CAUNG: KHIN" 60
Loe, Beim Nhao: Ke' Nae" Mo; Ra" Akyu" Mho' Dao:
(Naharai mae" we' Zoba mae" Arami byu qere Davi khe' zin: mung: Yoab dam: tug' lo yang: xo: lao: khaung: mae Edom byu 12000 re se' pye' au: mho" shid' nae" qhid' mae" Davi peim: ra" Nghaui"caung:)
1 Mao"So we"- nao wa ngonhaung" re ngag: lhaui" pye' byid: mung:- ngonhaung" re jeim: nhao va".
Nao wa ngonhaung" re nhag' yo: va". Ngadqere: ana" ngonhaung" jhao" dam: tug' lo wa,.
2 Nao wa myid gaung re nin" nhao: ra". Aimung: aire nao kho' sin" pye' ra".
Ai: ru wa agao gao byo; sin" lo" na: rumung: aire ana" dae gai byid: wa,.
3 Nao wa ni" byumyu" qere- xo sho' dayin dayo: kham zo: nhao: ava".
Ngonhaung" wa yhid yid: ruru: apyi avhang: su" qin" bam va".
4 Nao wa nao re gyaug phug' mo, re- byo; qeim: rumae"
loe, vageshao: ga: yang: ta" peim: byid' ra".
5 Ni" qam: so' yang ngonhaung" re khyad' yu la,- ngonhaung" akyu" mho' thoe re tau: byid: la,-
aire nao jhid'de; ra" byumyu" qe qo" loe; lo genae".
6 Mao"So wa yao" gyang" lho" yham mo" mae" Shekhem re aung doe; ruyang ngo kho' pyo: pye' nae".
Aimung: Sukod lao:khaung: re nga" byumyu" qe: qhid' mae" gae byid: nae".
7 Gilead wa nga" mae" ngad:- Manashe: re: nga" mae" ngad:- Ephrim: wa nga" jo, to' maug ngad:-
aimung: Yuda wa nga" kho:kham zaung: bao" ngad: ra".
8 Ngadqere: Moba, re nga" jarung: khyo" ci nae". Nga" khyid zhaung: re Edom mae pye' jam nae". Airu: kad' mung: aire ngo sang: ein: ra" aso: re qhu" byid: nae".
Philisti qe wa- ngore aung: pye' mung: qo" hug' nae" ga: myid ko" ra" i?
9 O" Mao"So we"- ngonhaung" re gye khyae kyae" lhaung" to" ra" vogaung: mo" khyo khag' yang jhui" ye: nae" i?
Edom khyo ngore khag' yang jhui" ye: nae" laug i?
10 Nao ngonhaung" re gaigai: yao: ngag: lhaui" pye' va" i?
Nao wa ngonhaung" gyetab we' daga" gyekhe' mathug' ye: lo: nae" i?
11 Ngonhaung" nho: gyevo re khe' zin: nae" qhid' mae" ngonhaung" re bao" yu la,-
xao su byu: yang jho" bao" ru wa pe" aphug' made,-
12 Ngonhaung" shad' mae Mao"So bo mung: aung doe, nae". Yao: wa
ngonhaung" nho: gyevo qere aung: pye' byid' li" nae".