CAUNG: KHIN" 72
Kho:kham: Qhid' Mae" Akyu" Mho' Ra" Dao:
(Sholamon peim: ru)
1 O" Mao"So we"- ni" kho:kham nho: dangman" ruyang dao: kho' byid: nae" qhid' mae" mho" shid' byid: wa,-
yao: re nao yao" tarha" din: nyang: ru myho" byid: wa,.
2 Ailao" yao: wa ni" byumyu" qe: dao mae tarha" din: nyang: ra" khyo" eib: na mung:
deim" zag zo: qhug' mo, re dangman" ra" khyo" yang eib: li" nae".
3 Ai: mug: myid wa qo" zo: qo" shaug' mung: dangman" rure qo" kham zo: vashao: wo".
4 Kho:kham wa myaung sho: mo, re tarha" din" ra" khyo" dao: kho' mung:
maqo" mo, re bao" yu: ru we' yao: bam re deim" zag zo: mo, re jeim: nhao vashao:.
5 Ni" byumyu" qe wa- ba za: azho: na na wa- joe" lo nae" ayo, mae
lho" azho: na na mae nao re caung:pa" na vageshao:.
6 Kho:kham wa yothaung: din" jham mae mug: we' dakhyo:- myid gaung mae qu: tag' byid' ra" mug: ce' we'
dakhyo: angad: na vashao:.
7 Yao" apyad mae dangman" ru bu" yaung" bam vashao:-
Lho" azho: na na mae re: qo" zo: qo" shaug' na: dai: ru gang" tang: jo, vashao:.
8 Yao" nho: kho:kham mung"dan: wa panglai: datham: mae" datham: joe" sho' mae
Uphrad qid gyaung: mae" mug: myid thao" sho' lu: jo; li" nae" wo".
9 Din" pyad' yo mae" byu qe wa yao" qhid' kheim: mae goe; pa" li" genae".
Yao" gyevo qe wa yao: bam yao" gaung re myid gaung khyo goe; gyo" khyo" li" genae".
10 Spain we' gagyo: kao" mae" kho:kham qe wa
yao: re jhaung qhu" byid: mung: Sheba: we' Seba mae" kho:kham qe wa yao: re ngaui" xeim: jham cili" byid: genae".
11 Kho:kham alhab' wa yao" qhid' kheim: mae goe; pa" mung: byumyu" alhab' wa
yao: re caung da" byid' li" genae".
12 Yao: wa yao: re hug' khai: ra" myaung sho: mo, we' jo,nho" maqo" mung: su: yang
qu" lhaui" to: mo, re khyad' khyui: yu: ra".
13 Yao: wa qam: nang: mung: myaung sho: mo, re nhag' khyag' yu: ra".
Yao: wa bao" yu ca" mo; nho: kao so' re khyad' yu byid' ra".
14 Yao: wa yao: bam re deim" zag zo: qhug' rumae" we' aqan alan gye mae" khyad' khyui: yu: ra".
Yao: bam: kao so' wa yao" qhid' mae" gyai phug' de; ra".
15 Kho:kham kao qhang vashao: wo"-
yao: re Arabia mung" mae" qhang li" byid: vageshao:-
Yao" qhid' mae" yo, byang" sho' akyu" ceim" mho' byid' na vageshao:- Mao"So: shaman" jeju jham wa yao" dao mae khonhae" re: ajo; jo, vashao:.
16 Ai: mug: myid mae gaug zo myo" laug: jo, vashao:
ai: bug gaung jham mae wa Lebanon mae" qhovo: qhoshi: we' dakhyo:- gaug zo jham byang" sho' yaug: jo, vashao:- vogaung: mo" jham wa vohau: byang" sho' yaug: ra" jao: dae jham we' dakhyo: byu jham byang" jo, vageshao:.
17 Kho:kham: nho: mang re khonhae" re: mato" myhid' pye' vageshao:
yao" mang lahau: qi" ru wa ba ajo; jo, mae gang" tang: jo, vashao:- byumyu" alhab' mo, wa Mao"So: yang kho:kham re shaman" byid' lo: ru we' dakhyo: yao: bam re shaman" byid: nae" qhid' mae" Mao"So re ceim" mho' vageshao:.
18 Israel nho: Mao"So Asang re caung:khin" byid: ge,- airu" ra" mug' pho: mau" jham re
kad' ru yao: za: ngad: ra".
19 Yao" phungbao qi" ra" mang a re apyad ato mae caung:khin" byid: ge,
yao" phungbao wa mug: myid geim" mae byang" jo, vashao:-
20 Ce:mae Yese nho: yao: zo: Davi akyu" mho' ra" dao: jham thao" va".