CAUNG: KHIN" 28
Bao" Thaug" Ru Mho' Ra" Akyu" Mho' Dao:
(Davi peim: ru)
1 O" Asang ngore gyevha byid: yaug we"- nao re ngo yao: na:- nga" hug' yao thoe re gyo: byid: la,-
Ngo re nao: yang matau: byid: re ngo wa movo: mug: khyo lo" mo; phaung mae bo:bo: byaug nae".
2 Bao" yu nae" qhid' mae" nao re hug' yao: au: ni" gyang" lho" ra" Caung:pa" Yham khyo nga" lo, tau yang: akyu" mho' au: gyo: byid: la,.
3 Nhad' mae gyo" ngaui taung" jhau mung: aung khug mae nghang: myid bo: ra" mo,-
makhyang: mashab: mau" kad' ra" mo, we' daga" ngore dao: dakho' la,-
4 Yao: bam shad' nghung" ra" makhyang: mashab: mau" mathao mae yao: bam re qobo dae byid: wa,-
Yao: bam kad' ra" lo, mau" alhab' qhid' mae" yao: bam re qobo dae byid: wa,- yao: bam khae: yu man" ra" qobo dae byid: wa,.
5 Yao: bam wa Asang pe" kad' ava" ga" rure re:- yao: phan" to" rure re:- mamyao ngad: ako".
Aimung:yao: wa yao: bam re qobo dae byid: mung: yao: bam re apyad ato mae phyo' qheim" pye' li" nae".
6 Asang re caung:khin" ge,- yao: wa, bao" thaug' yu nae" hug' yao: thoe re gyo: byid' ava".
7 Asang wa gug: gam byid: mung: gyevha vha byid' ra".
Yao: wa ngore bao" yu mung: ngore ngaui bau: nhao va".
Ngo wa ngaui bau" ra" nghaui" caung: yang yao: re caung:khin" na:.
8 Asang wa yao" byumyu" re gug: gam vha byid' ra"- yao: wa yao" yang khyin: to" ra" kho:kham re gyevha byid: mung: khyad' yu: ra".
9 Asang we"- ni" byumyu" re khyad' yu mung: nao: yang sang: ra" mo, re shaman" byid: wa,. Yao: bam re lhaug' zaung" ra" yao zam: boe" mung: apyad ato mae yao: bam re qu" caung: na byid: la,.