CAUNG: KHIN" 43
Pyaung: Nha: To: Qhug' Yaug: Nho: Akyu" Mho' Dao:
(Ckh 42 axo')
1 O" Mao"So we"- ngore qobo maqo" ein: hau: byid: la,- aimung: Mao"So o: khyo: mana mo, phaung mae nga" bo: de, mung: ngo re ta" khyad' yu la,- Mhug' ta" ra"
makhyang: mo; lo, mae" ngore khyad' yu byid: la,.
2 Nao wa ngore gyevha mung: qhaung: yu yaug ngad: ra".
Nao pe"mung: ngore shapye' to" i? Ngo pe"mung: nga" gyevo qe:yang dayin dayo: ce: yhin" ru phau: zo" na ca" i?
3 Ni" bo" bao we' ni" din:man" ru ngojhao" nhao: ke' byid: la,- aijham wa ngore khyo jhui: vageshao: Ni" gyang" lho" ra" Ziun bug gaung nao na: ra"
ni" Caung:pa" Yham khyo ngore dam: jhui" tug' lo vageshao:.
4 Ailao" O" Mao"So we"- ngo wa ni" phan khyo ye: nae".
Nao wa nga" nho: ngaui bau: nae" ajhaung ngad: ra".
Nga" tang: re be, yang: nao re ngo nghaui"caung: nae". O" Mao"So- nga" Mao"So we"-
5 Ngo pe"mung: ceqhi" kaug' na: ca" laug i? Pe"mung: yang: ngo ceqhi" myid myo" na: ca" laug i?
Ngo wa Mao"So mae myid: lao" na nae". Aimung: nga" khyad' yu: Asang nga" Mao"So re dalhang dam: caung:khin" byid: nae".