CAUNG: KHIN" 27
Caung:khin" Akyu" Mho' Dao:
(Davi peim: ru)
1 Asang wa nga" bo" bao we' nga" khyad' yu khyo ngad: ra".
Khag' rere: ngo magyaug nae". Asang wa gyaug ci" ja: alhab' mae" ngore gug: gam byid' ra".
Khonhae" re: ngo magyaug ca" nae".
2 Makhyang: mashab mo, ngore gyekhe' mung: se' pye' nae" ga: seim" ko" au: yao: bam khyid tha" thu mung: lang" lo" ako".
3 Gyetab datab geim" yang ngore ceim" re lhao" ngo magyaug ca" nae".
Gyevo qe ngore gyekhe' ko" re lhao" ngo wa Mao"So re khug ngha: na shinae".
4 Ngo wa Asang re daja: mho' va".
Ngo o: ru wa daja: za: ngad:. Aiwa Asang: yham mae nga" pyad thao" sho' qo" na mung: yao" gai: ra" khyo re qu" mug' nae" qhid' mae" we' yao" yang khyo shid' yu nae" rure mho' nae" ru ngad: ra".
5 Qug: khai: qhug' ra" ayo, re yao: ngore aqab go byid: nae"- yao" Caung:pa" Yham mae ngore gug: gam byid: mung:
myhao: ra" laung: mo" baui dao mae ngore gug: gam byid' li" nae".
6 Airumung: nga" avai: ayae mae" nga" gyevo qere ngo aung: pye' nae"- ngaui bau: ngaui lho" hug' ru we' yao" Caung:pa" Yham mae ngo xeim: ngaui" byid: nae".
Asang re ngo nghaui"caung: mung: caung:khin" nae".
7 Asang nao re ngo yao: au: re- gyo: byid: la,
Ngo re nhag' khyag' mung: tau: byid: la,.
8 Ngo re li" caung:pa" la,- ga: nao ta" lao"- ngo wa- Asang we"- ngo li" nae" ein: tau: nae".
9 Ngo re nhaung thao" daphaug' pye' la,- ngore nhag' wa dayo: la,- ni" daui daui yaug re dakhe' pye' la,- nao wa ngore bao" yu yaug ngad:- ngore daphao: lhaui: co'- O" Mao"So- nga" khyad' yu yaug we"-.
10 Nga" pho" we' nga" myhi" yang shapye' ngadqere:
Asang wa ngore gun caung byid' li" nae".
11 Asang we"- nao kad' nhao nug: ra" khyo ngore mho" byid: mung:
gug: gam: ra" khyo mae jhui" shid' lo"la,- pe"mung:ga"re ngo wa- gyevo myo: sho' qo" ra".
12 Mhug' dao: jham we' kyaug' nhin" yang: gye kad' na ko" ra" nga" gyevo qe: lo, mae ngore dashapye' to: co' la,
13 Ce:pyad mae Asang gai: ra" khyo re qo" the' myao nae" qhid' mae" ngo daui: na: li" nae"- ein: rure ngo ba: ra".
14 Asang mae khug ngha wa,- Lam khug: myid bo wa,. Nhag' lam: dabyo,- Asang mae khug: ngha: na wa,.