CAUNG: KHIN" 36
Xao Su Byu: Nhag' Lam: Kaui: Ra" Khyo
(Asang: nho: daui daui lagyo: Davi peim: ru)
1 Qobo wa makhyang: mashab mo; nhag' lam: akao" mae dao: jhau: zaui byid' ra".
Yao: wa Mao"So re ngag: pye' mung: magyaug phug' ngad: ra".
2 Pe"mung:ga"re yao: wa yao" gaung yao: re saung" ngad beim: mung:
Mao"So: yang yao" qobo re mathe' myao byid: nae"-
Dao: maphyid' byid: nae"- ga: jho: na: ra".
3 Yao: jhau: ra" dao: wa makhyang" ru we' mhug' ra" dao: byang" mung: pha,jhi" bo: ru we' gai: rure yao: makad' lo:-
4 Yao: wa yab qo mae lang" jo; ra" au: re makhyang" ra" mau" re myid: yaung: na: ra"
Yao: kad' ru pe" daja: re: magai- yao: khonhae" re: makhyang" ra" mau" pe" rere: yao: mangag: pye'.
Mao"So Gai: Ra" Khyo
5 Asang we"- ni" mabaui mabyo; jhid'de; myid wa mug:gaung joe" sho' myhi: ra".
Ni" nho: jhaug' zaug: ru wa mug: kin khyo joe" lo" ra".
6 Ni" din:man" ru wa bam jham we' dakhyo: myhao: jo; ra".
Ni" tarha" din:man" ru wa panglai: re" ru: no; ra". Xao su byu we' gug'nyhug' jham wa ni" nho: gun caung: ru khug mae ngad: ako".
7 O" Mao"So we"- ni" mabaui mabyo, gang" tang: ra" jhid'de; myid wa khonho" phug' de; ra" i? Ni" daung qab khug mae ngonhaung" gug: gam qhug' yu: ra".
8 Nao nyhang" byid' ra" magan: mago" zo: shaug' mae ngonhaung" ceim" zo" na: bam:- nao wa ngonhaung" re ni" gai: ra" qid gyaung: mae" shaug' nhao: ra".
9 Nao wa kao so' alhab' nho: ajhaung ngad: ra".
Aimung: ni" bo" bao: nho: mathao mae ngonhaung" qo" myao:.
10 Nao re ba mo, re xo' yang: jhid'de; wa- Din:man: mo, rere: xo' yang: gai: ru kad' byid: wa,.
11 Ngad beim: mo; yang ngore ceim" khe' ru daqhug' nhao la,. mangad: lao"
makhyang: mo; yang khe' tao" pye' rure: daphau: zo: nhao la,.
12 Makhyang: mo, khai: mae lang" lo" ko" rure qu" wa,- aimae yao: bam lang" jo, mung: madam: qo" to"lo ngad: ako".