CAUNG: KHIN" 21
Aung Doe; Rure Caung:khin" Ru
(Davi peim: ra" nghaui" caung:)
1 O" Asang we"- Kho:kham wa ngaui bau" na: ra". Pe"mung:ga"re nao wa yao: re qam: byid: yang: ngad: ra".
2 Nao wa yao: re yao" nhag' lam: mae myid: o: rure byid: va"- yao: mho' rure nao tau" byid: va".
3 Nao wa yao: jhao" shaman" jeju aqi: we' li" mung: yao" au: mae qhang ba maug: zhaung: byid' ra".
4 Yao: wa kao so' re mho' mung:- nao: yang yao: re kao qhang nhao yang: myao" sho' na nhao: ra".
5 Nao bao" yu: ruyang yao" phungbao qi" ava".
Yao: re nao: yang mang qi: nhao mung: phung so' qi: qo" yu nhao: ra".
6 Ni" shaman" jeju jham wa yao: mae apyad ato jo; jo; ra".
Yao" nhae mae nao na mung: yao: mae ngaui bau: byang" jo; ra".
7 Kho:kham wa qam: zang bo: ra" Asang mae lam khug: ngha: ra"- aimung: Asang: mabaui mabyo; jhid'de; myid mathao mae yao: wa khonhae" re: gug: gam: na nae".
8 Kho:kham wa yao" gyevo alhab' re taung" pye' nae"-
yao: re nghang" ra" mo, yaug khao: ngo" re yao: taung" pye' nae".
9 Yao: wa yao: joe" li" ra" au: re khyeim" mo" myi: re" ru: yao: bam re ngha" pye' li" nae".
Asang wa yao" nhag' yo" ruyang yao: bam re zo" pye' li" nae". Amung: yao: bam re myi" yang zo" pye' nae".
10 Yao: bam: myid:zo: qe dayaug re: maqang" genae".
Kho:kham wa yao: bam alhab' re se' pye' li" nae".
11 Yao: bam wa yao: re makhyang" ra" mau" kad' nae" byin phyo: zin" ako". Ngadqere: yao: bam aung doe, genae" mangad:.
12 Yao: wa yao" myo" yang yao: bam re bag: li" nae".
aimung:yao: bam re tug' phao: lo" nhao li" nae".
13 Asang we"- ni" qi" qhang: ra" qam: so' mathao mae nao re ngonhaung" caung khin" na:-
ni" qam: so' re ngonhaung" caung:khin" mung: nghaui"caung: na: bam nae".