13
Dao: Thang" Ban" Re Kiriad Yearim Mae" Qhui" Yu: Ru
(2 Sa 6.1-11)
1 Kho:kham Davi wa dataung eib: ra" gyezug: dayo eib: ra" gye zug: alhab' mo, we' byin phyo: jho" zin" ra".
2 Ai: thao yao: wa Israel byu alhab' re naonhaung" myid vang" mung: ngonhaung" Mao"So Asang: nho: myid o: ru ngad: re wa yao: bam: vogaung: jham mae na ko" ra" ngonhaung" nho: dang: ra" mao: nhaung: qe khinjaung qe Levi byu qejhao" lagyo: qere nhao: ke' mung: cetau ngonhaung" jhao" zang" li" geri: ein: ta" nhao: ke' gelang:-
3 Aimung: Sholu kho:kham kad' ra" gyo: mae pe" shui manho kad' to" ra" Mao"So: Dao: Thang" Ban" re ngonhaung" ye yu: yu nae" ngad: va"- ga: ta" nhao: ke' ra".
4 Amyu" byu qe wa ai: pha,jhi" byid dao: re gyo" ngaui mung: ai re myid vang" ako".
5 Aimung: Davi kho:kham wa Kiriad Yearim mae" Yerusalem khyo dao: yu nae" qhid' mae" mug: thao shad' Egutu mung" mug: kyo: mae" mug: am: shad' Hamad bam gyo: joe" sho' mae" Israel amyu" byu qe alhab' khai: zhang" yu: ra".
6 Davi we' amyu" byu qe wa kherubin dao mae zaung: ra" Asang: mang vin: ra" Dao: Thang" Ban" re dao: yu nae" qhid' mae" Yuda mug: myid mae jo, ra" Kiriad Yearim ga" ra" Bala vogaung: khyo do, lo" ako".
7 Yao: bam wa Dao: Thang" Ban" re Abinadab nho: yham mae" dao: thug' mung: lhin" asag' dalam: dao mae kai" ako". Uzala we' Ahino shid' yaug wa lhin" re jhui" she: ako".
8 Ai: au: Davi we' amyu" byu qe alhab' wa Mao"So re nga: yhe' byid' ra" khyo" yao: bam qo" go" qhi" go" nhan" ako". Yao: bam wa Nghaui"caung:- tang: be, zang be,- jhe' cang" be,- labo" mad mung: kad' ako".
9 Yao: bam ai ru: kad' mung: Khidon nho: gaug nao: jao: khyo joe" lo ko" au:- nung: lo: tao tha" lang: mung: Uzala wa yao" lo, re yheim" ke' yang: Dao: Thang" Ban" re ye zaui" ke' ra".
10 Dalhang: dae Asang wa Uzala re nhag' yo: mung: ban" re zaui" ra" mathao mae yao: re se' pye' ra". Yao: wa aimae Asang: qhid' kheim: mae shid lo" ra". Aimung: ai: jo, qo re ai: ba na mae" Pere-uza ga: mhang" ako".
11 Asang nhag' yo: yang: Uzala re qobo dae byid' ru yang Davi nhag' jam: yo" ra".
12 Ai: thao lao" Davi wa Asang re gyaug mung: Ana" ngo khoru: kad' yang: Dao: Thang" Ban" re ngo we' daga" qo" ci lo" nae" i? ga: ta" ra".
13 Aimung: Davi wa Yerusalem khyo yao: we' daga" ai re wa maci lo" ngad: ra". Ai: atha"- Gat vobyu Obed Edom ga: mhang" ra" yaug: yham mae to: co' ra".
14 Ai tau mae lho" sam khye' jo; jo, mung: Asang wa Obed Edom nho: yham khaung re we' yao: sang: ra" ja: alhab' re shaman" to byid' ra".