CAUNG: KHIN" 26
Byu Gai: Dayaug: Akyu" Mho' Dao:
(Davi peim: ru)
1 O" Asang we"- ngo wa jo: rure kad' yang: nao re jab byang" sho' lam khug: na: rumung: ngore qobo maqo" yaug khyo" ta" hau: byid: la,
2 Asang we"- ngore ca: qu" mung: jham" qu" byid: la,- ngo myid: o: ru jham we' nga" nhag' lam: myid: rure dao: phyid' kho' byid: la,-
3 Ni" mabaui mabyo; ra" jhid'de; myid wa nga" khyo shid' ru ngad: ra".
Ni" dao:so: dang: ra" khyo wa ngore khonhae" re: khyo jhui: byid' ra".
4 Pe" phug' made; ra" byu qe we' ngo mazam"-
Geim kad' pyag' vhan" ba mo, we' ngo pe" masin:.
5 Makhyang: mashab mo; byin zam" qere ngo nghang: mung:-
nhag'lam: kaui: ra" mo, re jao" pye' va".
6 Asang we"- ngo wa qobo maqo" ra" khyo re qhu" byid' ra" khyo" nga" lo,cid' pye' mung: ni" xeim: ngaui" jaung: avai: ayae mae ye:caung:pa" ra".
7 Jeju caung" ra" nghaui" caung: re ngo nghaui" kyo: mung:- ni" mug' pho: mau" alhab' re ta" kyo" ra".
8 O" Asang we"- nao na: ra" yham
ni" phungbao bao: jo; ra" yham re ngo jhid'de; wo".
9 Qobo byu qe we' daga" ngore daphyo' qheim" pye' la,-
Byu se' mo; ra" qobo dae mae" ngore dabo: leim zo: nhao la,.
10 Yo, qug khao: ngo" makhyang" ru za: kad' mung: khug vag: jhaung qhu" yu zo: nae" jin" jin" ngad mo, phau: zo: nae" qobo dae mae" ngore loe, nhao la,
11 Ngo kam" wa jo: ru kad' mung: ngore nhag' khyag' ru we' khyad' yu la,
12 Ngo wa gyaug ci" ja: alhab' mae" loe; beim gug: gam: na mung:
Asang byumyu" phaung mae ngo Asang re caung:khin" ra".