CAUNG: KHIN" 46
Mao"So Ngonhaung" We' Daga" Na: Ra" Khyo
(Kora kaung boe: peim: ra" nghaui" caung:)
1 Mao"So wa nga" khug ngha jo, qo we'- nga" qam: ngad: ra".
Qug: khai: qhug' ra" ayo, mae- khonhae" re: bao" yu nae" jin" jin" ngad: ra".
2 Aimung: myid gaung lab ngadqere: bam jham nammugdara tham: kao" khyo
gyo" lo" qere: ngonhaung" magyaug nae".
3 Pang:lai:: jham bang: lhung" to" yang:
myang ngadqere: myid lab: lab: mung: bug gaung jham laui" nan" ngadqere: ngonhaung" magyaug nae".
4 Mao"So: vogaung: mo" re myhao: thao" ra" yaug: gyang" lho" yham re ngaui bau: nhao: ra"
qid gyaung: dagyaung: yug: jo; ra".
5 Mao"So wa ai: vogaung: mo" mae na mung: ai wa khonhae" re: phyo' qheim" pye' ru maqhug' nae".
Mug: bo" myi: re yao: li" mung: aire bao" yu nae".
6 Byumyu" mung"dan: jham gyaug: din mung: kho:kham mung"dan: jham lab: nin" byaug: avako".
Mao"So: yang mug: gyug: gyug' ke' re myid gaung wa aqang: yug: byaug va".
7 Qam: so' qi" ra" Asang wa ngonhaung" we' daga" na: ra"
Yaku' nho: Mao"So wa ngonhaung" nho: khug ngha jo, qo ngad: ra".
8 Asang kad' ra" lo, mau" re li" qu" qu" ge,
Myid gaung: dao mae yao: khoru" mug' pho: mau" jham kad' to: va" rure li" qu" ge,.
9 Yao: wa mug: myid geim" mae mang: byo; ru jham re mang: dae nhao: ra".
Yao: wa lo, la: jham re- khyug' pye' byid: mung: lhae tad' jham re adau atam" kad' pye' ra". Amung: go jham re wa- myi: ngha" pye' ra".
10 Yao: wa- gye jho" khe' ru thang ge, amung: ngo Mao"So ngad: rure ba: to: ge,
Byumyu" jham: nho: dao mae qi" qhang: thao" mung: mug: myid dao mae qi" qhang: thao" yaug ngad:rure ba ge,- ga: ta" ra".
11 Qam: so' bo: thao" ra" Asang wa ngonhaung" we' daga" na: ra".
Yaku nho: Mao"So wa ngonhaung" nho: khug ngha jo, qo- ngad: ra".