CAUNG: KHIN" 35
Bao" Thaug' Yu: Ru Mho" Ra" Akyu" Mho" Dao:
(Davi peim: ru)
1 Asang we"- ngore lham: thaug' mo, re lham: thaug' wa,- ngore gyekhe' mo, re gyekhe' wa,.
2 Ni" gyekhe' go we' gyekhin re ci mung: ngore li" khyad' yu la,.
3 Ni" lhae tad' we' vo: zaung" yang ngore cao" khe' mo, re khe' pye' byid: la,. Nao ngore khyad' yu nae" ru ta" kyo: la,.
4 Ngo re se' pye' nae" ga: phin: mo, jeim: mung: qho' phau: vageshao:.
Ngo re lham: thaug' mo, wa dam: khe' tug' ke' ru qhug' mung: sad' lo" vageshao:.
5 Yao: bam re Asang: mug: lagyo" yang khe' re yao: bam wa la hug' yang hug' paui" pye' ra"
khavho ru: boe" lo" vageshao:.
6 Yao: bam re Asang: mug: lagyo" yang be; lhang" ke' re yao: bam: khyodang wa mug: cad' mung: jhad' byaug vageshao:.
7 Yao: bam wa pe" akhyo mabo: rumae nga" qhid' mae" lha" thaung mung: ngore taung" yu nae" qhid' mae"
no; ra" dung:khung: dau" ako".
8 Ngadqere: yao: bam mabeim: shi:re byo; qeim: ru wa yao: bam re myhi: lo mung: yao: bam yao" lha" mae myi" yang: byo; qeim: rumae gyo" vao lo" li" genae".
9 Ailao" ngo wa Asang: mathao mae ngaui bau" na nae". Yao: ngore khyad' yu mung:ngo ngaui bau: nae".
10 Asang re nga" nhag' lam: alhab' yang Nao we' dau: ru khag' mana nao wa qam: nang: mo, re qam: bo mo; ra" lo, mae" gug: gam byid' ra".
myaung mo, re deim" zag zo: mo; lo, mae" gug: gam byid' ra"- ein: ta" kyo: nae".
11 Makhyang: mashab: ra" byu qe wa ngore qobo zhaug' mung:
ngo: yang pe" maba: ra" yug: mau" mae ngore yug: zhaug' ako".
12 Yao: bam wa ngore gai: ru qhid' mae" makhyang" ru tug' byid' ako".
Aimung: ngo wa nhag' lam: thao" lo" na va".
13 Ngadqere: yao: bam no phyo: qhug' re ngo wa kaug' qhui: ra" mai bau: ve, mung: zo: shaug' mazo: lo: na:- nga" au: re gam" mung: akyu" mho'.
14 Nga" ba nam mangad: lao" mao:nhaung: dayaug yaug: qhid' mae" re"ru: ngo wa akyu" mho' byid' ra".
Yao: myhi" qhid' mae" kaug' qui: ruru: ngo wa gam" mung: du" qin".
15 Ngadqere: ngo qug: khai: qhug' re yao: bam alhab' ngaui bau" na mung: ngore ceim" jung" nae" ga:-
nga" gaung lhang" gam: mae phaung: bam: ako". Byu bang" qe ngore be, mung:mathang mano: ce:thaung" na: ako".
16 Khyid gyug: yaug re ceim" jung" nhohab nghang" ru we' yao: bam wa ngore zhaug' qu" ako".
17 Asang we"- khomyhao" myao" sho' qu" to: shi:nae" i? Yao: bam be; khyad' rumae"ngore khyad' yu la,- ce: khang khyi jham mae" nga" kao so' re khyad' yu byid: la,.
18 Ailao" ni" byumyu" qe: phaung gaung: mae nao re ngo jeju caung:khin" nae".
Yao: bam alhab' mo; nho: qhid' kheim: mae nao re ngo caung:khin" nae".
19 Ngo re qu" jung" na: ra" ai: nga" gyevo qere ngo jeim" ra" mathao mae dabau: nhao-
Pe" si: mabo: rumae ngore nghang" ra" mo, nga" kaug' qhui: ra" mathao mae dabau: nhao.
20 Yao: bam wa jhid'de; taung" majhau ngad: ako".
Ai: atha" yao: bam wa yaug yo cae: tae" rure jhid'de; mo, re mhug' dao: ja: nam jab khyo" cui" ta" ako".
21 Yao: bam wa hug' yang ngore- Nao kad' ru ngonhaung" myao va" ga:- qobo zhaug' ako".
22 Ngadqere:- O" Asang we"- cere nao myao byid' ava". Airu: mung: Asang we"- sae za: datae" to:- Va: va: mae dana: jo,
23 O" Asang we"- nao yao" gaung re nhug' to" mung: ngore gyevha byid: la,- nga" Mao"So we"- to" mung: nga" mung mau" zo" re bota" byid: la,.
24 O" Asang we"- nao wa din:man" ra" yaug ngad mung: ngo mae qobo maqo" rure ta" hau: byid: la,. ngore nga" gyevo qeyang daqu" bau: nhao.
25 Yao: bam re- ngonhaung" yang yao: re qo" yu: pye' va". Ngonhaung" o: ru wa ai yao: ngad: va"- ein: data" nhao.
26 Ngo dayin dayo: qug: khai: phau: zo" rure qu" bau: mo, wa dalhang: dae jeim" gyo" mung: sad' naug: byaug vageshao:-
ngo tho' je: gai: ga: ta" hau" na: ra" mo, qho' thug' mung: myo, nho phoe vageshao:.
27 Ngo re qobo loe; ru myao nug mo, wa ngaui bau: taung" hug' mung: Asang wa qi" qhang: thao" va" lhe"- yao: wa
yao" daui daui yaug: aung doe; rumae ngaui: na: ra"- ga: paug' yang:paug' yang: ta" na vageshao:.
28 Ailao" ni" din:man" khyo re ngo ta" hau: mung:nao re daba: geim" caung:khin" na nae".