12
Benyamin Kaung Mae" Sao Qhid' Mae" Davi Nho: Thao Cao" Mo,
1 Davi wa kho:kham Sholu nho: lo, mae" phao: loe; lo" mung: Ziglag jo, qo mae yena: jo; ra". Aimae Sholu nho: byu qe ngad ko" ra" Benyamin kaung bobo mo, ngad: ra" thaung" qhug' qu" ru myo" ra" mo,- lam ga" ra" gyezo: qe myo:sho' mo,li" boqhan" ako".
2 Yao: bam wa myo: bag jhao mung: lo, yo lo, kaung: laug lhaui: jhao mo, ngad: ako".
3-7 Yao: bam wa Gibeon mae" Shema nho: yauggai zo: Ahizera we' Yosha tao: yang eib: ra" qao: mae na: ako".
Cebam wa Azmaved nho: yauggai zo: Yezie we' Peled
Anathad mae" Beraka we' Yehu
Mang qi" ra" gyezo: ngad mung: au: jhaung Sam xe mae" dayaug ngad: ra" Gibea mae" Ishmaia
Gedara mae" Yeremia- Yahazie- Yahanan we' Yozabad
Harib mae" Eluzai- Yerimod- Sealia- Shemaria- we' Shephatia
Kora kaung mae" Elkana Ishia- Azare- Yoeze we' Yashobeam
Gedora mae" Yeroham nho: yauggai zo: Yoela we' Zebadia ga" ra" gyezo qe ngad: ako".
Gad Amyu" Kaung Mae" Davi Nho: Thao Cao" Mo,
8 Cebam wa Davi din"pyad' yo gyetab mae na: ra" au: yao" gyetab we' li" boqham: ko" ra" Gad amyu" kaung mae" mang qi: mung: thaung" qhug' qu" ru myo" ra" gyezo: qe: mang ngad: ra". Yao: bam wa go we' lhae tad' ci jhao mo, khang khyi myo,nho ru: ngad mo,- bam mae" yo: ru: mye, mo,- ngad: ako".
9-13 Yao: bam wa o mae" we' dakhyo: aya: qo" ako". Ai wa Ezera - Obadia - Eliab - Mishmanna - Yeremia - Atai - Elie - Yohanan- Elzabad- Yeremia- Makbanai- bam ngad: ako".
14 Gad amyu" kaung mae" byu daqhae: wa byu dataung re eib: ra" gyezug: qe- gatau daqhae: wa byu dayo re eib: ra" gyezug: qe ngad: ako".
15 Yao: bam wa Yodan gyaung: dung" kam" loe" sho' qid joe" ra" ayo, sao qhid' mae" lho" khye' mae qid gyaung: re gau" de, mung:- qid gyaung: ba thug' shad'- bavao shad' mae" lao:khaung: mae na ko" ra" byu qere khe' sin" pye' ako".
Benyamin We' Yuda Kaung Mae" Thao Cao" Mo,
16 Dalhang mae Benyamin we' Yuda kaung mae" byu daphung: wa Davi na: ra" gyetab khyo ye" ako".
17 Davi wa yao: bam re yetug: yu mung: naonhaung" ngo re bao" thaug' nae" ba nam khyo" joe" li" ko" ngad: re wa cemae naonhaung" re pang" yu: ra". Ngonhaung" we' qhan: gela,- Ngadqere: naonhaung" ngo re gyevo qe: lo, khyo ab byid: nae" seim" yang: ngad: re wa naonhaung" re ngo dae mate' sho' ngad qere: ngonhaung" nho: phug' pho" qenho: Mao"So wa ai re ba mung: naonhaung" re qobo dae byid' li" nae"- ga: ta" ra".
18 Mao"So: byo wa yao: bam mae" byu dayaug ngad mung: thao phyao: Sam Xe yaug au: jhaung gyezug: boe" lo yang: Amasai re vao: jaung" mung:-
yao: wa Yese nho: yauggai zo: Davi we"- ngonhaung" wa ni" byu qe ngad:-
nao wa aung myaug mung: nao re bao" thaug' mo, wa aung myaug shao: Mao"So wa ni" shad' mae ngad: ra" wo"- ga: ta" ra".
Davi wa yao: bam re lham: pang" yu mung: gye tab mae zug: kad' nhao: ra".
Manashe Kaung Mae" Thao Cao" Mo,
19 Manashe amyu" kaung mae" gyezo: daqhae: wa Sholu kho:kham re gye zin: nae" qhid' mae" Davi we' Philisti byu qe we' daga" ye" lo" au: re Davi shad' khyo ye boqhan" ako". Yao: wa gai gai: yao: Philisti byu qere mabao" nae" pe"mung: gare yao: wa yao: bam: kho:kham qe wa yao" nho: asang axug' Sholu lo, khyo yao: bam re ab byid' pye' li" nae" ga: gyaug: ako". Ai mung: yao: bam wa yao: re Ziglag khyo dam: tug' nhao: ke' ako".
