung wa Israel mae apyad ato eib: li" genae" ga: ta" ra".
11 Davi wa xo' yang: Ana"- nga" zo: we"- ni" Mao"So Asang wa nao we' daga" ngad vashao:- yao" qhid' mae" caung:pa" yham kad' ru mae aung myaug nae" ta" to" ra" yao" dao:so: re boe" nhao vashao:.
12 Tarha" we' dakhyo: Israel byu qere nao qo" eib khang" nae" qhid' mae"- ni" Mao"So Asang wa nao re laba lajhao we' pha,jhi" byid: vashao:-
13 Israel byu qe: qhid' mae" Asang: yang Moshe re byid' ra" tarha" alhab' re nao phug' cao" ngad: re nao aung myaug: li" nae". Vae" myid we' phin: wa, pe" ja" yang re: nao re dagyaug nhao wa,.
14 Caung:pa" yham qhid' mae" kam" wa ngo qam: ke' yang: ngo wa qhang joe: datig- ngaui joe: datig Caung:pa" Yham kad' ru mae ci nae" qaung" to: va". Aitho' mago" gyid: we' jo,to' matho' lag losho' qaung" to: va". Ngo wa sag' the: we' laug thaung: jham rere: jin" jin" kad' to: va". Nao wa ai: dao mae laung: mung: kad' wa,.
15 Nao wa mau" zaui: byu myo: sho' qo" ra". Laug kho' nyhang" mo,- laug zao mo,- lo, mau" zaui: mo,-
16 Qhang- ngaui- gyid: jo,to' we' lo, mau" aja: ja: ba: kad' ko" ra" mo, myo: sho' re: qo" ra". Ana" mau" zaui" qhid se, wa,- Asang wa nao we' daga" ngad vashao:- ga: ta" ra".
17 Davi wa Israel au: jhaung alhab' re Sholamon re bao" thaug' byid: genae" qhid' mae" amyin" byid' ra".
18 Yao: wa naonhaung" Mao"So Asang wa naonhaung" we' daga" ngad: lo: mung: shad' khao: ngo" mae naonhaung" re ngaui pyo: yaug yo: ru byid' ava". Yao: wa ngo re ce: mung: dan: mae lhaung" na ko" ra" amyu" byu qe alhab' re ngo re aung: pye' nhao: ava". Ana" yao: bam wa ni" o mae we' Asang eib: ra" qao: mae na: jo; avako".
19 Ana"- naonhaung" Mao"So Asang re naonhaung" aung khug nhag' lam: alhab' we' naonhaung" myid alhab' we' naonhaung" Mao"So re caung da" byid: ge,. Asang: Dao: Thang" Ban" we' yao: re caung:pa" ru mae ci: ra" gyang" lho" ra" zai gatau alhab' re naonhaung" aimae qo" ke' to: genae" qhid' mae" Caung:pa" Yham re kad' qhid gese,- ga: ta" ra".