CAUNG: KHIN" 40
Nghaui"caung: Dalam:
(Davi peim: ra" Nghaui"caung:)
1 Ngo wa Asang: yang bao" yu nae" rure nhag' lam: qhang qhang za: lao" na:.
Ailao" yao: ngore tae" gyo: byid: mung: nga" hug' yao thoe re gyo: byid' ra".
2 Yao: wa ngore- gyaug ci" ca" ra" dung:khung: mae" we' nab: shid nae" tham: nheim" mae" she: thug' yu: ra".
Yao: wa ngore laung: mo" bam dao mae gug: gam taung" zhaung: to: mung: gug: gug: za: na nhao: ra".
3 Yao: wa ngore ngonhaung" nho: Mao"So re caung:khin" ra" nghaui" caung: asag' caung: byid' ra".
Cere myao: ra" mo, myo: sho' wa- qo" qu" lha" yu mung: Asang re lam khug: lo: li" genae".
4 Asang re lam khug mo, wa ngaui lho" ako".
Solho re macaung:pa"- so apyag' jham re caung:pa" mo, we' mabo: zam" mo, wa ngaui lho" ako".
5 O" Asang ngonhaung" nho: Mao"So we"- nao wa ngonhaung" qhid' mae" mau" myo: sho' ja: kad' ava".
Nao we' dau ru khag' mana-
nao wa ngonhaung" qhid' mae" mug' pho: aja: ja: kad' byid' ava". Aijham alhab' nho: khyo re ngo matho' ta". Aigu: wa gyai myo" ra".
6 Nao wa ngaui" xeim: we' jhaung qhu" re ma-o. Phan dao mae dau: geim" phad' ngaui" byid' ra"
sho:au: jham re nao mamho'. Xeim: ngaui" jham: yang qobo khyad' pye' nae" rure: nao ma-o.
Ai: ra" atha" nao the' gyo: nae" no: khye' nao ngore byid' to: va".
7 Aimung: ngo wa- ngo cemae na:- nga" qhid' mae"
ni" tarha" mugsug' paug' mae bo: ra"- ein: tau" ra".
8 Nga" Mao"So we"- nao myid: o: rure cao" nae" ngo ngaui va" lhe"-
ni" mho" shid' dao: re nga" aung khug mae ngo ke' to: va"- ein: tau: va".
9 Asang we"- ni" byu qe alhab' mo; phaung gaung: mae nao ngonhaung" re khyad' yu: ra".
Ngaui bau" lau dao: ta" hau" kyo: va". Ai: rure ngo mathang mano: ta" na nae" rure nao ba: ra".
10 Ngo wa ngoyao: re- khyad' yu: ra" lau dao: re mazug' to:- ni" nho: jhaug' zaug: ru we' nao bao" yu: rure ngo khonhae" re: ata" na:-
ni" byu qenho: phaung gaung: mae nao mabaui mabyo; ra" jhid'de; myid we' ni" jhaug' zaug: ra" myid we' ni" jhid'de; myid re mata" thug' lo: matae" to:.
11 Asang we"- nao ngore nhag' khyag' yu: rure khonhae" mathang: pye' nae" ru ngo ba:
Ni" jhid'de; ra" myid we' jhaug' zaug: ru wa ngore yo, byang" sho' gug: gam nhao nae".
Bao" Thaug' Byid: Nae" Akyu" Mho' Dao:
(Ckh 70)
12 Matho' nghe' lo: sho' ra" qug: khai: myo: sho' yang ngore lhang" gam" to" ra"- nga" qobo jham wa ngore myhag' zag: pye' mung: ngo maqo" myao lo:-
aijham wa nga" au: lam: mae" xae khe' tho' myo" ako". Aimung: ngo mae vae" ra" qam: mabo lo:.
13 Asang we"- ngore khyad' yu la,-
ana" ngore bao" yu la,.
14 Ngo re se' nae" ga: seim" mo,- khyoe' bin sho'jeim: mung: thaui" sad' byaug vageshao:.
Nga" qug: khai: jham: nho: mathao mae ngaui bau: mo, phao: tug' lo" mung: qho' phau: vageshao:.
15 Ngo re jung" pye' mo, wa- yao: bam seim" lo" ra" mathao mae
nhag' lam: gyaug: ngai vageshao:.
16 Nao jhao" li" mo, alhab' wa
ngaui bau: ngaui lho" qhug' vageshao:- khyad' yu: rure jeju beim: so: mo, alhab' wa- Asang wa- qi" qhang: ra" ga:- khonhae" re: ta" na vageshao:.
17 O" Asang we"- ngo wa qam: nang: mung: myaung sho" na:- ngadqere:- nao wa ngore mato" myhid' pye'- nao wa nga" khyad' yu: Asang we'
nga" Mao"So ngad: ra". Ngo re bo: bao" thaug' yu nae" qhid' mae" phyad mung wa,.