CAUNG: KHIN" 47
Khig Kham: Thao" Ra" Mung" Eib Kho:kham
(Kora kaung boe: peim: ra" Nghaui"caung:)
1 Byumyu" alhab' mo, we"- ngaui bau: ngaui lho" lo, pyo' pyo' ge,- Mao"So re
nghaui" caung: thoe qi" yang caung:khin" ge,.
2 Myhao: thao" ra" Asang wa gyaug phug' gai ra".
Yao: wa mug: myid geim" re eib: na: ra" kho:kham mo" ngad: ra".
3 Yao: wa ngonhaung" re byumyu" qere aung pye' nae" khyo byid: mung:- ngonhaung" re byumyu" qe: aung: pye' nae" khyo"-
dao mae eib nhao: ra".
4 Yao: wa ngonhaung" na: ra" mug: myid re
ngonhaung" qhid' mae" khyin: to: byid' ra".
Aiwa yao: jhid'de; ra" byumyu" nho: langa: khyo" qo" sang: to" ra" jo,nho" ngad: ra".
5 Mao"So wa yao" kho:kham tao" khyo do, lo" ra".
Asang do, lo" ra" au: re ngaui bau: ngaui lho" hug' yao thoe jham we' labo" thoe jham mad: myhang" ako".
6 Mao"So re nghaui"caung: ge,.
Ngonhaung" nho: kho:kham re nghaui"caung: byid: ge,.
7 Mao"So wa mug: myid alhab' dao mae eib: ra" kho:kham ngad: ra".
Yao: re nghaui" caung: jham: yang caung:khin" ge,.
8 Mao"So wa yao" gyang" lho" kho:kham kho" dao mae zaung: jo; ra".
Yao: wa byumyu" mung"dan: jham: dao mae eib: na: ra".
9 Byumyu" cao jab: nho: kho:kham qe wa Abraham nho:
Mao"So: nho: byumyu" we' daga" ham: na: bam: ako". Yao: wa gyetab alhab' tho' qam: so' je: bo yaug ngad: ra". Yao: wa qi" thao" ra" qam: so' yang eib: na: ra".