CAUNG: KHIN" 38
Qug: Khai: Dayin Dayo: Kham Zo: Yaug: Akyu" Mho' Dao:
(Davi peim: ra" Nghaui"caung: ngug ji:)
1 O" Asang we"- nhag' yo: yang: ngore
qobo dae dabyid:.
2 Nao wa ngore ni" myo: jham: yang dae te' va".
Ngo re nao be; lhang" ke' va".
3 Nao nhag' yo: mung: ngo gyai no: na va".
Nga" qobo: mathao mae- nga" gaung geim" mae no de, va".
4 Ngo wa nga" qobo tham: mae nab: shid: lo" na va".
Aijham wa matho' vin losho' la" ra" qo ngad: ra".
5 Ngo nhag' magyang: lo" ruyang nga" dae jad: jham wa
jad: byo; mung: bab: nae: jo; ra".
6 Ngo wa au: gam" mung: nhag' lam: gyug: va".
Ba geim" kaug' ngug: na:-
7 Ngo wa no bug: na mung:
shid: lo" na va".
8 Ngo wa qam: gan mung: nhag' lam: bin sho' gyug: va".
Ngo myid myo: mung: dae no: ruyang nokyang: kyang" na:.
9 O" Asang we"- ngo pe" nhag' nghae" na: rure nao ba: ra".
Nga" nokyang: thoe alhab' re nao the' gyo" ra".
10 Nga" nhag' lam: sang: gaug: thaung: mung: nga" qam: gan: byaug va".
Nga" myo, re: maqang: lo:.
11 Nga" ba nam qe we' yham kyo: qe wa nga" dae jad: mathao mae nga" nhae mae mali" lo:ko".
Nga" yham byu qe lhao" re: ngo mae" phao: lo" avako".
12 Ngo re se' nug mo, nga" qhid' mae" lha" thaung: ako".
Ngo re dae no nhao nug mo, wa ngore phyo' qheim" pye' nae" ga: kyaug' nhin" na: ako".
Yao: bam wa mathang mano: lo: ngore gye kad' nae" byin phyo: zin" ako".
13 Ngo wa no:jid yaug ru"ru mathe' gyo:-
nhad' jid yaug ru"ru dao: maqo" jhau.
14 Yao: rure mathe' gyo: yang: ngo wa maba: tau" ra" yaug ru:
15 Ngadqere: O" Asang we"- ngo wa nao mae lam khug: na:-
Aimung: O" Asang nga" Mao"So we"- ngore nao tau: byid' li" nae".
16 Ngo nhag' ngai: na: rure nga" gyevo jham: yang daqu" bau: nhao la,- ngo gyoe; gyo" lo" rure
yao: bam: yang daphug: ta" nhao la,-
17 Ngo wa gyang: gyo" lo" nae" jhao" mung:
18 Nga" qobo jham re ngo lhang: yu:-
aijham wa ngore sang: kho: nhao: ra".
19 Nga" gyevo qe wa qao" zin" na mung: qam: bo: ako".
Pe" si: mabo: rumae ngore nghang: mo, gyai myo: sho' na: ako".
20 Ngo wa din:man" jo: rure kad' yang:
agai: atha" makhyang" ru tug' byid: mo, wa ngore gye kad' ako".
21 O" Asang we"- ngore dashapye' to: la,-
nga" Mao"So we"- ngo mae" va: va: mae daphao: na: jo,-
22 O" Asang nga" khyad' yu: Asang we"-
ana" ngore bao" yu la,.