CAUNG: KHIN" 63
Mao"So Re Myid: Lao" Ra" Khyo
(Yuda din"pyad' yo mae Davi yejoe" na: au: Davi peim; ra" Nghaui"caung:)
1 O" Mao"So we"- nao wa nga" Mao"So ngad: ra".
Airumung:- ngo wa nao re nhag' nghae" na: ra". Nga" gaung khyao alhab' yang nao re kao bau: na: ra". Kyaug' ho mung: pe" mayaug: ra" qid majo; myid gaung we' dakhyo: nga" alo zo: wa nao re shab' na: ra".
2 Nao re ni" gyang" lho" yham mo" khug mae the' myao nhao la,- nao khoqhi" qam: bo mung:
phungbao qi" rure ngo the' myao nug: ra".
3 Ni" mabaui mabyo; ra" jhid'de; myid wa kao so' tho' mae" lhao" re: je: gai: ra".
Aimung: ngo wa nao re caung:khin" byid: nae".
4 Ngo adaui: na na wa nao re jeju beim: so: byid' na nae".
Ngo wa nga" lo, re tau mung:- nao jhao" akyu" mho' na nae".
5 Nga" alo zo: wa zo: shaug' mung: gyi: nae"-
Ngo wa nao re ngaui bau: nghaui" caung: jham caung: byid: nae".
6 Ngo wa yab qo mae lang" jo; au: re- nao re myid: beim" ra".
Ni" khyo re ngo damyi khyeim myid: qu" na:.
7 Pe"mung:ga"re nao wa- khonhae" re: nga" bao" thaug' yaug ngad: ra".
Ni" daung qab khug mae ngo wa ngaui bau: ngaui lho" nghaui"caung" ra".
8 Ngo wa nao mae cao: de; jo; rumung:-
ni" lo; yang ngore gug: gam byid' ra".
9 Ngo re se' pye' nae" ga: phin" na mo, wa-
movo: mug: khyo gyo" lo" byaug: li" genae".
10 Yao: bam wa gyekhe' jao: mae se' pye' ru qhug' mung:
yao: bam: mao gaung jham wa zag nae jham: yang zo" pye' byid' ru qhug' genae".
11 Mao"So: yang yao: re aung doe; ru byid' ra" mathao mae kho:kham wa ngaui bau: ngaui lho" ngad nae".
Mao"So: mang a mae dao:so: to: mo, wa yao: re caung:khin" byid' li" genae". Ngadqere: mhug' hab' qenho: nhad' jham re kam" wa pyid' pye' byid' ru qhug' genae".