CAUNG: KHIN" 22
Dayin Yo: Mung: Hug' Yao Thoe We' Caung:khin" Ra" Nghaui"caung:
(Davi peim: ra" Nghaui"caung:)
1 Nga" Mao"So we"- nga" Mao"So we"- nao pe"mung: ngore shapye' to" i?
Ngo wa bao" yu nae" rure nhag' lam: thao" ru we' hug' yao qere: bao" yu: ru majoe" lo shi:-
2 Nga" Mao"So we"- Na" ayo, mae nao re ngo khai qere: nao matau: byid: ngad: ra"- Myi" re yao qere: dug no" ru maqo" yu.
3 Ngadqere: nao wa Gyang" Lho" yaug khyo" kho:kham tao" mae zaung: jo, mug:-
Israel qeyang caung:khin" byid: qhug' yaug ngad: ra".
4 Ngonhaung" nho: phug' phyid' qe wa nao mae khug ngha: lo: ako".
Yao: bam wa nao re lam khug mung:- yao: bam re nao khyad' yu: lo: ava".
5 Yao: bam nao re khai: yao mung: gyaug ci" jao: mae" loe; lo: ako".
Yao: bam wa nao re lam khug mung: nhag' lam: mabyo, ngad: ako".
6 Ngadqere: ngo wa byu dayaug mangad: lo:- bathaung dadau: za: angad:- yaug khao: ngo" yang ngore nghang: yang: maphug' makhyad' kad' ako".
7 Ngo re the' myao mo, alhab' yang jung" ako".
Ngo re sho tad' qhu" mung: au: lhang lhang: qhu" ako".
8 Yao: bam wa nao Asang re lam khug: ra". Pe"mung: nao re yao: mali" khyad' yu i? Asang wa nao re o yang: ngad: re pe"mung: nao re makhyad' yu i? ga: ta" ako".
9 Ngo re nyang" za: gug: gam taung" khau: thug' yu nhao: ru wa nao ngad: ra"
Ngo nau" nin" ngad shi" au: nao ngore gug: gam byid' ra".
10 Ngo khau: ra" ba mae" nao re khug ngha: lo va".
Amung: nao wa ayo, byang" nga" Mao"So ngad: ra".
11 Ngo mae" va: va: mae dana wa,- Qug: khai: wa jhao" jo; ra"- amung: bao" yu nae" byu dayaug re: mana ngad: ra".
12 Gyevo myo: sho' mo, wa nung: jaung lo: jham we' dakhyo: ngore lhang" kham" bam: ako".
Yao: bam wa nga" avai: ayae mae Bashan mang: mae" nung: lo: qan jham re" ru: na: bam: ako".
13 Yao: bam wa khangkhyi jham we' dakhyo: yao: bam: nhad' re ho" mung: ngore phyo' zo: nae" ga: kyid' na: ako".
14 Nga" qam: wa myid gaung mae sheim: pye' ra" qid we' dakhyo: gan: byaug va".
Nga" shoqug: jham wa majho" xo' yaug: jo, lo:- nga" nhag' lam: wa aqang: yug: byaug: ra" byoshaung: ru ngad: byaug va".
15 Nga" khyaung: wa phalhug re" ru: ho: byaug va"- nga" sho re: o mae de; byaug va".
Nao wa ngore phalhug bam mae shid vashao: ga: shapye' pye' ra".
16 Makhyang: mo, daphung: ngore lhang" kham" to: mung:- lakha: dajham we' dakhyo: ngore kham" lhaung" to" ako".
17 Nga" shoqug: alhab' re the' myao: ava". Nga" gyevo qe wa ngore qu" zhaug' kyid' na: ako".
18 Yao: bam wa nga" mai bau: re pha" ce' khyo" mung: yao: bam yao: cao: jho" gae ngho" pye' ako".
19 O" Asang we"- ngo mae" va: va: mae dana- ngore phyad li" khyad' yu la,
20 Shae pyang: mae" ngore khyad' yu la,- ce: lakha: jham: lo, mae" nga" kao so' re khyad' yu la,-
21 Ce: ra" khangkhyi jham mae" ngore khyad' yu byid: la,- ce: nung: qan lo: jham: ra" qhid' kheim: mae" ngore bao" yu nae" khyo majo,-
22 Nao kad' va" mau" re nga" byu qere ta" kyo: nae". Yao: bam: phaung mae nao re ngo caung:khin" nae".
23 Asang: daui daui mo, we"-
Yao: re caung:khin" ge,- Yaku nho: myid:zo: qe we"-
yao: re nga: yhe' byid: ge,- Israel byumyu" qe we"- yao: re caung:pa" ge,.
24 Yao: wa masho: majhin myaung mo, re maqu" lhaui" pye'- dayin dayo" ru kham zo" na mo, re mashapye' to:.
Yao: wa yao: bam mae" gashad' khyo maphaug' lo". Bao" yu nae" yao: bam mho' yao ko" au: kam" wa tau: byid' ra".
25 Byu phaung gaung: mae ngo wa nao kad' ra" mau" re caung:khin" nae"- nao re caung:pa" mo; qhid' kheim: mae ngo dang: to" ra" ngaui" xeim: re ngaui" qhaug' byid: nae".
26 Masho: majhin: ra" myaung mo, wa yao: bam o: ra" nho" zo" li" genae". Asang jhao" li" mo, wa
yao: re caung:khin" li" genae".
Yao: bam wa apyad ato na: dai vageshao:.
27 Byumyu" alhab' wa Asang re myid: beim" li" genae". Mug: myid jheim khao: ngo" mae"
byu qe wa yao: jhao" phaug' lo: li" genae". Byu boe: alhab' wa yao: re caung:pa" genae".
28 Asang wa kho:kham ngad mung: yao" byumyu" mung"dan: jham re eib: ra".
29 Ngad beim: mo, alhab' wa yao: re goe; pa" li" genae".
Shid ba: ra" byu alhab' wa yao" qhid' kheim: mae goe; pa" li" genae".
30 Ce:thao: ne, mae" myid:zo: qe wa yao: re caung da" byid' li" genae".
Byu qe wa yao: bam: myid:zo: qere Asang: khyo ta" kyo" li" genae".
31 Makhau: li" shi" ra" byu qere-Asang wa yao" byumyu" re khyad' yu: ra"- ga: ta" kyo" li" genae".