CAUNG: KHIN" 44
Gug: gam Byid: Nae" Ru Mho' Ra" Akyu" Mho' Dao:
(Kora kaung boe: peim: ra" ji:)
1 O" Mao"So we"- ngonhaung" nho: no:khye' mae yao: the' gyo" bam va".
Ngonhaung" nho: phug' phyid' qe ta" kyo" avako". Ganhae" gaco' yo, mae" nao kad' lai: lo va" rure re: ta" kyo" avako".
2 Mao"So re maba mo; mug: myid mae" yao: bam re nao yao: khe' thug' pye' mung: yao: bam: mug: mae ni" byumyu" re na: dai nhao: ra".
Gaje: byumyu" qere nao qobo dae byid: mung: nao yao" byumyu" re qi" qhang nhao: ra".
3 Ni" byumyu" wa ai: mug: re yao: bam: shae pyang" yang aung yu: ru mangad:.
Yao: bam re nao jhid'de; rure qhu" byid' ra" khyo" yao: bam we' nao daga" na: rure gang" tang nhao: ra".
Ni" qam: so' we' qam: jam" yang aung doe; ako".
4 Nao wa nga" Kho:kham we' nga" Mao"So ngad: ra".
Nao wa byumyu" re aung doe; nhao: ra".
5 Ni" qam:so' yang ngonhaung" wa ngonhaung" nho: gyevo qere
khyoe' aung doe; pye' va".
6 Ngo wa ngoyao: re khyad' yu nae" qhid' mae" nga" lo, la: rere:-
nga" shae pyang: rere: malam-
7 ngadqere: nao wa ngonhaung" re ngonhaung" nho: gyevo qe: lo, mae"
khyad' yu mung: ngonhaung" re nghang: mo, re nao khyoe' aung: pye' ava".
8 Ngonhaung" wa nao re khonhae" re: caung:khin" na mung:
apyad ato nao re jeju beim: so" na nae".
9 Ngadqere: ana" wa- nao ngonhaung" re ngag: lhaui" pye' mung: jeim: nhao: ava".
Nao wa ngonhaung" gyetab jham we' daga" gyekhe' macao: ye: lo:.
10 Nao wa ngonhaung" re ngonhaung" nho:
gyevo qe: qhid' kheim: mae" phao: sin" lo" nhao mung: yao: bam wa ngonhaung" nho: jo,nho" jham re sang: yu: pye' ako".
11 Nao wa ngonhaung" re yao jham rere" ru: se' pye' ru qhug' nae" akhang" byid' ra".
Ngonhaung" re taung bug: mung"dan: jham khyo pyo: sin" pye' va".
12 Nao wa nao yao" byumyu" re phug' made, mo, re" ru:
aphug' dajhid' za" mae
13 Ngonhaung" nho: yham kyo: cao: qe wa- nao ngonhaung" re
khoru: kad' rure myao mung: ngonhaung" re jung" yang: qi: pye' ako".
14 Nao wa ngonhaung" re byumyu" qe: phaung agaung: mae ceim" nghang: ja: boe" nhao: ra".
Yao: bam wa qu" khyoe' ra" khyo" au: lhang phyid ga: kad' ako".
15-16 Ngo re nghang" ra" nga" gyevo qe:yang jung" pye' ru we' maphug' makhyad'
roe" rure the' gyo: mung:- khonhae" re: myo, nho phoe: jo;- khonhae" re: qho' phau: yang: na: jo;.
17 Ngonhaung" yang nao re lhao" mato" myhid' pye' ngadqere:
nao we' ngonhaung" agyo: mae so" to" ra" ni" dao: thang" re maphyo' pye' qere:- ngonhaung" mae cejham alhab' boe" lo va".
18 Ngonhaung" wa nao re dao:so: madang lo: makad' lai: lo-
Ni" nho: amyin" jham re
malhaui" pye' lai: lo-
19 Ngadqere:- nao wa ngonhaung" re seyo: gug' nghug' jham: agaung: mae airu: yao: shapye' to: co' va".
Nao wa ngonhaung" re no; thao" ra" mug: cad' khug mae shapye' pye' va".
20 Ngonhaung" nho: Mao"So re caung:pa" rure ngonhaung" qe to: co' mung:- taung bug so re
akyu" mho' nae" ngad: re wa- ai re nao myao nae".
21 Pe"mung:ga"re nao wa ngonhaung" aung khug mae anyham: avho' khug' myid: rure ba: ra".
22 Ngadqere: ngonhaung" wa ni" mathao mae ayo, khao: ngo" se' pye' ru qhug' na mung:-
se' pye' nae" ngad: ra" yao jham re we' dakhyo:- ngonhaung" re cekad' ako".
23 Asang we"- beim: so" lo wa,- pe"mung: yab: myhid' jo; i?
Nao yao" gaung re nhug' to" yu wa,- ngonhaung" re apyad ato mae dangag: lhaui" pye'.
24 Nao pe"mung: ngonhaung" mae" vho' jo; i?
Ngonhaung" kham zo" na: ra" dayin dayo: we' qug: khai: re dato" myhid' wa,.
25 Ngonhaung" wa myid gaung khyo gyang: gyoe; lo" mung:
phalhug bam mae jeim" lang" jo; bam va".
26 Ngonhaung" re li" bao" yu la,- ni" mabaui mabyo; ra"
jhid'de; myid: mathao mae ngonhaung" re khyad' yu la,.