10
Kho:kham Sholu Shid: Ra" Khyo
(1 Sa 31.1-13)
1 Philisti byu qe wa Israel byu qe we' Gelboa bam mae gye jho" zin" ako". Israel byu qe myo: sho' aimae se' pye' qhug' ako". Dang: ra" gu: kho:kham Sholu we' yao" yauggai zo: qe bobo mung: tao" phao: lo" ako".
2 Ngadqere: Philisti byu qe wa yao: bam re cao" khe' myhi mung: Sholu nho: yauggai zo: Yonathan- Abinadab- Malkhishua bam re se' pye' ako".
3 Gye khe' poe wa Sholu lhang" gam: mae gyai thin mung: yao: re gyevo qe: myo: jham: yang bag zao" yang: dae xo sho' de; ra".
4 Yao: wa yao" nho: shae lhae ci byid' ra" zolau: pho" re ce: Mao"So malam: ra" Philisti byu qe yang ngo re maqu" jung" genae" qhid' mae" ni" shae she: yu yang: ngo re se' la,- ga: ta" ra". Ngadqere: ai: zolau: pho" wa ai ru: kad' nae" gyai gyaug: na: ra". Aimung: Sholu wa yao" shae pyang: re phoe' yu mung: ai re thug' zau" shid: lo" ra".
5 Zolau: pho" wa Sholu shid: rure myao lao" yao: re: yao" shae pyang: phoe' yu yang: aimae thug' kyao" shid: pye' ra".
6 Aimung: Sholu we' yao" yauggai zo: sam yaug geim" daga" shid: lo" ako". Amung: yao" nho: myid:zo: qe dayaug re: maeib loko" ngad: ra".
7 Yezre lao: khaung: mae na ko" ra" Israel byu qe wa- gye zo: qe tao" phao: lo" mung: Sholu we' yao" yauggai zo: qe shid ko" ra" khyo re the' gyo: gelao"- yao: bam vogaung: jham re shapye' to: co' mung: tao" phao: lo" ako". Ai: thao Philisti byu qe joe" li" mung: ai: jham re li" sang: pye' ako".
8 Gye khe' poe thao: ba re Philisti byu qe wa mao gaung jham re ye lhad' yu nae" ye" lo" gemung: yao: bam wa Sholu nho: maogaung we' yao" yauggai zo: qe: maogaung jham Gilaboa bam mae lang" jo; bam ko" rure ye myao: ako".
9 Yao: bam wa Sholu nho: au: re phyid' pye' mung: yao" gyekhin jham re khyad' shao: yu yang: yao: bam: so alho jham we' yao: bam: mung" byu qe re lau dao: gai Philisti mung" geim" khyo jao: sho' ta"hau" lo" nae" qhid' mae" lagyo: qere nhao: ke' ako".
10 Yao: bam wa yao" shae lhae re yao: bam: caung:pa" yham dalam: mae to" to: mung: yao au: lam: re yao: bam: so Dagon yham mae lhao" to" ako".
11 Gilead mae na ko" ra" Yabe byu qe Sholu re Philisti byu qe pe" ru: kad' ko" ra" khyo re the' byo: gelao"-
12 Lhe" thao" ra" mo, ye: mung: Sholu we' yao" yauggai zo: qe: mao gaung jham re ye yu yang: Yabe khyo dao: lo: ako". Yao: bam wa ai tau mae" Shakhai: gae mae qao mae ai bam re nyhab' pye' mung: nhad' ba lam: lam: zo:ve jao" ako".
13 Sholu wa Asang re- jhaug' mazaug: ruyang shid: ra". Yao: wa khyo shid' ru qhug' nae" qhid' mae" Asang we' jho" qham nae" atha"- sushid qe: byo jham we' jho" qham mung: khyo qho: ra".
14 Aimung: Asang wa yao: re se' pye' mung: Yese nho: yauggai zo: Davi re mung"dan: re eib nae" byid' pye' ra".