11
Davi Israel We' Yuda Kho:kham Boe" Lo: Ru
(2 Sa 5.1-10)
1 Israel byu qe alhab' wa Hebron khyo Davi jhao" ye: mung: yao: re ngonhaung" wa ni" sho: ni" sa: qe yao: ngad:-
2 Lai: lo: ayo, mae Sholu wa ngonhaung" nho: kho:kham ngad: au: re lhao" re- nao wa Israel byu qere gye khe' poe mae jhui" au: she: lo: ra". Yao" byu qere nao jhui" au: she mung: yao: bam: kho:kham boe" lo: li" nae" ga: ni" Mao"So Asang wa nao re dao:so: byid' to" ava"- ga: ta" ako".
3 Aimung: Israel byu qe: au: jhaung qe alhab' wa Hebron khyo kho:kham Davi jhao" joe" li" ako". Yao: wa yao: bam we' gyang" lho" ra" myid vang" ba nam kad' ra". Yao: bam wa yao: re xau gyad byid: mung: Samuela nhad' khyo" Asang: dao:so: byid' to" ru we' dakhyo: Davi wa Israel kho:kham boe" lo: ra".
4 Kho:kham Davi we' Israel byu qe alhab' wa Yerusalem re gye ye zin" ako". Ai: pyad mae Yebu ga: mang qi" ra" ai: mung" mae azhao: mae" na: jo, ko" ra" Yebusi byu qe wa aimae na: jo; shiko" ra".
5 Yebusi byu qe wa Davi re vogaung: akhug khyo khonhae" re: maqo" vao ye: nae" ga: ta" ako". Ngadqere: Davi wa yao: bam: Ziun gyetab re sang: yu: pye' mung: ai wa Davi nho: vogaung: khyo" mang thug' lo: ra".
6 Amung: Davi wa Yebusi byu qere sao qhid' se' ra" yaug wa gye tab mae" zug: mo" boe" nae"- ga: ta" ra". Zeruia nho: yauggai zo: Yoab wa gye khe' poe re jhui" au: she mung: gyezug: mo" boe" lo: ra".
7 Davi ai: gyetab mae yena: ru yang ai ru wa Davi nho: vogaung: ga: mhang" ako".
8 Yao: wa ai: vogaung: re dam: zao mung: ba thug' shad' mae" bug gaung dao mae myid zhai: pyang" yang: zao: qhid: ra". Yoab wa vogaung: dang: ra" dau re dam: te" ra".
9 Davi wa qam: bo: ra" Asang yao: we' daga" na: ru yang je je qam: bo: li" ra".
Davi Nho: Mang Qi" Ra" Gyezo: Qe
(2 Sa 23.8-39)
10 Cebam wa Davi nho: mang qi" ra" gyezo: qe: mang ja phin: ngad: ra". Dang: ra" Israel amyu" byu qe we' daga" yao: bam wa Asang: yang dao:so: byid' to" ru we' dakhyo: yao: re kho:kham boe" sho' bao" thaug' byid: mung: yao" kho:kham mung"dan: re qam: bo: jo,sho' bao" thaug' byid' ako".
11 Sao qhid' yaug wa Hakmoni kaung mae" Yashobeam ngad mung: Sam yaug nho: au: jhaung ngad: ra". Yao: wa yao" lhae tad' yang byu sam yo zo: we' gye jho"zin: mung: alhab' mo, re gye poe mae se' pye' ra".
12 Mang qi" ra" Sam yaug mae" dayaug wa Ahohi kaung mae" Eleaza nho: yauggai zo: Dodo ngad: ra".
13 Yao: wa Pasdamin gye poe mae Davi shad' khyo bode, mung: Philisti byu qere gye zin" ra". Israel byu qe tao" phao: lo" na ko" au: yao: wa Bale gaug yo mae na: jo; ra".
14 Aimung: yao: we' yao" byu qe wa yo gaung: mae jo, qo yu mung: Philisti byu qere gye zin" ako". Asang wa yao: re qi: sho' aung doe; nhao: ra".
15 Daba mae gyezug: sam xe mae" sam yaug wa Philisti byu daphung: Rephaim lao: khaung: mae jamu kad' na ko" yo, mae Adulam laug aug' nhae mae" Davi na: jo; ra" laug byo, khyo ye" lo" ako".
16 Ai: yo, mae Davi wa bug gaung mae gyetab khug mae na: jo; ra". Philisti byu daphung: wa Betlehem re sang: yu: pye' ako".
17 Davi wa yham khyo myid mung: Betlehem vogaung: kham: nhae mae jo; ra" qid thaung: mae" qid- dayaug yaug: yang ngo re khe' jhaug' ko" qa: we"- ga: ta" ra".
