CAUNG: KHIN" 37
Makhyang: Yaug We' Byugai: Yaug: Nho: Khyo Thao"
(Davi peim: ru)
1 Makhyang: mo; nho: mathao mae sang: dakho:- myid damyo:- Shad' ru kad' mo, re o: daqu" byid.
2 Yao: bam wa kyaug' lo" ra" mhin:zo: re"ru: khomyhao" mamyao" re byaug: baui" lo" li" genae".
Yao: bam wa yaug: mai: lo" ra" mhin: gae re" ru: shid: lo" li" genae".
3 Asang re lam khug: na mung: gai: ru kad' wa, ai: mung" mae na mung: gug: gam qho: yu wa,
4 Asang mae ni" ngaui bau" ru qho: yu wa,- alao" ni" nhag' lam: mae myid: o: rure yao: byid' li" nae".
5 Nao yao" gaung Asang re ab byid: wa, yao: re lam khug wa,- ai re yao" yang nao re bao" yu: li" nae".
6 Yao: wa ni" din:man" rure ba khaung tau: au: mae" ba zho we' dakhyo: zho nhao nae".
7 Nhag' lam: qhang qhang to: mung: Asang lo, mau" zaui: nae" rure lao" wa,-
na: dai mo, we' sin: yang: re: makhyang" ra" mau" mae aung doe, mo, we' sin: yang re: nao myid damyo: wa.
8 Myid damyo:- nhag' dayo:- ai wa qug: khai: za: azai" thug' nhao nae".
9 Asang re lam khug: na mo, wa mug: myid re qo" sang: li" genae". Nhag' lam: kaui mo, re kam" wa khe' thug' pye' li" genae".
10 Khomyhao" mamyao" re nhag' lam: kaui mo, baui" lo" byaug: genae".
Nao yao: bam re cao" qho ngadqere: qhug' myao: li" nae" mangad:
11 nhag' lam: khyo" mo, kam" wa mug: myid re qo" sang: yu mung: na: dai: ru we' ngaui pyo: yaug yo: ru qo" kham zo: genae".
12 Nhag' lam: kaui yaug wa byu gai re gye kad' nae" yaung:na mung: yao: re nhang" ru we' zhaug' kyid' ra".
13 Ngadqere: Asang wa nhag' lam: kaui mo, re khomyhao" mamyao" re phyo' qheim"pye' nae" ru ba mung: yao: bam re qi: pye' byid' ra".
14 Nhag' lam: kaui mo, wa myaung mung: masho: majhin phyag' mo, re se' nae" ga:- jo: ru kad' mo, re se' pye' nae" ga:
yao: bam: shae pyang: jham re phoe' mung: lo, la: jham re thaung: ako".
15 Ngadqere: yao: bam yao" shae pyang: jham: yang se' pye' ru qhug' li" genae".
Yao: bam: lo, la: jham re: khyug' pye' ru qhug' genae".
16 Byu gai qo" ru dajhid' za" ru wa nhag' lam: kaui yaug qo" ra" jo,nho" myo: sho' tho' je: phug' ra".
17 Pe"mung:ga"re Asang wa nhag' lam: kaui mo; qam: re yu: pye' byid: mung: gai mo, re gug: gam byid' li" nae".
18 Asang wa yao" mho dao: gyo: mo, re qu" gun caung byid: mung:- mug: myid re apyad ato yao: bam qo" sang: li" genae".
19 Ayo, magai: ra" au: re yao: bam qug: khai: maqhug' genae"- bao" khug' khug' ra" au: re ga" sho' qo" li" genae".
20 Ngadqere: nhag' lam: kaui mo, wa shid: shao" li" genae". Asang: gyevo qe wa seyo: bin: re" ru: baui" byaug: lo" li" genae".
yao: bam wa myikhug' re" ru: baui" byaug: genae".
21 Nhag' lam: kaui yaug wa jhid' yu mung: khonhae" re: madam: xe'- byu gai kam" wa xoe" xoe" za: jhaung qhu" jham gae byid' ra".