20 Cebam wa yao: dam: tug' lo: na: au: Davi shad' khyo ye bode, ko" ra" Manashe amyu" kaung mae" gyezo: qe ngad: ako". Aibam wa- Adna- Yozabad- Yediae- Mikhae- Yozabad- Elihu- Zilethai bam ngad: ako". Manashe amyu" kaung mae byu dataung taung re eib: ra" mo, bo: ako".
21 Yao: bam wa Davi re yao" gyetab jham re zug: kad' byid' ra" khyo" caung da" byid' ako". Pe"mung: gare yao: bam alhab' wa baug thug' ra" gyezo: qe ngad: ako". Thao phyao: yao: bam wa Israel gyetab mae zug: qe ngad: ako".
22 Ba khao: ngo" ein nae" Davi nho: gyetab mae byu sag' qe qhan" lo: ako". Aimung: yao" gye tab wa dazab za: laug: li" ra".
Davi Nho: Gye Qam: Mang Japhin: Jham
23-37 Davi Hebron mae na: au: Asang dao:so: byid' to" ru we' dakhyo: Sholu khu mae yao: re kho:kham toe' nae" qhid' mae" mho" to" ra" gyezo: qe myo: sho' yao" gyetab mae boqhan" ako".
Ai bam wa Yuda amyu" kaung mae" go we' lhae tad' jham ci: ra" gyekhin ve; ra" gyezo: 6,800 yaug- Simon amyu" kaung mae" nyang" mho" to" ra" gyezo: 7,100 yaug-
Levi amyu" kaung mae" 4,600 yaug-
Arun nho: myid:zo: Yehoiada nho: thao cao" mo, 3,700 yaug-
Zadog nho: ba nam qe ngad: ra" zolau: sulhe: au: jhaung 22 yaug-
Benyamin (Sholu nho: amyu" kaung) mae" 3,000 yaug (Benyamin amyu" kaung mae" byu myo: phyao: wa Sholu re jhaug' zaug: na: ako".)
Ephrim amyu" kaung mae" yao: bam: kaung mae mang qi" ra" gyezo: 20,800 yaug-
Bavao shad' Manashe amyu" kaung mae" Davi re kho:kham kad' nhao nae" khyin: nhao: ke' qhug' mo, 18,000 yaug-
Isakha amyu" kaung mae" yao: bam eib: ra" qao: mae" na: ra" mo, we' daga" au: jhaung qe 200 yaug(Ce: au: jhaung qe wa Israel byu qe pe" kad' ang: ru we' ai re kad' nae" gai: thao" ra" ayo, re ba mo, ngad: ako".)
Zibulun amyu" kaung mae" shae lhae ja: khao: ngo" ci nae" mho" to" ra" jhaug' zaug: ru we' gye zin: nae" jin" jin" lam ga" ra" gyezo: 50,000 yaug
Nabhtali amyu" kaung mae" au: jhaung 1000 yaug - go we' lhae tad' jham ci: ra" gyezo: 37,000 yaug
Dan amyu" kaung mae" mho" to" ra" gyezo: 28,600 yaug
Ashe amyu" kaung mae" gye poe qhid' mae" jin" jin" ngad: ra" gyezo: 40,000 yaug
Yodan gyaung: ba thug' shad' mae" amyu" kaung qe ngad ko" ra" Rubin- Gad- Bathug' shad' mae" Manashe amyu" kaung mae" shae lhae ja: khao: ngo" ba ci nae" mho" to" ra" gyezo: 120,000 yaug- ngad: ako".
38 Gye poe qhid' mae" jin" jin" ngad ko" ra" ce: gyezo: qe alhab' wa Hebron khyo ye: mung: Davi re Israel mung" geim" re kho:kham kad' nhao nae" myid: phyid' ako". Israel byu qemae" dang: ra" gu: alhab' re: ai: mau" mae bomyid vang" ako".
39 Yao: bam wa aimae Davi we' sam ba lam: lam: thang: na mung: yao: bam: mao:nhaung: qeyang nyhang" jaung byid' ra" zo: shaug' poe mae zo: shaug' mung: kad' ako".
40 Amung: va" ra" mug: am: shad' Israel amyu" kaung Zebulun- Nabhtali amyu" kaung mae" byu qe zo:ve cin man"- pho' ham" shi:- sabyi shi: kyaug' sabyi' qang:- zhanlun xau- jham tho: ra" loze- gola:u- myao: jham we' nung jaung lo: jham re she: li" ako". Yao: bam wa se' zo: nae" nung:- yao jham rere: she: li" ako". Ceru wa mung"dan: geim" mae kham zo" ra" ngaui" bau" ra" khyo re qhu" byid' ra" lo, mau" ngad: ra".