CAUNG: KHIN" 45
Kho:kham: Lo, Xo' Poe nghaui" caung:
(Kora kaung boe: peim: ra" ji: jhid' kao nghaui")
1 Kho:kham pho" qhid' mae" ce: nghaui" caung: re thug: ra" au: nga" nhag' lam: mae gyo" ngaui ja: dao: byang" jo; ra".
Mugsug' tung" zo" ra" lagkaung pho" nho: mhaug' thaung: re"ru: nga" sho mae dao: zham" laui laui za: bo: jo; ra".
2 Nao wa yauggai qemae" yaung" thao" yaug ngad: ra". Nao wa no: gyo: yo taung" ba: jhau yaug ngad: ra".
Mao"So wa nao re khonhae" re: ashaman" byid' na: ra".
3 Qam: qi" ra" kho:kham we" ni" shae pyang: re vin: ci wa,.
Nao wa phungbao we' phung: dagu" we' jab byang" ra".
4 Dangman" ru we' tarha" din:man" ru gang" tang: jo, nae" qhid' mae-
phung dagu" mae zaung yang: aung doe; lo wa,- ni" qam: wa nao re qi" ra" aung doe, khyo jham qo" yu nhao: li" nae".
5 Ni" myo: jham wa ceim: ra".
Aijham wa ni" gyevo qe: sang: kheim: re thug' kyao" byid' ako". Ni" khyid qao: mae byumyu" mung"dan: jham byo; qeim: lo" ako".
6 Nao re Mao"So: yang byid' to" ra" kho:kham mung"dan: wa apyad ato mae gang" tang: jo; li" nae".
Nao wa ni" byumyu" dao mae tarha" din:man" ru we' eib: na: ra".
7 Nao wa jo: rure jhid'de; mung: makhyang" rure nghang" ra". Aimung: Mao"So- ni" Mao"So wa nao re khyin: yu: ava".
Aimung: kho:kham gayaug tho' mae" je yang: ni" dao mae ngaui bau" ru vhe' sheim: byid: ava".
8 Ni" mai bau: dao mae Mura: nae pyo: sheim we' sag' xau sheim de; jo; ra".
Xao zaui: yang shaung: pye' ra" kho:kham kho" mae tang: she mung: nghaui" kyo: mo, wa nao re jhu" ako".
9 Ni" kho:kham vang" mae" myiqe: qe: phaung mae kho:kham qenho: myiqe: zo:qe na: ako".
Ni" kho:kham tao" khau" lo, yo shad' mae kho:kham myhi" wa gai: thao" ra" qhang zai jham re shaung: ve; ci mung: ye; jo; ra".
10 Kho:kham: nho: myhi" sag' we" ngo ta" rure tae" gyo: wa,-
ni" byumyu" we' ni" ba nam sang: cao: re to' myhid' pye' se,.
11 Ni" yaung" shab: lamyhung wa kho:kham pho" re
qu" ngaui nhao nae"- yao: wa ni" asang ngad mung:
nao wa yao" mho dao: re gyo: ca".
12 Turu mae" byu qe wa nao re jhaung qhu" ci: li" byid' li" genae".
Jo,nho" qo" mo, wa nao: yang myo, nho byid: nae" rure qho: li" genae".
13 Kho:kham: zomyi: nau" wa- Kho:kham kho" khug mae na: jo; ra".
Yao: wa yaung" va" lhe". Yao" bau: qhang wa qhang khyang: yang qo; to" ru ngad: ra".
14 Atung" ataug' mung: ra" yao" bau: qhang shaung: ve; pye' mung: kho:kham jhao" jhui" ye" ako". Yao" thao mae myhi" sag' byin cao: zomyi: nau" qe cao" ye" ako".
Yao: bam rere: yao: jhao" jhui" ye" ako".
15 Yao: bam wa ngaui bau: ngaui lho" ru we'
kho:kham kho" khug khyo vao ye" lo" ako".
16 Nga" kho:kham we"- nao wa ni" phug' pho" qenho: khu mae kho:kham xo' kad' nae" yauggai zo: myo: sho' qo" li" nae".
Aimung: nao wa yao: bam re mug:myid geim" mae eib zo:nhao: li" nae".
17 Nga" nghaui" caung: wa- ni" lahau: re apyad ato mae daui: jo, nhao: li" nae".
Aimung: yaug khao: ngo" wa joe" lo nae" ayo, alhab' mae nao re caung:khin" byid: li" genae".