CAUNG: KHIN" 73
SAM PAUG'
Mao"So: Nho: Tarha" Din:man" Ra" Khyo
(Asab peim: ru)
1 Mao"So wa gaigai: yao: Israel dao mae gai: ra".
Nhag' lam: gyang" yaung" mo; dao mae gai: ra".
2 Ngadqere: ngo wa myid: lam: ru alaug ci:phyaug' lo" na va".
Nga" nho: lam khug: myid alaug baui" byaug va".
3 Pe"mung:ga"re ngo wa nhag' lam: kaui: ra"
makhyang: mashab mo, mae aja: ja: mae khyao khyao za: gai: rure the' myao lao" ngad beim: mo, re lhaung" qu" nhung: li" ra".
4 Yao: bam wa no phyo: ga: ru made, zo:-
yao: bam wa qao" zin: mung: qam: bo: ako".
5 Yao: bam wa su gayaug ru: dayin dayo: made, zo:-
Yao: bam wa gaje: byu qe leim zo" na: ra" qug: khai: re maqhug' ngad: ako".
6 Aimung: yao: bam wa ngad beim" rure qui: we' dakhyo: ve; ci: ako".
Aqan alan mau" rere: bau: qhang we' dakhyo: ve; ci: ako".
7 Yao: bam: aung khug mae" makhyang: mashab: ru phoe' thug' ke' ako".
Aimung: yao: bam: nhag' lam: jham wa makhyang" ra" mau" zo" re myid: kyae mung: magung: mung: na: ako".
8 Yao: bam wa su gaje re qi: pye' mung: makhyang: mashab: ra" dao: jham re ta" ako".
Yao: bam wa ngad beim: mung: su gaje re deim" zag zo: nae" byin phyo: zin" yaung: to" ako".
9 Yao: bam wa mug:gaung mae" Mao"So: khyo re
magai makhyang" ru ta" mung: myid gaung dao mae" byu qere nhag' lam: myhao: ra" amyin" dao: jham byid' ako".
10 Aimung: Mao"So: byu qe lhao" re: yao: bam jhao" lhang: lo" mung:
yao: bam ta" ru ja: khao: ngo" re kao bau taung" lam" ako".
11 Yao: bam wa- Mao"So maba nae"-
myhao: thao" yaug maqhug' myao nae" ga: ta" ako".
12 Nhag' lam: kaui: ra" makhyang; mashab mo, wa airu: ngad: ako".
Yao: bam mae magan: mago" qo" jo, ngadqere: khonhae" re: je yang: ayu: na: ako".
13 Airu: angad: re wa nga" gaung re gyang" shao sho' na mung:
qobo makad' lo: na: jo; ru pe" aphug' made, lo: i?
14 O" Mao"So we"- nao wa ngore daba geim" dayin dayo: de, zo: nhao ra".
Nao wa ngore ne, seim khao: ngo" qobo dae byid' ava"
15 Ngo airu" dao: qe ta" ngad: re-
ngo wa ni" byumyu" qemae" dayaug khyo" kad' na nae" mangad:
16 Ngo wa ce:ra" khyo re myid: qu" va"- ngadqere: ni" Caung:pa" Yham khyo joe" ye: sho'
nga" qhid' mae" maqo" phyid naeqhi" qug' ra".
17 Ni" Caung:pa" Yham khyo joe" ye: thao she,
nhag' lam: kaui: ra" makhyang: mashab mo, mae pe" boe" lo nae" rure ba: gyo" li" ra".
18 Nao wa yao: bam re jhad' ra" jo, qo mae
nha: to: mung: yao: bam re byo; qeim: lo" ra" khyo
gyo" lo" nhao: li" nae".
19 Yao: bam wa ai jao" yao: phyo' qheim" pye' ru qhug' mung:
gyaug din taung" khyo" na: thao" ra" khyo gyo" lo" genae".
20 Yao: bam wa ne, seim joe" re byaug: lo" ra" yab mo, we' dakhyo: ngad mung:
O Asang we"- ni" gaung re nao nhug' to" ke' au: re yao: bam byaug: baui" lo" ako".
21 Ngo myid: ru kho: mung: nga" aung khug mae
ano zang mung: ra" au: re-
22 Ngo wa gug'nyhug' dadau: we' dakhyo: nhag' magyang: mung:
ngo nao re maba: gyo: ngad: ra".
23 Ngadqere: ngo wa khonhae" re: nao we' te' te' na mung:
nao wa ngore lo, mae" zhab' she: yu: ra".
24 Nao wa ngore ni" nho: mho" shid' ruyang
khyo jhui" shid' mung: lo" thao" mae nao wa ngore nga: yhe' ru we' lham: tug: yu: li" nae".
25 Mug: khaung: mung"dan: mae nao mae" lai yang gatau pe" re ngo qo shilo" i?
Nao re ngo qo" to: va" rumung: myid gaung dao mae ngo gatau pe" o shi:nae" i?
26 Nga" nhag' lam: we' nga" gaung khyao wa qam: ngau" lo" qere: Mao"So wa nga" qam: ngad: ra".
Yao: wa ngo mae ca" ru alhab' ngad: ra".
27 Nao re shapye' co' mo, wa dang za: byo; qeim: li" genae".
Nao wa nao mae jhaug' mazaug mo, re phyo' qheim" pye' li" nae"
28 Ngadqere: nga" qhid' mae" kam" wa Mao"So: nhae mae na mung:
kho:kham Asang mae" gug: gam: ru qhug' myao: yu: ru we' yao: kad' va" mau" zo" alhab' re qo" ta" hau" ru wa khoqhi" mug: pho: ngad sho' gai: ra" i?