CAUNG: KHIN" 39
Qug: Khai: Dayin Dayo: Kham Zo: Yaug Lhang: Yu: Ra" Khyo
(Davi peim: ra" Nghaui"caung:)
1 Ngo wa- ngo kad' ra" mau" re nyang" jhaug' zaug nae".
Nga" sho rere: qobo maboe" nhao nae".
Makhyang: mo, avai: ayae mae na: ra" au: re ngo pe" mata" thug' nae"- ein: ta" va".
2 Ngo wa dao: dakheim: re: majhau- gai: ru lhao" pe" mata" lo: sae za: tae" jo;-
Ngadqere: ngo kham zo" ra" dayin dayo: wa je: za: axo: lo: na: ra".
3 Amung: ngo wa myid: qug: myid: khai: mung: byaug va".
Ngo je: myid: qu" re je: sang: kho" li" va".
4 Asang we"- ngo khomyhao" qo" daui: na nae" i? Ngo khonhae" shid nae" laug i?
Khomyhao" myao" re nga" kaoso'thao" nae" laug i? Ngo re ta" kyo: la, ein: mamyid: lo: maqo" na.
5 Nao wa nga" kao so' re khoqhi" lang" ra" khyo" kad' to: va" i?
Ni" qhid' kheim: mae nga" kao so' wa pe" za: lhao" mangad:- gaigai: ga" re daui: na: ra" byu yaug khao: ngo" wa
la dalhang mad za: angad: ra".
6 Khapao tho' mae" pe" maje-
Yao: kad' ru alhab' wa pe" mangad:-
yao: wa jo,nho" re qho: zhang: to: qere:
aire khag' the' sang nae" rure yao: maba.
7 Aire Asang we"- ngo pe" re qo" myid: lao" na nae" i?
Ngo wa nao mae lam khug: to: va".
8 Nga" qobo alhab' mae" ngore khyad' yu byid: la,-
ago qeyang ngore dajung" pye' nhao.
9 Ngo re ceru: dayin dayo: kham zo: nhao yaug wa
nao ngad: rumung: ngo wa- sae za: tae" to: yang:-
pe" dao: dakheim: re: majhau nae".
10 Ngo re qobo dae dabyid: lo:-
nao: yang cebe, mung: ngo shid: lo" na va".
11 Ni" qeim: mho" ra" dao: thoe: yang-
byu dayaug: qobo qhid' mae" qobo dae byid' ra".
Aimung: phyophyab' re we' dakhyo:-
yao" jhid'de; rure phyo' qheim" pye' ra".
Gaigai: yao:- byu dayaug wa
la dalhang mad tho' maje ngad: ra".
12 Asang we"- nga" akyu" mho' thoe re gyo: byid: la,.
Ngo hug' yao thoe re tae" gyo: byid: la.
Ngo ngug: ra" au: re ngore bao" yu nae" qhid' mae" li" wa.
Nga" phug' phyid' qe alhab' we' dakhyo:-
ngo wa dazab daso' au: mae" ni" bang" vo za: angad:.
13 Ngo malo" byaug shi:re- ngaui bau" ru
dajhid' kho: lhao" lhau" qo" yu nae" qhid' mae"
ngo yao: reza: nha: to: byid' qu" shi:la,.