18 Mang qi" ra" gyezo: sam yaug wa Philisti byu qe: jamu gaung: khyo" kho' vao ye: mung: ai: qid thaung: mae" qid ye khae: yu yang: ai re Davi jhao" ci lo byid' ako". Ngadqere: Davi wa ai re mashaug' ngad: ra". Ai: atha"- Asang re byid' ra" ngaui" xeim: khyo" yao: wa ai re vhe' khyo" pye' mung:-
19 Ngo khoru: maqo" shaug'- ceru wa yao: bam yao" kao so' dam yang: kad' ko" ra" ce: byu qe: sa: re shaug' ruru: boe" nae" ga: ta" ra". Aimung: yao: wa ai re mashaug' lo: ha: pye' ra". Cejham wa mang qi" ra" gyezug: sam yaug: nho: mazag mavae kad' ra" lo, mau" jham ngad ra".
20 Yoab nho: yao: nhaung: Abishai wa mang qi" ra" Sam xe yaug: nho: au: jhaung ngad: ra". Yao: wa yao" lhae tad' yang byu sam yo zo: we' gye jho"zin: mung: alhab' mo, re se' pye' mung: sam xe yaug: phaung mae mang qi" li" ra".
21 Yao: wa Sam xe yaug mae" mang qi" thao" yaug ngad: ra". Amung: yao: wa ai bam: au: jhaung boe" lo: ra". Ngadqere: yao: wa Sam yaug nho" mang maqi: ngad: ra".
22 Kabze mae" Yehoiada nho: yauggai zo: Benaia wa mang qi" ra" gyezo: ngad: ra". Yao: wa qam: bo: ra" Moba sulhe: shid' yaug re se' ru bobo mung: Sulhe: lo, mau" myo: sho' kad' yaug ngad: ra". Dalhang mae yao: wa gyu: khyo" ra" ba na daba mae dung: gyan: dalam: khyo gyo" ye: mung: khang khyi dadau: re yese' pye' ra".
23 Yao: wa lhae tad' mo" zang ci mung: ngo" daung" qhang: ra" Egutu byuqi: dayaug rere: se' pye' ra". Benaia wa yao: re thaung kang: yang be, mung: Egutu byu pho" lo, mae" lhae tad' re lhad' yu mung: ai: yaug thug' se' pye' ra"
24 Ai jham wa Sam xe yaug mae dayaug ngad: ra" Benaia nho: sulhe: lo, mau" jham ngad: ra".
25 Yao: wa Sam xe yaug phaung mae baug thug' yaug ngad: ra". Ngadqere: Sam yaug nho" mang maqi: ngad: ra". Davi wa yao: re yao" kao zaung" au: jhaung kad' nhao: ra".
26-47 Cebam wa baug thug' ra" gyezo: qe ngad: ako".
Yoab nho: yao: nhaung: Asahe
Betlehem mae" Dodo nho: yauggai zo: Elhanan
Harod mae" Shamod
Peled mae" Heleza
Tekoa mae" Ike nho: yauggai zo: Ira
Anathod mae" Abieze
Husha mae" Sibekhai
Aho mae" Ilai-
Netopha mae" Maharai
Netopha mae" Bana nho: yauggai zo: Heled-
Benyamin mug: Gibea mae" Ribai nho: yauggai zo: Ithai
Pirathon- mae" Benaia
Gasha nhae mae jo, ra" lao: khaung: jham mae" Hurai
Arba mae" Abie
Bahurum mae" Axmared
Shalbon mae" Eliahba
Gizon mae" Hashem
Harara mae" Shage nho: yauggai zo: Yonathan
Harara mae" Sakhara nho: yauggai zo: Ahiam
Ura nho: yauggai zo: Eliphala
Mekhera nho: yauggai zo: Hephera
Pelon mae" Ahiya
Khame mae" Hezro
Ezbai nho: yauggai zo: Naarai
Nathan nho: yao:nhaung: Yoela
Hagri nho: yauggai zo: Mibha
Amon mae" Zeleg
Berod mae" Yoab nho: shae lhae vo, yaug Naharai
Yati mae" Ira we' Gareb
Hiti byu Uria
Ahlai nho: yauggai zo: Zabad
Shiza nho: yauggai zo: Adina (Yao" nho: phung: gyezo: sam xe we' daga" Rubin kaung mae" au: jhaung mae bobo yaug ngad: ra".)
Makha nho: yauggai zo: Hanan
Mithan mae" Yoshaphad
Ashtera mae" Uzia
Aroera mae" Hotham nho: yauggai zo: Shamma we' Yeie
Tiza mae" Shimri nho: yauggai zo: Yediae we' Yoha
Mahava mae" Elie
Elhnan nho: yauggai zo: Yeribai we' Yoshavia
Moba mae" Hhma
Zoba mae" Elie- Obed- Yasie bam ngad: ako".