CAUNG: KHIN" 59
Gug: Gam: Ru Qo" Yu Nae" Qhid' Mae" Akyu" Mho' Ra" Dao:
(Davi re se' pye' nae" qhid' mae" yao" yham mae Sholu yang byu nhao: ke' mung: lhaug' qu" na nhao thao Davi peim: ra" nghaui" caung:)
1 Nga" Mao"So we"- nga" gyevo qenho: lo, mae" ngore khyad' yu la,. ngore khe' zin" na: ra" mo, mae"
ngore gug: gam byid: la,.
2 Ai: makhyang: mashab mo, mae" ngore khyad' yu la,-
Ai: byu se' mo, mae" ngore khyad' khyui: yu la,.
3 Qu" qu" wa,- yao: bam wa ngore se' nae" ga: lao" na: ako". Akhyi: akyaung mung mo, wa ngore kung" nae" ga: phaung: ham: na: bam: ako".
Ngo pe" qobo qo" yang: re: mangad:- ngo pe" shad' nghung" ru kad' yang: re: mangad:.
4 O" Asang we"- ngo pe" qobo shad' nghung" to: yang: re:
mangad:- airu yao: bam yao" jo, qo khyo phao: lo" ako".
5 Qam: so' bo: thao' ra" Asang we"- To" mung: ngore li" bao" yu byid: la,-
Israel nho: Mao"So we"- nao yao: li" qu" myao: yu wa,- Mao"So re maba: ra" taung bug qere qobo dae byid: wa,- Makhyang: mashab: ra" phaug' lhag' lo" mo, re nhag' khyag' ru daqhu" byid:.
6 Yao: bam wa myi" thao zo" re dam: tug' li" mung:
lakha: jham we' dakhyo:
kyid' myang: qin" ako".
7 Yao: bam roe" ru we' kyaug' nhin" ra" thoe re tae" gyo: wa,- yao: bam: sho jham wa yao: bam: nhad' khug mae
shae pyang: jham we' dakhyo: ngadqere:- yao: bam wa yao: bam re khag' yang mathe' gyo: nae" ga: myid: jho: ako".
8 Ngadqere: Asang we"- nao wa yao: bam re qi: pye' byid: mung:
Mao"So re maba: ra" taung bug qere jung" pye' ra".
9 Ngo wa ni" qam: re myid: lam: to".
O" Mao"So we" nao wa nga" khug ngha jo, qo ngad: ra".
10 Nga" Mao"So wa ngore jhid'de; mung:- ngojhao" li" li" nae".
Yao: wa nga" gyevo qe jeim" lo" ru ngore myao nhao nae".
11 O" Mao"So we"- yao: bam re dase' pye'- Mangad: re- nga" byumyu" qe to" myhid' pye' li" genae".
Ni" qam" yang yao: bam re khe' sin" pye' mung: jeim: nhao wa,. O" Asang nga" gug: gam byid: yaug we"-
12 Yao: bam: nhad' qid mae qobo jo; ra". Yao: bam: dao: kheim: alhab' wa qobo de; ra".
Yao: bam: ngad beim" rumae myi" ru: qhug' vageshao:. Pe"mung:ga"re yao: bam wa nhang: mung: mhug' ta" ako".
13 Ni" nhag' yo" ruyang yao: bam re phyo' qheim" pye' wa,- yao: bam re bin sho' phyo' qheim" pye' wa,. Airu:lao" Mao"So wa Israel mung" mae eib: na: ru yaug khao: ngo" ba: lo" li" genae".
Yao" yang eib: ru wa- myid gye, geim" joe" lo" ru ba genae".
14 Nga" gyevo qe wa- lakha: jham we' dakhyo:
vogaung: mo" khug mae du" qin" mung: myi" thao: dau dam: tug' lo: ako".
15 Yao: bam wa zo:ve qho zo: du" qin" ra" lakha: lae" jham gyi: sho' maqhug' zo: mung:
kyid' myang: na: ru we' dakhyo: ngad: ako".
16 Ngadqere: ngo wa ni" qam: mathao mae nghaui"caung: nae". Ne, seim khao: ngo" ni" mabaui mabyo; ra" jhid'de; myid re- thoe myhao ke' mung: Nghaui"caung: na nae".
Nao wa nga" khug ngha jo, qo ngad mung:- qug: khai: qhug' ra" ayo, mae ba sham khug qo boe" lo: ra".
17 Ngo re qhaung: gam: yu yaug we"- nao re ngo caung:khin" byid' na nae".
Nga" khug ngha jo, qo wa Mao"So- ngore jhid'de; ra" Mao"So ngad: ra".