22 Asang: yang shaman" byid: mo, wa mug: myid re qo" sang li" genae".
Yao" nhang: kheim: zao" mo, kam" wa yao" yang khe' thug' pye' ru qhug' li" genae".
23 Asang wa byu dayaug re yao: ye: ang: khyo sadi byid: mung: yao: re ngaui nhao mo, re gug: gam byid' ra".
24 Yao: bam gyang: lang: qere: airu: za: lang" jo; na genae" mangad:- pe"mung:ga"re Asang wa yao: bam re tau: to" yu: li" nae"
25 Ana" ngo wa mao: va"- Gyai myao" sho' daui: na va"- ngadqere: byu gai re Asang: yang shapye' to" ru khonhae" re: mamyao: qu"- yao" myid:zo: qe mho' zo" qin" rure: mamyao: qu".
26 Yao: bam wa ayo, byang" sho' su gaje re mageim: gae byid: mung: jhid' byid'ra". Airumung: yao: bam: myid:zo: qe wa shaman" jeju ngad: ako".
27 Makhyang" rumae" lhang: phaug' lo mung:- gai: rure kad' wa,- aire ni" myid:zo: qe wa ai: mug: myid mae khonhae" re: na: dang: jo, li" genae".
28 Pe"mung:ga"re Asang wa din:man" rure jhid'de; mung: yao" jhaug' zaug mo, re mashapye' ngad: ra".
Yao: bam re yao" yang gug: gam byid' ra". Nhag' lam: kaui mo; myid:zo: qe kam" wa khe' thug' pye' qhug' li" genae".
29 Din:man: mo, wa mug: myid re qo" sang mung: aimae apyad ato qo" na genae".
30 Byu gai: dao: jham wa pha,jhi" bo mung: yao: wa yo, byang" sho' tarha" din:man" ra".
31 Yao: bam wa yao: bam: Mao"So: tarha" re yao" nhag' lam: khug mae ke' to: mung: aimae" khonhae" re: magao: lo:.
32 Nhag' lam: kaui mo, wa byu gai qere lhaug' qu" na mung: yao: bam re se' nae" seim" na: ako".
33 Ngadqere: Asang wa yao: bam re yao: bam: gyevo qenho: lo, mae shapye' to: nae" mangad- yao: bam re tarha" ca: ru qhug' ra" au: re dao: phyid' ru maqhug' vashao:.
34 Asang re myid: lao" na mung:yao" amyin" re tae" gyo: wa,-
Yao: wa nao re mug: myid byid: mung:
nga: yhe' byid' li" nae". Amung: yang nhag' lam: kaui mo, re khe' thug' pye' rure nao the' myao: li" nae".
35 Ganhae" dalhang nhag' lam: kaui: ra" zug: qan dayaug re myao: qu"- yao: wa Lebanon mae shaug' gae re" ru: yaug khao: ngo" dao mae zag zo" lai: lo" ra".
36 Ngadqere: thao re ngo dam: su" lai: lo" re yao: aimae mana lo:- yao: re ngo qho: qu" re maqhug' lo:.
37 Byugai re qu" xam" to: wa, din:man: yaug re qu" na wa, yaug yo cae: tae" ra" yaug wa myid:zo: qe qo" ra".
38 Ngadqere: qobo byu qe wa bin sho' phyo' paui" pye' ru qhug' ako".
Yao: bam: myid:zo: qere re: jhad' yu: pye' qhug' ako".
39 Asang wa din:man: mo, re khyad' yu mung: qug: khai: qhug' ra"ayo, mae yao: bam re gug: gam byid' ra".
40 Yao: bam wa yao: bam re bao" byid: mung: khyad' khyui: yu: ra".
Yao: bam wa yao: jhao" gug: gam byid' ru qhug' nae" qhid' mae" ye" ra" mathao mae yao: bam re nhag' lam: kaui mo; lo, mae" khyad' yu: ra".