CAUNG: KHIN" 62
Mao"So: Yang Gug: Gam Byid: Nae" Rure Myid: Lam: Ra" Khyo
(Davi peim: ra" Nghaui"caung:)
1 Ngo wa Mao"So: yang khyad' yu nae" rure nhag' lam: qhang qhang za: lao" na:-
Ngo wa yao: re za: khug ngha: na:.
2 Yao" yang za: ngore gug: gam byid: mung: khyad' yu: ra".
Yao: wa ngore gyevha byid: yaug ngad: ra". Aimung: ngo wa khonhae" re: majeim: nae".
3 Naonhaung" alhab' wa- gyoe; gyo" jo; ra" khyae bao tho'
qam: mabo yaug re khomyhao" myao" sho' xo' yang: ceim" khe' se' na genae" i?
4 Naonhaung" wa yao: re yao" nga: qo" ra" jo, qo mae" lao" khyo" pye' nae" za: myid: o: ako".
Naonhaung" wa mhug' ra" mau" mae myid: ngaui: ako". Naonhaung" nhad' mae" shaman" ra" dao: ta" qere: naonhaung" aung khug mae wa yao: re ceim" nhang" na: ako".
5 Ngo wa Mao"So re za: khug ngha: na:-
ngo wa yao: mae myid: lao" na: ra".
6 Yao" yang za: ngore gug: gam byid: mung: khyad' yu: ra".
Yao: wa ngore gyevha byid: yaug ngad: ra". Aimung: ngo wa khonhae" re: majeim: nae".
7 Nga" khyad' yu: ra" khyo we' nga: ye; ru wa Mao"So: dao mae ngha: jo; ra".
Yao: wa ngore qam: bo: ra" gyevha qhaung byid: yaug- nga" khug ngha jo, qo ngad: ra".
8 Nga" byumyu" qe we"- yo, byang" sho' mae Mao"So re lam khug: na ge,-
yao: wa ngonhaung" nho: khug jo, qo ngad: rumung: qug: khai: alhab' yao: re ta" shid' kyo: ge,.
9 Xao su byu alhab' wa so' damad za: ngad: ako".
Aqi: angai alhab' wa pe" aphug' made, ngad: ra". Yao: bam re- jao mae lag: qu" re jao pe" manao: ngad: ako". Yao: bam wa so' dalhang mad: thug' ke' man: tho' je: seim" ako".
10 Aqan alan mau" mae damyid: lam: na- lhad' khyad' yu mung: pe" qo" yu nae" re: damyid: lao".
Ni" jo,nho" myo" laug: li" re lhao" re: aijham: dao mae dangha wa,
11 Mao"So wa kheim: so' re yao" yang sang: to: mung:
yao" jhid'de; myid gang" tang: rure dalhang tho' mago" ta" thoe ngo the' gyo: va".
12 O" Asang we"- yaug khao: ngo" re yao: yao" lo, mau" re
cao" yang: nao yao" yang aphug' jhaung qhu" byid' ra" wo".