CAUNG: KHIN" 42
SHID' PAUG'
Mung"dan: Mae" Khe' Thug' Pye' Qhug' Yaug: Nho: Akyu" Mho' Dao:
(Kora kaung boe: peim: ra" ji:)
1 Sho:cid wa ngin" ra" qid zo: gyaung: re nhag' nghae" na: ru we' dakhyo:-
O" Mao"So we"- ngo nao re airu: nhag' nghae" na:.
2 Ngo wa kao so' daui: ra" Mao"So nao re moe, shab' ra".
Ni" qhid' kheim: mae khonhae" ye:qo" caung:pa" nae" laug i?
3 Myi" re: na" re: ngo gyi: ngug: na mung: nga" zo:ve wa ngug byid za: ngad: ra".
Nga" gyevo qe wa ayo, byang" sho' ngore Ni" Mao"So khai: mae i? ga: myid' na: ako".
4 Ngo wa mo, byu qe we' daga" Mao"So: yham khyo lhaung" cao: ye".
Ai: au: re ngaui bau" ra" mo, byu qe wa- Mao"So re hug' yang: lhaung" caung:khin" ko" rure myid: beim: lao"- nga" nhag' lam: mae nhag' kaug' nhag' ngai qhug' ra".
5 Ngo pe"mung: cenho" kaug' na: i? Ngo pe"mung: ceqhi" myid myo" na: i? Ngo wa Mao"So mae myid: lao" na nae".
Nga" khyad' yu: Asang nga" Mao"So re dalhang dam: caung:khin" nae".
6-7 Ce: pyaung" nha: to" ra" jo, qo mae nga" nhag' lam: byo; lo" na va". Aimung: ngo wa yao: re myid: beim" lo va".
Yao: wa kaug' qhui: ra" bang: lhung" jham re nga" alo zo: dao khyo nhao: ke' ava".
Athaui: anhaung" wa qid gyui so' we' dakhyo: ngojhao" kyid' myang: lo: ra". Hermon bam we' Mizar bam mae" Yodan qid gyaung: khyo yug: vao: lo" ra" coe: jham ru:- myang: lo va".
8 Asang wa yao mabaui mabyo; ra" jhid'de; myid re na" gaung mae qhu" byid: vashao:.
Airu re ngo wa myi" ayo, mae nghaui"caung: nae". Nga" kao so' nho: Mao"So re akyu" qo" mho' nae".
9 Ngo wa- ngore gye vha byid' ra" Mao"So re- nao ngore pe"mung: to" myhid' pye' i?
Ngo pe"mung: nga" gyevo qeyang se' da: be, khyad' ce: yhin" ru phau: zo" na: i? ein: ata" na:.
10 Ni" Mao"So khai: mae na: i? ga: mathang mano:
cemyid' na mung: yao: bam ceim" roe" ko" ruyang ngore khyoe' kad' pye' ava".
11 Pe"mung: yang: ngo ceqhi" kaug' na: laug i? Pe"mung: yang: ngo ceqhi" myid myo" laug i?
Ngo wa Mao"So mae lam khug: na mung: nga" khyad' yu: Asang nga" Mao"So re dalhang dam: qo" caung:khin" byid: nae"