CAUNG: KHIN" 71
Mao: Zo: Phug' Dayaug: Nho:Akyu" Mho' Dao:
1 Asang we" ngo wa nao jhao" gug: gam: ru qo" yu nae" qhid' mae" li" va".
Ngo re khonhae" re: dajeim: nhao la,.
2 Nao wa din:man" rumung: ngore bao" ru we' khyad' khyui: yu la,-
ngore tae" gyo: byid: mung: khyad' yu la,
3 Nga" qhid' mae" gug: gam: ra" khug jo, qo boe" mung:
ngore gug: gam byid: nae" qhid' mae" gang" tang: ra" gye zaung boe" byid: la,- nao wa nga" nho: khug jao: we' gug: gam byid: yaug ngad: ra".
4 Nga" Mao"So we"- nhag' lam: kaui: ra" makhyang: mashab mo; lo, mae"
aqan alan mung: makhyang: mo; ra" kheim: so' mae" ngore khyad' khyui: yu la,.
5 Kho:kham Asang we"- nao mae ngo myid: lao" na: ra". Ngo ngai shi" yo, mae" nao re lam khug: lo va".
6 Ngo wa nga" pyad dapyad: geim" mae nao re khug ngha: lo va".
Nao wa ngore ngo khau: li" ra" ba mae" gug: gam byid' lo va". Ngo wa nao re khonhae" re: caung:khin" byid' na nae".
7 Nao wa nga" qhid' mae" qam: bo: ra" gug: gam byid: yaug ngad: ruyang
nga" apyad wa myo: sho' mo; qhid' mae"- aso: gai boe" lo va".
8 Ngo wa daba: geim" nao re caung:khin" byid: mung:
ni" phungbao re hau" kyo" na:.
9 Ana" ngo mao: yo, re ngore dangag: lhaui" pye'. Ana" ngo qam: nang" lo" au: re
ngore dashapye' to: co'.
10 Nga" gyevo qe wa ngore se' pye' nug: ako".
Yao: bam wa nga" khyo re ta" mung: ngore kung" na: ako".
11 Yao: bam wa Mao"So: yang yao: re shapye' to: va". Yao" thao cao" ye: mung: yao: re
taung: gelang:- yao: re khyad' khyui: yu nae" khag' mana- ga: ta" ako".
12 O" Mao"So we"- va: va: mae dana: jo,- nga" Mao"So we"-
ngore phyad li" bao" yu la,
13 Ngo re gyekhe' mo, wa seim" mung: phyo' qheim" pye' ru qhug' geshao:
ngore dae te' nae" ga: phin: mo, wa qho' thug' mung: myo, nho sham vageshao:
14 Ngo wa khonhae" re: nao mae myid: lao" na nae".
Ngo wa nao re je: je: caung:khin" byid: nae".
15 Ngo wa matho' ba: gyo: qere: ni" nho: gai: ra" khyo re
ta" kyo" na nae" ni" khyad' yu: ra" khyo re daba geim" ngo ta" na nae".
16 Ngo wa Asang: qam: so' khyo" kao so' daui nae"- ngo wa
nao Asang dayaug za" nho: gai: ra" khyo re ta" hau: nae".
17 Ngo ngai shi" mae" nao ngore mho" shid' lo va". Ngo wa ana" joe" sho' ni" nho: mug' pho: lo,
mau" jham re ata" kyo" na shi".
18 Ana" ngo mao: mung: xae phyu va"- O" Mao"So we"-
ngore dashapye' to: co' la,-
Ce: thao: ne, mae" myid:zo: qere ni" nho: kheim: so' we' qam: o: re ngo: yang ta" hau: byid' au: re ngo we' daga" na byid: la,
19 Mao"So we"- ni" dangman" ra" khyo wa mug: kin joe" lo" va".
Nao wa qi" qhang: ra" mau" zo" jham re kad' ava". Nao we' dau ru khag' mana ngad: ra".
20 Nao wa nga" dao mae qug: khai: jham we' dayin dayo: dae no: ru byid: va".
Ngadqere: nao wa nga" qam: re dam: ke' byid: nae"- nao wa ngore lab khyo majoe" nhao ngad: ra".
21 Nao wa ngore ga-au: mae" tho' je: qi" qhang nhao mung: nao wa ngore dam: nhag' tang" byid' li" nae".
22 Ngo wa nao re gaigai: yao: tang: be, mung: caung:khin" byid: nae".
Nga" Mao"So we"- ngo wa ni" jhaug' zaug: rure caung:khin" byid: nae". Israel nho: Gyang" Lho" ra" yaug we"- ngo wa nga" thoe: yang nao re Nghaui"caung: be, yang: caung: byid: nae".
23 Nao re ngo tang: be, zo" re" ngaui bau: ngaui lho" hug' nae".
Nao wa ngore khyad' yu mung: nga" gaung khyao alhab' yang nao re nghaui"caung: byid: nae".
24 Ngo re dae te' nae" ga: phin: mo, seim" lo" mung: nga: ngai: lo" ko" ra" mathao mae
ngo wa ni" nho: dangman" ra" khyo re daba geim" ta" na nae".